«Хьлази незик ә!» Чахе һун дьбьһен гьлийед ӧса, чь те һʹьше ԝә? Һун дьшьрмиш дьбьн кӧ астероид ԝе дьнйайе кʹәвә у һʹәму мәрьва кʹӧта кә? Йан һун дьдьнә бәр чʹәʹве хԝә тʹәшԛәла екологи йан жи шәрʹе һʹәмдьнйайейә сьсийа? Һьнә мәрьв жь бо ԝан тьшта нәрʹьһʹәт ьн, һьнәк жи пьштгӧһе хԝәва давежьн йан жи ԛәрфа дькьн.

Кʹьтеба Пироз дьбежә: «Хьлази ԝе бе» (Мәтта 24:14). Әԝ ԛәԝьмандьн ӧса жи те навкьрьне чаԝа «Рʹожа Мәзьнә Хԝәде» у «Һармәгәдон» (Әʹйанти 16:14, 16). Дәрһәԛа ԝе тʹемайе, һинкьрьнед гәләк религийа хальфанди нә, у гәләк ньһерʹандьнед нәфәʹмдари у нәзәлал һәнә. Ле Кʹьтеба Пироз бь тʹәмами әʹйан дькә дәрһәԛа хьлази йан кʹӧтасийе, кӧ әԝ чь йә у чь нинә. Хәбәра Хԝәде ӧса жи али мә дькә кӧ зәлал бьвиньн ԝәки ахьри незик ә. Ле йа лапә баш әԝ ә ԝәки Кʹьтеба Пироз мә һин дькә кӧ чаԝа хьлаз бьн! Ԝәрен әм пешийе шьровәкьн һьнә ньһерʹандьнед нәрʹаст, у ӧса жи пебьһʹәсьн ль гора Кʹьтеба Пироз чь те һʹәсабе хьлази.

1. ХЬЛАЗИ НАЙЕ ҺʹӘСАБЕ КӦ ӘʹРД ПЕ АГЬР ԜЕ КʹӦТА БӘ.

   Кʹьтеба Пироз дьбежә: «[Хԝәде] әʹрде ль сәр бьнгәһа ԝе ава кьр, да кӧ һәр у һәр нәләԛә» (Зәбур 104:5, ИМ). Әԝ рʹез у рʹезед дьн жи, мәрʹа избат дькьн ԝәки Хԝәде әʹрде кʹӧта накә у тʹӧ щар наһелә жи кӧ кʹӧта бә! (Ԝаиз 1:4; Ишайа 45:18)

2. ХЬЛАЗИ НАЙЕ ҺʹӘСАБЕ ԚӘԜЬМАНДЬНӘКӘ НЬШКЕВА.

   Кʹьтеба Пироз әʹйан дькә кӧ хьлази ԛьраркьри йә. Хԝәде ԝәʹдә кʹьфш кьрийә сәва ԝе йәке. Кʹьтеба Пирозда те готьне: «Ле бона ԝе рʹоже у ԝе сьһʹәте тʹӧ кәс ньзанә, нә мьлйакʹәтед әʹзмен у нә жи Кӧрʹ, ле тʹәне Бав. Һаш жь хԝә һәбьн! Һʹьшйар бьминьн! Чьмки һун ньзаньн кʹәнге ԝәхте перʹа бьгьһижә» (Марԛос 13:32, 33). Әʹйан ә, кӧ Хԝәде («Бав») «ԝәхт» кʹьфш кьр кӧ кʹәнге хьлазийе дәстпекә.

3. ХЬЛАЗИ ԜЕ ЖЬ МӘРЬВА НИБӘ У НӘ ЖИ ЖЬ БО АСТЕРОИДЕ.

   Ле ԝе чь бьԛәԝьмә ԝәʹде хьлазийе? Әʹйанти 19:11 дьбежә: «Һьнге мьн дина хԝә дайе, әʹзман вәбу ва йә һәспәки боз, кӧ сийаре ԝирʹа Амьн у Рʹаст дьготьн». Рʹеза 19 бәрдәԝан дькә: «Һьнге мьн әԝ щәʹнәԝьр у пʹадшед дьнйайе ордийед ԝанва ль щики щьвийайи дитьн, ԝәки шәрʹе хԝә тʹәви ԝи сийаре һәспе боз у ордийа ԝива бькьн» (Әʹйанти 19:11-21). Әв рʹез ниве зәʹф бь симболик һатийә ньвисаре. Ле йәкә әм һеса дькарьн фәʹм кьн кӧ Хԝәде ԝе ордийа мьлйакʹәтед хԝә бьшинә, ԝәки дьжмьнед хԝә кʹӧта кә.

1. ХЬЛАЗИ ТЕ ҺʹӘСАБЕ КʹӦТАСИЙА СӘРԜЕРТИЙЕД МӘРЬВА.

