ТʹӦ КӘС һаԛас һʹәԝще хԝәйкьрьне нинә, чьԛас кӧ зарʹа тʹәзәбуйи. Чахе әм дьне кʹәтьн, хԝәйкьрьна мә бь тʹәмами де-баве мәва гьредайи бу. Чахе әм тʹәзә һин дьбун кӧ рʹе һәрʹьн, у гава әм рʹасти мәрьвед нәнас дьһатьн, әԝана мәрʹа тәʹрьки дьһатьнә кʹьфше. Де-баве мә кӧ бал мә нибуна, әм жь ԝана дьтьрсийан. Ле чахе дәсте мә дәсте де йан баве мәда бу, мә хԝә бехоф у хԝәйкьри тʹәхмин дькьр.

Ԝәʹде зарʹотийе, һʹалхԝәшийа мә гьредайи бу ве йәкева, кӧ де-баве мә әм һʹьз дькьрьн у дьлгәрм дькьрьн. Чахе мә фәʹм кьр кӧ де-баве мә, мә һʹьз дькьн, мә хԝә хԝәйкьри тʹәхмин дькьр. У чахе ԝана пʹайе мә дьдан у мәрʹа ша дьбун кӧ әм тьштед баш дькьн, әм һе зедә хԝәда гӧман бун у пешда дьчун.

Чахе әм һьнәки мәзьн бун, мә бь сайа һәвалед хԝәйи незик жи, хԝә хԝәйкьри тʹәхмин дькьр. Мә хԝә рʹьһʹәт тʹәхмин дькьр, чахе әԝана тʹәви мә бун, у бь сайа ԝана мәкʹтәбеда мә хԝә бепьшт тʹәхмин нәдькьр.

Бәле, зарʹотийа ӧса хԝәш ә у ләзәт ә. Ле йазьх, иро гәләк щаһьл нькарьн хԝәрʹа һәвалед незик бьвиньн, у һьн жи әԝана жь де-бава хԝәйтийе у һʹьзкьрьне навиньн. Мелиса * дьле хԝә вәдькә у дьбежә: «Тʹьме чахе әз шькьлед малбәтед ӧса дьньһерʹьм, кӧ йәктийеда ньн у тьшта тʹәвайи дькьн, әз хԝәрʹа дьфькьрьм: ‹Хԝазьла чахе әз бьчʹук бум, мьн жи әԝ шабун бьдита›». Дьбәкә һун жи ӧса тʹәхмин дькьн.

Тӧ чахе щаһьл буйи, дьбәкә тӧ бь тʹәмами хԝәда гӧман нибуйи. Чьмки дьбәкә тә һʹьзкьрьн у дьлгәрми кем дьстанд. Дьбәкә те бира тә, кӧ ча де-баве тә тʹьме шәрʹ-дәʹԝ дькьрьн, у ахьрийеда жь һәв ԛәтийан, у тә ве йәкеда хԝә жи нәһәԛ дькьр. Йан жи һе хьраб, дьбәкә де йан баве тә бь гьлийа йан бь ледане тӧ дешандьн.

Дәрәщед ӧса ча сәр һьнә зарʹа һʹӧкӧм дьбә? Һьнәк жь ԝан ԝәʹде щаһьлтийе наркотикайе дьдьнә хәбате, йан пәй ичʹке дьчьн. Һьнәк жи пәй мәрьвед хьраб дьчьн, чьмки дьфькьрьн кӧ әԝ мәрьв дькарьн хԝәйитийе ԝан бькьн. Һьнәк жи һәләԛәтийа романтик дәстпедькьн, чьмки һʹьзкьрьне у дьлгәрмкьрьне дьгәрʹьн. Ле жь ԝан һәләԛәтийа һʹәчʹи зәʹф гәләк ԝәхт накʹьшиньн у әԝана һәвдӧ дьԛәтьн. У жь бо ве йәке әԝана һе зедә хԝә бехԝәйи тʹәхмин дькьн.

