Кʹомәкә лекʹолинкʹара йа кӧ гӧһастьна һәԝайе лекʹолин дькә, тʹәви ԝе готьне рʹази йә. Һәрге һун баԝәр дькьн кӧ Хԝәде һәр тьшт әʹфьрандийә, һуне ӧса жи баԝәрийа хԝә ве йәке биньн, чь кӧ кʹомәкә зандара готийә, ԝәки Хԝәде әʹрд ӧса чекьрийә, кӧ әԝ хԝәха дькарә хԝә хԝәй кә.

Ле диса жи мәрьв зийанәкә ӧса мәзьн дьдьнә әʹрде, ԝәки тʹәне бь сайа просесед тʹәбийәте әԝ нькарә бе хԝәйкьрьне. Гәло чьма әм дькарьн баԝәр бьн, кӧ Хԝәде ԝе бона ве йәке хәм бькә?

Дина хԝә бьдьнә рʹезед жь Кʹьтеба Пироз, йед кӧ мә дьдьнә баԝәркьрьне ԝәки әʹрд нә кӧ ԝе кʹӧта бә, ле дьһа гәш бә.

• Хԝәде планета мә чекьрийә. «Дәстпебунеда Хԝәде әʹрд у әʹзман әʹфьрандьн» (Дәстпебун 1:1).

• Хԝәйе планета мә Хԝәде йә. «Дьнйа у һʹәму кәсед кӧ те дә нә ... йа Хӧдан ә [Йаһоԝа йә a]» (Зәбур 24:1, ИМ).

• Хԝәде планета мә ӧса чекьрийә, кӧ әԝ бе хԝәйкьрьне. «Тә әʹрд дани ль сәр бьнгәһ, кӧ тʹӧ щар жь щи нәһʹәжә» (Зәбур 104:5).

• Хԝәде соз дьдә, ԝәки әʹмьр сәр планете ԝе һʹәта-һʹәтайе бә. «Йе кӧ әʹрде чекьрийә у шькьл дайе, Йе кӧ асе кьрийә у вьквала нәәʹфьрандийә шькьл дайе кӧ ль сәр ԝәрә рʹуньштьн ӧса дьбежә: ‹Әз Хӧдан ьм у йәки дьн тʹӧнәйә›» (Ишайа 45:18).

• Хԝәде соз дьдә, ԝәки мәрьв сәр әʹрде ԝе һʹәта-һʹәтайе бьжин. «Йед рʹаст ԝәлат мирʹас дьстиньн, һәр у һәр ль ԝе дәре рʹудьньн» (Зәбур 37:29).

Хԝәде әʹрд ӧса әʹфьрандийә кӧ әԝ хԝәха дькарә хԝә хԝәй кә, ле тʹәне ԝи чахи һәрге бь сәрԝахти тʹәбйәте бьдьнә хәбате, ԝәки әԝ зийане нәстинә. Кʹьтеба Пирозда те готьне, кӧ Хԝәде ԝәʹде хԝәйи кʹьфшкьрида ԝе ԝан мәрьва кʹӧта кә, кʹе зийане дьдә планета мә (Әʹйанти 11:18).

Кʹьтеба Пироз соз дьдә, кӧ Хԝәде ԝе әʹрд бькә щьнәт у «һʹәму бинбәри гора дьле ԝан» хԝәстьна ԝан бинә сери (Зәбур 145:16).