Рʹожа иройин, сәрԝеред религийа һе зедә дина хԝә дьдьнә ԝе йәке, кӧ ча пʹәра ԛазанщ кьн, нә кӧ сәр ԝе йәке кӧ али мәрьва бькьн, ԝәки әԝана рʹӧһʹанида пешда һәрʹьн. Әԝана щурʹә-щурʹә тьшта дьфьрошьн сәва кӧ пʹәра чекьн. Һʹәчʹи зәʹф сәрԝеред религийа пʹәре мәзьн чедькьн у бь әʹмьрәки бе мьнәт дьжин. Ԝәрен әм дина хԝә бьдьнә һьнә мәсәла:

•   Чаԝа жь леколинәке һатә кʹьфше, кʹәшишәки Католики нава 13 сала пʹәре ԛӧрбанкьри сәр рʹийа хԝә хәрщ дькьр. Мәсәлә, пе ԝан пʹәра әԝ 150 щара пе тәйара шәхси фьрйабу у ԝәкә 200 щара сәр чуйин-һатьна пе лемузине хәрщ кьрьбу. Ӧса жи әԝи 4 милйон долар зедәтьр сәр ве йәке хәрщ кьр, кӧ авайики дера хԝә тʹәзә кә.

•   Йәк жь ԝәлатед Африкайеда, кʹәшишәк һәртʹьм тʹемед религи дәрбаз дькә, сәр кʹижани бь дәһа һʹәзара мәрьв тʹоп дьбьн. Дера ԝийә мәзьнда гәләк тьшт тенә фьротане. Мәсәлә, жь бьзьре ԛәнщкьрьнева гьрти, һʹәта пʹежгир у кʹьнщед кӧ шькле ԝи сәр ә. Һʹәчʹи зәʹф мәрьвед кӧ тенә щәм ԝи гәләк кʹәсиб ьн, ле әԝ хԝәха беһʹәсаб дәԝләти йә.

•   Ԝәлате Чинайеда чар чʹийайед пироз йед Будиста һәнә. Жь ԝан чʹийа сәр дӧ һʹәва бизнес компанийа һатьнә саз кьрьне. Ле Монастера Шаолин бь ве йәке навдар ә, кӧ алийе бизнеседа пешдачуйи йә у наве хԝәйе ве Монастере данинә «кʹәшише бизнесмен».

•   Гәләк компанийед Америкайеда тьштәк ӧса бәлабуйи йә, кӧ мәрьвед рʹӧһʹани һьлдьдьн сәр хәбате. Әԝ мәрьвед рʹӧһʹани али бизнесмена дькьн, сәва кӧ әԝана ретуалед религи саз кьн у бьфьрошьнә һәвалхәбатчийед хԝә.

 Һун чь дьфькьрьн дәрһәԛа ԝан религийа, йед кӧ дьбьнә пʹарәкә бизнесе? Һун ԛә фькьринә бона ве йәке, кӧ Хԝәде ча дьньһерʹә сәр ԝан сәрԝеред религийа, йед кӧ пе пʹәре ԛӧрбанкьри дьжин?

 Әԝ йәк Хԝәде хԝәш найе. Кʹьтеба Пирозда жи те кʹьфше, кӧ ԝәʹде бәре Хԝәде хԝәш нәдьһат кьред ԝан кʹәшиша, йед кӧ бона һинкьрьне пʹәра жь мәрьва һьлдьдан (Миха 3:11). Хԝәде һерс дькʹәт чахе кʹаһинед тьма щийе һʹәбандьне дькьрьнә «шкәфта ԛачаха» (Йерәмйа 7:11).

 Иса жи хԝәш нәдьһат чахе мәрьв религийа дьданә хәбате, сәва кӧ пʹәра ԛазанщ кьн. Ԝи чахи сәрԝеред религийа дьһиштьн, ԝәки мәрьвед тьма пʹарьстгәһа Оршәлимеда тьшта бьфьрошьн у паше ԝана жь ԝан мәрьва пʹара хԝә һьлдьда. Әԝана пе пʹәре ԝан мәрьвед кʹәсиб дьжитьн, йед кӧ дьһатьнә пʹарьстгәһе, сәва кӧ Хԝәде бьһʹәбиньн. Ләма жи Иса сәр ԝан мәрьва һерс кʹәт бәри ԝан да у ӧса гот: «Мала Баве мьн нәкьнә базаргәһ!» (Йуһʹәнна 2:14-16).

 Ӧса жи әм дькарьн дина хԝә бьдьнә сәр ве йәке, кӧ Иса ча Хԝәдерʹа хьзмәт дькьр (Йуһʹәнна 8:28, 29). Чахе Иса мәрьва дәрһәԛа Хԝәде һин дькьр, әԝи тʹӧ щар жь ԝана пʹәра һьлнәдьда. Әԝи ӧса жи пʹәрә һьлнәдьда чахе кәрәмәта дькьр. Әԝи бе пʹәрә бьрчийа тʹер дькьр, нәхԝәша ԛәнщ дькьр у мьрийа рʹадькьр. Иса тʹӧ щар хьзмәтийа хԝә Хԝәдерʹа нәдьда хәбате, сәва кӧ дәԝләти бә. Һәла һе мала ԝи жи тʹӧнә бу (Луԛа 9:58).