 Һьнәк щаһьлед кӧ хԝә бехԝәйи тʹәхмин дькьн, дьбәкә шашийед ӧса нәкьн, ле әԝана хԝә бекер һʹәсаб дькьн. Ана гьли дькә: «Әз баԝәр бум кӧ әз керһати ниньм, чьмки дийа мьн әԝ йәк тʹьме у тʹьме мьнрʹа дьгот. Ԛә найе бира мьн, ԝәки дийа мьн пʹайе мьн дайә йан жи һʹьзкьрьн мьнрʹа дайә кʹьфше».

Тʹәне ԝәʹде щаһьлтийе нинә кӧ мәрьв дькарә хԝә бехԝәйи тʹәхмин кә. Гәләк хԝә бехԝәйи тʹәхмин дькьн чахе һәв дьԛәтьн, чәтьнайа дьвиньн ԝәʹде кал-пир дьбьн, йан жи кӧ хԝә рʹува бәгәм накьн. Фьрԛи тʹӧнә мәʹни чь йә кӧ мәрьв хԝә бехԝәйи тʹәхмин дькә, йәкә әԝ һәст наһелә кӧ мәрьв бәхтәԝар бә у һәләԛәтийа мәрьва тʹәви йед дьн хьраб дькә. Ле гәло әм чь дькарьн бькьн сәва кӧ хԝә ӧса тʹәхмин нәкьн?

Әм гәрәке бьзаньбьн кӧ аликʹари һәйә. Һәйә кәс, кӧ дькарә у һьн жи дьхԝазә али мә һʹәмушка бькә. Әԝ кәс һәйә хԝәха Хԝәде.

Хԝәде бь Ишайа пʹехәмбәр әԝан гьлийа дьбежә мә: «Тӧ нәтьрсә, жь бәр кӧ әз бь тәрʹа мә; ль дора хԝә нәньһерʹә, жь бәр кӧ Хԝәдайе тә әз ьм; әзе тә зәхм бькьм; бәле, әзе али тә бькьм; бәле, әзе бь дәсте рʹасте дадийа хԝә жь тәрʹа бьбьм аликʹар!» (Ишайа 41:10, 13). Чьԛас мә дьлгәрьм дькьн әԝ гьли, кӧ Хԝәде бь симболик дәсте мә дьгьрә! Мәрʹа ԛә нә лазьм ә кӧ хәмгин бьн!

Кʹьтеба Пирозда дәрһәԛа хьзмәткʹаред Хԝәде те гьликьрьне, йед кӧ хәмгин бун у дьлтәнг бун, ле әԝана һин бун кӧ хԝә ль Хԝәде бьгьрьн. Һанна, дийа Самуйел, дьлтәнг дьбу, чьмки зарʹ жерʹа нәдьбун. Гәләк щар ԛәрф ԝе дькьрьн жь бо кемасийа ԝе. Ләма, мәʹде Һаннайе тʹӧнә бу кӧ хԝарьне бьхԝә у гәләк щар дьгьрийа (1 Самуйел 1:6, 8). Ле паши ве йәке чахе Һаннайе дьле хԝә Хԝәдерʹа вәкьр, әԝ ида бәрхԝә нәдькʹәт у дьлтәнг нибу (1 Самуйел 1:18).

Даԝьде зәбурбеж жи щара гәләк хәмгин дьбу. Бь сала, Шаԝул Пʹадша пәй ԝи дькʹәт. Даԝьд чәнд щара жь мьрьне хьлаз бу, у щара әԝи тʹәхмин дькьр кӧ жь проблемед хԝә хьлаз набә (Зәбур 55:3-5; 69:1). Ле йәкә Даԝьд ньвиси: «Әзе бь ашти хԝә вәзәлиньм у ракʹәвьм, чьмки тʹәне тӧ, йа Хӧдан, дь әԝләһийеда мьн дьди рʹуньштьн» (Зәбур 4:8, ИМ).

