Дәрса 2
К′и йә Хԝәдайе Р′аст?
1. Чьр′а әм гәрәке Хԝәдер′а ԛӧльх кьн?
Хԝәдайе р′аст әԝ ә, к′и кӧ һ′әму тьшт ә′фьрандийә. Дәстпебун у хьлазбуна ԝи т′ӧнә йә (Зәбур 90:2). Хԝәде һәйә канийа ԝан мьзгинийа, йед кӧ дь К′ьтеба Пирозда ньвисар ьн (1 Тимот′ейо 1:11). Әԝи ә′мьр дайә мә, ләма жи әм гәрәке т′әне ԝир′а ԛӧльх кьн. Бьхунә Ә′йанти 4:11.
2. Хԝәде йәки ча нә?
Т′ӧ кәси жь мәрийа Хԝәде нәдитийә, чьмки Хԝәде р′ӧһ′ ә у әԝ найе дитьне. Әв те һ′әсабе, кӧ щур′е ә′мьре Хԝәде жь щур′е ә′мьре мәрьва бьльндтьр ә (Йуһ′әнна 1:18; 4:24). Ле йәкә әм дькарьн һ′ӧнӧред Хԝәде жь ә′фьрандьнед ԝи бьбиньн у ԝи нас кьн. Мәсәлә, щур′ә-щур′ә кӧлирк у емиш, һ′әзкьрьн у биланийа Хԝәде дьдьнә к′ьфше. Чапед ә′рд у ә′зман жи ԛәԝата Хԝәде ә′йан дькьн. Бьхунә Р′омайи 1:20.
Һе зә′ф дәрһәԛа Хԝәде әм дькарьн пебьһ′әсьн жь хԝәндьна К′ьтеба Пироз. Мәсәлә ԝе дәре те готьне, кӧ чь Хԝәде хԝәш те у чь на, ӧса жи те гьликьрьне кӧ әԝ т′әви мәрьва ча нә у чахе мәри ԛәнщи йан жи хьрабийе дькьн әԝ чь дькә. Бьхунә Зәбур 103:7-10.
3. Гәло наве Хԝәде һәйә?
Иса Мәсиһ гот: «Баве мәйи ә′змана! Наве тә пироз бә» (Мәтта 6:9). Р′аст ә сәрнавед Хԝәде гәләк һәнә, ле т′әне навәки ԝи һәйә. Дь һәр зьманәкида, наве Хԝәде щур′әки те готьне. Мәсәлә ль сәр зьмане кӧрманщи, те готьне «Йаһоԝа» йан жи «Йаһԝәһ». Бьхунә Дәрк′әтьн 3:15 (спартьн).
Дь гәлә ԝәлгәр′андьнед К′ьтеба Пирозда, наве Хԝәде дәрхьстьнә у дәԝсе сәрнавәки дьн ньвисинә, мәсәлә Хԝәде йан Хӧдан. Ле дь К′ьтеба Пирозә орижиналеда, әв нав ԝәкә 7 000 щар һатийә ньвисаре. Чахе Иса Мәсиһ дәрһәԛа Хԝәде мәри һин дькьрьн, әԝи т′ьме наве Хԝәде мәрийар′а ә′йан дькьр. Бьхунә Йуһ′әнна 17:26.
Мина ви бави, кӧ зар′а хԝә һ′әз дькә, Хԝәде хәм дькә ԝәки һ′але мә һ′әта-һ′әтайе хԝәш бә
4. Гәло Хԝәде мә һ′әз дькә?
Әԝ йәк кӧ дәр-доре мә һаԛас зӧлми у нәһәԛи һәнә, те һ′әсабе, кӧ Хԝәде бона мә хәм накә? Һьнәк дьшьрмиш дьбьн, кӧ Хԝәде мә дьдә щәфе, сәва кӧ мә бьщер′ьбинә. Ле әв йәк нәр′аст ә. Бьхунә Аԛуб 1:13.
Хԝәде мәри хәлат кьрийә бь ԛәдьрәки мәзьн, бь азайа бьжартьне. Әм гәрәке бьшекьриньн азабуна хԝә, кӧ әм дькарьн хԝәха бьжберьн Хԝәдер′а ԛӧльх кьн (Йешуа 24:15). Ле һ′әч′и зә′ф жь мәрийа дьжберьн хьрабийе бькьн, ләма жи иро нәһәԛи һаԛас зедә дьбә. Чахе Хԝәде һаԛас нәһәԛи у зӧлмийе дьбинә, дьле ԝи дешә. Бьхунә Дәстпебун 6:5, 6.
Йаһоԝа Хԝәде бона мә хәм дькә. Әԝ дьхԝазә, ԝәки әм бәхтәԝар бьн у дь ә′мьре хԝәда ләзәте бьбиньн. Хԝәде зутьрәке һ′әму зӧлма у ԝан к′и кӧ ве йәке дькә, ԝе к′ӧта кә. Йаһоԝа Хԝәде ԝә′дәлу дьһелә кӧ нәһәԛи бьԛәԝьмьн чьмки, мә′нийа ве йәке һәйә. Дәрһәԛа ве мә′нийе әме дь сәре 8-да пебьһ′әсьн. Бьхунә 2 Пәтрус 2:9; 3:7, 13.
5. Ча әм дькарьн незики Хԝәде бьн?
Йаһоԝа Хԝәде мә т′әглиф дькә, ԝәки әм незики ԝи бьн, демәк бь дӧакьрьне т′әви ԝи хәбәр дьн. Әԝ дәрһәԛа мә һәр кәси башԛә дьшьрмиш дьбә (Зәбур 65:2; 145:18). Әԝ һазьр ә, бьбахшинә мә. Щарна бал мә найе стандьне, ԝәки әм ӧса бькьн ча Хԝәде дьхԝазә, ле әԝ т′ьме дьбинә һ′әму шьхӧлед мә, йед кӧ әм дькьн сәва кӧ ԝи ша кьн. Р′аст ә әм мәрьвед гӧнәк′ар ьн, ле бь р′астийе әм дькарьн незики Хԝәде бьн у һәләԛәтийа хԝә т′әви ԝи хԝәйи кьн. Бьхунә Зәбур 103:12-14; Аԛуб 4:8.
Йаһоԝа ә′мьр дайә мә, ләма жи әм гәрәке гьшка зә′фтьр ԝи һ′әз бькьн (Марԛос 12:30). Һәгәр тӧ һе зедә пебьһ′әси дәрһәԛа Йаһоԝа Хԝәде, у ча әԝ дьхԝазә ӧса бьки, бь ве йәке тӧйе һ′әзкьрьна хԝә дь һьндава Хԝәдеда нишан ки, у һе незики ԝи би. Бьхунә 1 Тимот′ейо 2:4; 1 Йуһ′әнна 5:3.
