Һьнәк фьрԛийе дькьнә ортʹа мәрьва нә тʹәне жь бо мьләт, бәрәк йан зьмане ԝан, ле ӧса жи жь бо дин, һәбук у щьнсе ԝан. Һьнәк жи мәрийа сущдар дькьн жь бо салед әʹмьре ԝан, жь бо һинбун, кемаси, йан бәжьн-бала ԝан. Ле диса жи әԝана дьфькьрьн, ԝәки фьрԛийе накьнә ортʹа мәрьва.

Гәло тӧ жи фьрԛийе дьки ортʹа мәрьва? Гәләк жь мә дькарьн әԝе нәхԝәшийе нав мәрьвед дьнда тедәрхьн. Ле дькарә чәтьн бә әԝе йәке нав хԝәда бьвиньн. Бь рʹасти һәр кәс жь бо тьштәки фьрԛийе датинә ортʹа мәрьва. Професор Девид Ԝиллиамс дьбежә кӧ чахе мәрьв дәрһәԛа мәрьвед дьн хьраб дьфькьрьн, гава рʹасти ԝан тен «хԝә нәтʹәбийәти дьдьнә кʹьфше һьндава ԝанда, ле хԝәха әве йәке тедәрнахьн».

Мәсәлә, Әԝропайеда кʹидәре кӧ Щовик дьжи, кʹомәкә мәрьвайә бьчʹук һәйә, кʹижан кӧ гәләка хԝәш найе. Щовик дьбежә: «Әз дьфькьрим, ԝәки ве кʹомеда тʹӧ мәрьвәки баш тʹӧнә. Ле мьн тедәрнәдьхьст, кӧ әз бь ԝе йәке фьрԛийе дькьрьм нава мәрьва. Мьн һʹәсаб дькьр, кӧ әз рʹаст ьм».

Гәләк сәрԝер ԛануна дәрдьхьн, кӧ изьн тʹӧнә фьрԛийе бькьнә нава мәрьва. Ле диса жи әв проблем һәйә. Гәло чьма? Чьмки ԛанун дькарьн тʹәне кьред мәрьва контрол кьн, ле нькарьн фькьр у һәстед ԝан рʹаст кьн. Бь рʹасти әв хәйсәт-һʹӧнӧр жь һʹьш у дьле мәрийа пешда тен. Ле гәло дьбә әви хәйсәти жь дьле хԝә дәрхьн у жь ве нәхԝәшийе ԛәнщ бьн?