 Иса готә шагьртед хԝә, ԝәки әԝана сәва хьзмәтийа хԝә пʹәра һьлнәдьн. Әԝи ӧса ԝанрʹа гот: «Ԝә беһәԛ стандийә, беһәԛ жи бьдьн» (Мәтта 10:8). Шагьртед ԝийә пешийе, йед кӧ паше һатьнә навкьрьнә Мәсиһи, тʹәмийед Иса һур бь һур дьанинә сери. Ԝәрен әм дина хԝә бьдьнә дӧ мәсәла:

•   Щарәке, мәрьвәк бь наве Шьмһʹун готә шагьрте Исайе незик, Пәтрусе шанди, кӧ әԝе пʹәра бьдә ԝи, һәгәр әԝ щабдарийед щьвате бьдә ԝи. Пәтрус дәрберʹа хԝәстьна Шьмһʹун инкʹар кьр у ӧса ԝирʹа гот: «Зиве тә бьра тʹәви тә бьтʹәрʹьбә! Тә тʹьре пʹешкʹеша Хԝәде пʹәрәти те стандьне!» (Кʹаред Шандийа 8:18-20).

•   Паԝлосе шанди мисйонерәки хирәт бу. Гәләк сала әԝи аликʹарийе дьда щьвата, ле тʹӧ щар жь бо ве йәке пʹәра һьлнәдьда. Паԝлос у һәвалхьзмәткʹаред ԝи нә мина һьнәка бун, «йед кӧ хәбәра Хԝәде кʹара хԝәва» гьредьдан (2 Корьнтʹи 2:17). Дәԝсе Паԝлос ӧса гот: «Әм шәв у рʹож дьхәбьтин, кӧ сәр ԝә тʹӧ кәси нәбьнә баргьрани, гава мә Мьзгинийа Хԝәде ԝәрʹа даннасин кьр» (1 Тʹесалоники 2:9).

 Һәмьки Мәсиһийед ԛьрʹна йәкерʹа пʹәрә лазьм бу, сәва кӧ әԝана хьзмәтийа хԝә бәрдәԝам кьн у ӧса жи бькарьбьн али мәрьвед дәсттәнг бькьн. Ле ԝана тʹӧ щар сәва хьзмәтийа хԝә пʹәра жь тʹӧ кәси нәдьхԝәстьн. Ле һәрге кәсәк дьхԝәст, бь сайа пʹәра рʹазибуне ԝанрʹа бьда кʹьфше, әԝ дькарьбу әԝе йәке бькьра ль гора ԝан дӧ принсипа:

•   2 Корьнтʹи 8:12: «Чьмки һәгәр һун бь рʹәзәдьли кʹомәке бьдьн, әԝ ԝәкә ԝе йәке ԛәбул ә, чьԛас дәсте кʹева те, ле нә ԝәкә ԝе йәке, кӧ дестда тʹӧнә».

   Әв чь те һʹәсабе: Сәва Хԝәде дьһа фәрз ә әԝ, кӧ мәрьв бь чь дьли ԛӧрбан дькә, нә кӧ чьԛас ԛӧрбан дькә.

•   2 Корьнтʹи 9:7: «Дьле һәр кәсирʹа чьԛас дәрбаз дьбә, бьра һаԛаси жи бьдә, нә кӧ бьдә ле дьле ԝи пәй бә йан бь борщдарийе бә, чьмки Хԝәде йе бь дьл у әшԛ дьдә һʹьз дькә».

   Әв чь те һʹәсабе: Хԝәде нахԝазә, ԝәки мәрьв бь борщдарийе ԛӧрбана бькә. Ле Хԝәде хԝәш те чахе мәрьв бь дьле тʹәмьз у дьле рʹази ве йәке дькә.

 Кʹьтеба Пироз әʹйан дьдә кʹьфше, ԝәки Хԝәде нә һʹәму религийа у щурʹе һʹәбандьна ԝан ԛәбул дькә (Мәтта 7:21-23). Пʹехәмбәртийа жь кʹьтеба Әʹйанти, һʹәму религийед ԛәлп бәрамбәри кʹӧлфәта ԛав дькә, чьмки әԝана бона пʹәра у бона кʹара хԝә тʹәви сәрԝеред ве дьне һәвкʹарийе дькьн у бь сайа пʹәре щьмәʹте дьжин (Әʹйанти 17:1-3; 18:3). Ве пʹехәмбәртийеда ӧса жи те готьне, ԝәки зутьрәке Хԝәде ԝе диԝана ԝан һʹәму религийед ԛәлп бькә (Әʹйанти 17:15-17; 18:7).

 Йазьх, ле рʹожа иройин гәләк религийед ԛәлп мәрьва дьхальфиньн у ӧса дькьн, кӧ хԝәстьна мәрьва ԝәки һе зедә дәрһәԛа Хԝәде пебьһʹәсьн, ӧнда дьбә (Мәтта 24:11, 12). Ле Хԝәде мәрьвед дьлсах һелан дькә, ԝәки әԝана ԝирʹа ӧса хьзмәт кьн ча ԝи хԝәш те у пьшта хԝә бьдьнә һʹәбандьна ԛәлп (2 Корьнтʹи 6:16, 17).