Әз һатьмә буйине у мәзьн бум һәремәкеда кӧ жь Рʹоме дәр ә, кʹидәре һʹәчʹи зәʹф хәбатчийед кʹәсиб дьжитьн. Жийина мьн бь зәʹмәт у кʹәдәр тʹьжә бу. Мьн тʹӧ щар дийа хԝә нәдитийә, ле тʹәви баве хԝә йолә нәдьчум. Әз бь ԛәйде кʹуче мәзьн бумә.

Дәһ салийед хԝәда мьн ида дьзийе дькьр, ле гава әз 12 сали бум, щара пешьн әз жь мал рʹәвим. Баве мьн чәнд щара жь полисхане мьн дәрдьхьст. Әз тʹьме дькʹәтьмә шәрʹ-дәʹԝа, гәләк сәрт бум у сәр тʹәмамийа дьнйайе һерс бум. Гава әз 14 сали бум, мьн сәре хԝә һьлда у ида бь тʹәмами жь мал чум. Мьн дәстпекьр наркотика бьдьмә хәбате у дәрва дьжитьм. Шәв щийе мьн тʹӧнә бу кӧ сәре хԝә дайньм, ләма жи мьн шушед авта дьшькенанд у әз теда рʹадьзам, паше сьбәтьре мьн канийа аве дьгәрʹийа кӧ сәрчʹәʹве хԝә бьшом.

Дьзтийеда у ԛачахтийеда әз бумә һостә. Мьн ида нә тʹәне дьзтийа бьчʹук дькьр, ле мьн мал у ханийед мәзьн дьшеланд. Нава ԛачахада наве мьн бьльнд бу, у ахьрийеда мьн кʹома ԛачахед нав у дәнгда ԛәбул кьрьн. Бь сайа ве йәке, мәщала мьн вәбу кӧ шеландьнед мәзьн бькьм, мәсәлә шеландьна банка. Жь бо хәйсәте мьнә һерс, нава ԝан ԛачахада әз бумә хԝәйиԛәдьр. Әз бей ԛьрʹмә нәдьчумә тʹӧ щи, мьн әв һәла һе дькьрә бьн бәʹлгийе хԝә жи. Зорбәти, наркотик, ԛачахти, чʹер у бенамуси жийина мьн бу. Полис тʹьме дьхԝәст әз бьгьртама. Чәнд щара ԝана әз дьгьртьм у дькьрьмә кәле.

Щарәке чахе әз аза бум, әз чумә щәм хатийа хԝә. Ԝи чахи әԝ тʹәви дӧ зарʹед хԝә ида Шәʹдед Йаһоԝа бун. Ԝана әз тʹәглифи щьвате кьрьм. Әз тʹәне бона ве йәке чум, кӧ бьвиньм һәла ԝедәре чь дьԛәԝьмә. Ода Щьватеда, мьн йа хԝә кьр кӧ бәр дәри рʹунем, ԝәки һʹәмушка кӧ кʹе дькʹәтә оде, бьвиньм. Ча һәр гав, мьн ԛьрʹмә жи тʹәви хԝә бьрьбу.

Әԝ щьвин әʹмьре мьн бь тʹәмами гӧһаст. Те бира мьн әз хԝәрʹа фькьрим, кӧ ԛәй әз кʹәтьмә планетәкә майин! Мьн бь бәшәра хԝәш сьлав дькьрьн. Һʹәта иро бира мьн начә әԝ ԛәнщи у һʹәлали кӧ мьн чʹәʹвед ԝанда дит. Рʹасти жи ӧса бу, те бежи әз кʹәтьмә дьнйакә дьн.