   Кʹьтеба Пироз дьбежә: «Дь рʹожед ԝан пʹадшада, Хԝәдайе әʹзмана ԝе кʹьфш бькә пʹадшатикә  кӧ тʹӧ щар кʹӧта набә. У әԝ пʹадшати мьләте майинрʹа найе дайине. Әԝ ԝе әԝан һʹәму пʹадшатийа бьпʹьшьринә у кʹӧта кә, ле хԝәха ԝе бьминә һʹәта-һʹәтайе» (Данийел 2:44, ДТʹ). Чаԝа кӧ дь абзаса жореда һатьбу готьне, «пʹадшед дьнйайе ордийед ԝанва», йед кӧ «шәрʹе хԝә тʹәви ԝи сийаре һәспе боз у ордийа ԝива бькьн», ԝе кʹӧта бьн (Әʹйанти 19:19).

2. ХЬЛАЗИ ТЕ ҺʹӘСАБЕ КʹӦТАКЬРЬНА ШӘРʹА, ЗӦЛМИЙЕ, У НӘҺӘԚИЙЕ.

   «[Хԝәде] шәрʹа дьдә раԝәстьн [һьлдан] ль чар алийед дьне» (Зәбур 46:9, ИМ). «Жь бәр кӧ йед ԝәлатда бьжин, ԝе йед рʹаст бьн у кәсен рʹаст ьн, йед кӧ ль ԝьр бьминьн. Ле бәле ԝе йед хәраб жь ԝәлет бен ажотьн у йед хаин жи бен гьртьн у аветьн» (Мәтʹәлок 2:21, 22). Хԝәде дьбежә: «Ва әз һәр тьшти ну чедькьм» (Әʹйанти 21:4, 5).

3. ХЬЛАЗИ ТЕ ҺʹӘСАБЕ КʹӦТАСИЙА РЕЛИГИЙЕД КӦ ХԜӘДЕРʹА У МӘРЬВАРʹА НӘАМЬН ЬН.

   Кʹьтеба Пироз дьбежә: «Пʹехәмбәр бь фәнәкийе пʹехәмбәртийе дькьн у кʹаһинан бь дәстед ԝанва дьбьн сәрԝер; . . . гәло һуне ль паши вейа чь бькьн?» (Йерәмйа 5:31) Иса ӧса жи гот: «Ԝе Рʹоже гәләке мьнрʹа бежьн: ‹Хӧдан! Хӧдан! Нә мә бь наве тә пʹехәмбәрти кьрьн у бь наве тә щьн дәрхьстьн у бь наве тә гәләк кʹәрәмәт кьрьн?› Һьнге әзе ашкәра ԝанрʹа бежьм: ‹Жь мьн дур кʹәвьн, нәһәԛно! Мьн һун тʹӧ щар нас нәкьрьнә›» (Мәтта 7:21-23).

4. ХЬЛАЗИ ТЕ ҺʹӘСАБЕ КʹӦТАКЬРЬНА МӘРЬВЕД КӦ ПЬШТГЬРИЙА ВЕ ДЬНЙА ЗӦЛМ ДЬКЬН.

   Иса гот: «Әв ә әԝ диԝан: Рʹонайи һатә дьнйайе, ле мәрьва тәʹристани жь рʹонайе зедәтьр һʹьз кьр, чьмки кьред ԝан хьраби бун» (Йуһʹәнна 3:19). Кʹьтеба Пироз гьли дькә дәрһәԛа кʹӧтакьрьна дьнйайе, ԝәʹде Нӧһ мәрьве амьн. «Ле әʹрд у әʹзманед ньһа жи хут бь ԝе хәбәре тенә хԝәйкьрьне, кӧ бь агьр ӧнда бьн. Әԝ бона Рʹожа Ахрәте тенә һьштьне, кʹижанеда мәрьвед нәпʹак ԝе ӧнда бьн һәрʹьн» (2 Пәтрус 3:5-7).

Дина хԝә бьдьне, һатьна «Рʹожа Ахрәте» бәрамбәр дьбә тʹәви кʹӧтакьрьна «дьнйайе» ԝәʹде Нӧһ. Ле кʹижан дьне ԝе бе кʹӧтакьрьне? Тʹопа дьнйа мә ԝе бе хԝәйкьрьне, тʹәне «мәрьвед нәпʹак» демәк дьжмьнед Хԝәде, ԝе «ӧнда бьн». Ӧса жи әԝед кӧ сафи дькьн бьбьнә дьжмьнед Хԝәде, ԝе бенә кʹӧтакьрьне ԝәʹде һатьна «Рʹожа Ахрәтейә» Хԝәде. Ле достед Хԝәде ԝе бенә хԝәйкьрьне, чаԝа кӧ Нӧһ у малбәта ԝи (Мәтта 24:37-42).

Бьдә бәр чʹәʹве хԝә кӧ дьнйа ԝе чьԛас хԝәш бә, чахе Хԝәде һʹәму зӧлмийе кʹӧта кә! Рʹасти жи, әʹламәтийа дәрһәԛа хьлазийе мьзгинийа баш ә, нә кӧ әʹламәтийа хьраб. Ле дьбәк тӧ дьшьрмиш би: «Гәло Кʹьтеба Пироз дьбежә ԝәки хьлази ԝе кʹәнге бе? Әԝ хьлази незик ә? Әз ча дькарьм хьлаз бьм?»