Иса гот: «Мьләте р′абә ль сәр мьләт, п′адшати ль сәр п′адшатийа, щи-щийа ә′рдһ′әжед мәзьн, хәлайи-щәлайе у мина нәхԝәшийа һ′ал ԝе бьбьн, ль ә′змед жи тьштен хоф у тьрс у нишанед мәзьн ԝе бьԛәԝьмьн» (Луԛа 21:10, 11). Әм заньн ԝәки бь сайа хәзед сәр тʹьлийа, дькарьн тедәрхьн әԝ дәсте кʹе йә. Анәгори ԝе йәке бь сайа ԛәԝьмандьна, дәрһәԛа кʹижана Иса дьгот, әм дькарьн нишана һатьна Пʹадшатийа Хԝәде тедәрхьн. Гәло әв ԛәԝьмандьн ль тʹәмамийа дьнйайе гәрәке һәврʹа бьԛәԝьмийана? Ԝәрен әве йәке шеԝьр кьн.

1. ШӘРʹ

Сала 1914 шәрʹәки ӧса дәстпебу, кӧ сәр гәләк мәрийа у гәләк щийа һʹӧкӧм кьр, тʹәрихийеда тьштед ӧса нәԛәԝьминә! Тʹәрихзан гәләк щар дьбежьн, ԝәки сала 1914 тʹәрихийа инсанәте гӧһаст, чьмки әԝ шәрʹе һʹәмдьнйайе йа әʹԝльн бу. Ԝи шәрʹида һатьнә хәбьтандьне танк, бомбед һәԝе, газа жәрʹдәдайи у щурʹә-щурʹә чʹәкед хоф. Пәй ԝерʹа шәрʹе һʹәмдьнйайе йе дӧда дәстпебу, кʹидәре кӧ щара пешьн чʹәкед атоме данә хәбате. Жь сала 1914, шәрʹ пәй шәрʹрʹа дьԛәԝьмьн, жь бо чь жи бь милиона мәрьв тенә кӧштьне.

2. ӘʹРДҺӘЖ

Ль гора «Britannica Acadеmic», һәр сал ԝәкә 100 әʹрдһәжед ԛайим дьԛәԝьмьн, кʹижан кӧ «зийанәкә мәзьн» тиньн. Ӧса жи ль гора һʹәсабе «Geological Survеy» йа Ԝәлатед Йәкбуйи, «ль сәр һʹиме һʹәсабед сала 1 900», һәр сал дькарьн 16 әʹрдһәжед мәзьн бьԛәԝьмьн. Һьнәк дьфькьрьн ԝәки әʹрдһʹәж зедә нәбунә, ле бь сайа һьнә текʹникед тʹәзә, мәрьв дькарьн пешда ԝана тедәрхьн. Чь жи һәбә, әʹрдһʹәжед мәзьн кʹижан кӧ ль тәʹмамийа дьнйайе дьԛәԝьмьн, гәләк зийане у мьрьне тиньн.

 3. ХӘЛАЙИ-ЩӘЛАЙИ

Нав тʹәмамийа дьнйайеда хәлайи-щәлайи пешда тен жь бо шәрʹа, корупсийе, проблемед аборийева гьредайи у жь бо гәләк тьштед дьн. Һʹәсабе Бәрнама Хԝарьнейә Һʹәмдьнйайеда «йа Сала 2018» һатьбу готьне: «Тʹәмамийа дьнйаеда һʹале 821 милион мәрьва ӧса хьраб ә, кӧ әԝана дькарьн бьрʹчи бьминьн. Ле 124 милион мәрьв ида бьрʹчибунеда ньн». Жь бо кемасийа хԝарьне һәр сал ԝәкә 3.1 милион зарʹ дьмьрьн. Сала 2011-да, әв бу мәʹнийа сәрәкә, кӧ ԝәкә 45 сәләф зарʹ сәр тʹәмамийа дьнйайе мьрьн.

4. НӘХԜӘШИЙЕД ҺʹАЛ

Һʹәсабе «Организасийона Сахләмхԝәйкьрьнейә Һʹәмдьнйайе» ӧса әʹйан дькә: «Ԛьрна 21 ида бь чәнд нәхԝәшийед һʹал әʹйан ә. Нәхԝәшийед кәԝьн жи диса пешда һатьнә, йед ӧса ча кʹоләра, мьрьна рʹәш у тʹайа зәр. Хенщи ԝе йәке нәхԝәшийед тʹәзә пешда һатьнә, мәсәлә САРС у МЕРС нәхԝәшийед пʹьшькава гьредайи, ӧса жи вирусед хоф ча Әбола у Зика». Öса жи пандемийа COVID-19. Рʹаст ә зандар у дохдьр гәләк тьшт пеһʹәсийанә дәрһәԛа ԝан нәхԝәшийа, ле диса жи әԝана нькарьн ԝан һʹәму нәхԝәшийа ԛәнщ кьн.

5. БӘЛАКЬРЬНА МЬЗГИНИЙЕ СӘР ТʹӘМАМИЙА ДЬНЙАЙЕ

Чахе Иса дәрһәԛа рʹожед ахьрийе пʹехәмбәрти дькьр, әԝи нишанәк жи әʹйан кьр: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14). Рʹаст ә дьнйайеда гәләк тьштед хьраб дьԛәԝьмьн, ле диса жи һʹәйшт милион мәрьва зедәтьр жь һәр мьләти, 240 ԝәлатада ль сәр 1 000 зьмана зедәтьр, мьзгинийа хере дәрһәԛа Пʹадшатийа Хԝәде бәла дькьн. Тьштед ӧса мәзьн тʹәрихийа инсанәтеда нәԛәԝьмийә.

Әв һʹәму тьштед кӧ Иса пʹехәмбәрти кьр, иро тенә сери. Ле чьма әв йәк сәва мә фәрз ә? Чьмки Иса гот: «Гава һун бьбиньн кӧ әв йәк дьԛәԝьмьн, бьзаньбьн кӧ Пʹадшатийа Хԝәде незик ә» (Луԛа 21:31).

Бь сайа нишан у кʹроноложийа Кʹьтеба Пироз әм дькарьн фәʹм бькьн, ԝәки Пʹадшатийа Хԝәде сала 1914-да a ль әʹзмед һатә кʹьфшкьрьне. Ԝи чахи Хԝәде, Кӧрʹе хԝә Иса Мәсиһ, кьрә Пʹадша (Зәбур 2:2, 4, 6-9). Зутьрәке Пʹадшатийа Хԝәде дәстпекә сәр әʹрде сәрԝертийе бькә, у әԝе һʹәму сәрԝертийед мәрьва бьдә һьлдане у әʹрде бькә щьнәт, ԝәки мәрьв ль сәр һʹәта-һʹәтайе бьжин.

Демәк, дӧакьрьна Иса дәрһәԛа Пʹадшатийа Хԝәде, ԝе зутьрәке бе сери: «Пʹадшатийа тә бе, әʹмьре тә бә, чаԝа ль әʹзмен, ӧса жи ль сәр әʹрде» (Мәтта 6:10). Гәло дәстпебуйи жь сала 1914, Пʹадшатийа Хԝәде чь кʹаре тинә? У әме чь кʹәрәма бьстиньн, чахе Пʹадшатийа Хԝәде бь тʹәмами сәр инсанәте сәрԝертийе бькә?