Мьн тʹәви Шәʹдед Йаһоԝа һинбуна Кʹьтеба Пироз дәстпекьр. Чьԛас һе зедә әз һин дьбум, һаԛас мьн дьһа зәлал фәʹм дькьр кӧ гәрәке әз бь тʹәмами әʹмьре хԝә бьгӧһезьм. Мьн ширәта жь Мәтʹәлок 13:20 дьхԝәст бьдьмә хәбате: «Һәвале сәрԝахта сәрԝахт дәрте, һәвале ахмаха хьраб дәрте». Мьн фәʹм кьр ԝәки әз гәрәке һәләԛәтийа хԝә тʹәви кʹома ԛачаха бьԛәтиньм. Әԝ йәк нәһеса бу, ле пе аликʹарийа Йаһоԝа мьн әԝ йәк кьр.

Мьн хԝәрʹа ԛьрар кьр кӧ һәр тьштида паԛьж бьм. Әз сәр хԝә дьхәбьтим, ԝәки тʹәрка щьхаре у наркотика бьдьм. Мьн пʹоред хԝәйә дьреж бьри, гӧһар жь гӧһе хԝә дәрхьст, у ида чʹера нәдькьр. Щара пешьн әʹмьре хԝәда, мьн дәстпекьр кьред хԝә контрол кьм.

Мьн хԝәндьне у леколинкьрьне тʹӧ щар һʹьз нәдькьр. Ләма жи ԝәʹде леколина Кʹьтеба Пироз, мьнрʹа чәтьн бу һʹьш-аԛьле хԝә бьдьм сәр. Ле мьн алийе хԝәда һәр тьшти дькьр кӧ ве йәкеда пешда һәрʹьм. Һеди-һеди һʹьзкьрьна мьн һьндава Йаһоԝа дьһа мәзьн дьбу, у дьле мьнда тьштәк һатә гӧһастьне, бәле исафа мьн һʹьшйар бу. Әз гәләк щар жь бо хԝә дьлтәнг дьбум, у дькʹәтьмә шьке кӧ гәло Йаһоԝа бона һʹәму зӧлмийа мьн һьндава мәрьва, ԝе бькарьбә бьбахшинә мьн. Ԝи ԝәʹдәйи, мьн дәрһәԛа Даԝьд дьхԝәнд, кӧ Йаһоԝа гӧнед ԝийи гьран бахшанд, у дьле мьн рʹьһʹәт дьбу (2 Самуйел 11:1–12:13).

Чәтьнайикә дьн бона мьн әԝ бу, кӧ мьнрʹа чәтьн бу мал бь мал хьзмәт кьм (Мәтта 28:19, 20). Чахе әз дьфькьрим дәрһәԛа ве йәке кӧ хьзмәтийеда әз дькарьм рʹасти ԝан бем, һьндава кʹеда мьн хьраби кьрьбу, тьрс дькʹәтә дьле мьн. Ле әз сәр хԝә гәләк дьхәбьтим у һеди-һеди әԝ тьрса мьн чу. Мьн ида шабунәкә мәзьн дьстанд жь ве йәке, кӧ али мәрьва дькьр дәрһәԛа Баве мәйи әʹзмана пебьһʹәсьн, йе кӧ бь дьл у щан дьбахшинә.

Әз сах мам, чьмки дәрһәԛа Йаһоԝа пеһʹәсийам. Һʹәчʹи зәʹф жь һәвалед мьнә бәре йан мьри нә, йан жи кәледа ньн, ле әз бь жийинәкә бәхтәԝар дьжим у гӧмана мьн бона ахьрийе һәйә. Әз һин бум мьлук, гӧһдар, у хԝәгьрти бьм у һерса хԝә контрол кьм. У мьн кʹарәкә мәзьн жь ве йәке станд. Әз ида һьндава мәрьвада һʹәйф ьм. Һьн жи әз зәԝащеда бәхтәԝар ьм, наве жьна мьнә дәлал Кармед ә. Әм тʹәвайи али мәрьва дькьн кӧ Кʹьтеба Пироз һин бьн у жь ве йәке әм шабуне дьстиньн.

Әз иро бь һʹәлали дьхәбьтьм. Щара хәбата мьн банкева гьредайи йә, ле әз ида нә кӧ бона шеландьне дьчьм ԝедәре, ле бона тʹәмьзкьрьне!