Һаннайе у Даԝьд баре хԝә данә Йаһоԝа, у әԝана избат бун кӧ Хԝәде али ԝан кьр (Зәбур 55:22). Ле иро әм ча дькарьн баре хԝә бьдьнә Хԝәде?

1. Итʹбарийа хԝә Йаһоԝа биньн, чаԝа Бав.

Иса мә һелан дькә кӧ әм Баве ԝи, демәк «Хԝәдейе рʹасти» нас кьн (Йуһʹәнна 17:3). Паԝлосе шанди мә дьдә баԝәркьрьне кӧ «Хԝәде жь мә һәр кәси нә дур ә» (Кʹаред Шандийа 17:27). Аԛуб ньвиси кӧ «незики Хԝәде бьбьн, әԝ жи ԝе незики ԝә бьбә» (Аԛуб 4:8, ИМ).

Сәва кӧ хәмгин нәбьн, тʹьме гәрәке бира мәда бә, кӧ Баве мәйи әʹзмана һәйә, кʹижан кӧ мә һʹьз дькә у дәрһәԛа мә хәм дькә. Һьлбәт ԝәʹдә лазьм ә кӧ мәрьв итʹбарийа хԝә Хԝәде бинә. Ле гәләк мәрьв избат бунә, кӧ һежа йә итʹбарийа хԝә Хԝәде биньн, чьмки ӧса мәрьв ида хәмгин набә. Каролин дьбежә: «Чахе мьн Баве хԝә Йаһоԝа нас кьр, мьн ԛазанщ кьр әԝ кәс, кʹижанирʹа әз дькарьм дьле хԝә вәкьм. У әԝ йәк мьнрʹа рʹьһʹәти ани!»

Рейчал гьли дькә: «Чахе әз тʹәне бе де-бав мам, Йаһоԝа али мьн кьр кӧ әз хԝә архайин тʹәхмин кьм. Мьн карьбу тʹәви ԝи хәбәрдьм у аликʹарийе жь ԝи бьхԝазьм ԝәʹде проблема. У әԝи али мьн дькьр». *

2. Бьбьнә әндәмед малбәта рʹӧһʹани.

Иса шагьртед хԝә һин дькьр кӧ бьфькьрьн дәрһәԛа һәвдӧ чаԝа хушк у бьра. Әԝи готә ԝан: «Һун һʹәму жи бьра нә» (Мәтта 23:8). Иса дьхԝаст кӧ шагьртед ԝийи рʹаст һәвдӧ һʹьз бькьн у бьбьнә чаԝа малбәта мәзьнә рʹӧһʹани (Мәтта 12:48-50; Йуһʹәнна 13:35).

Сәр щьватед Шәʹдед Йаһоԝа гьшк бь дьл у щан дьхәбьтьн, кӧ малбәта рʹӧһʹанида дьлбини у дьлгәрмийе һәвдӧрʹа бьдьнә кʹьфше (Ибрани 10:24, 25). Гәләк избат бунә, кӧ щьват һәйә чаԝа дәрман, кʹижан кӧ бьринед емосйали ԛәнщ дькә.

Ева гьли дькә: «Дь щьватеда һәваләкә мьнә незик һәбу. Әԝе дәрде мьн фәʹм дькьр. Әԝе гӧһ дьда мьн, рʹезед жь Кʹьтеба Пироз мьнрʹа дьхԝәнд у бона мьн дӧа дькьр. Әԝе әз дамә баԝәркьрьне кӧ әз тʹәне ниньм. Әԝе али мьн кьр, кӧ мьн дьле хԝә жерʹа вәкьр у барәки гьран ль сәр мьн һатә һьлдане. Әз гәләк рʹази мә бона аликʹарийа ԝе, чьмки әз ньһа хԝә һе хԝәйкьри тʹәхмин дькьм». Рейчал дьбежә: «Дь щьватеда мьн хԝәрʹа де жи дит у бав жи. Ԝана али мьн кьр кӧ мьн хԝә һʹьзкьри тʹәхмин дькьр у әз архайин бум».

 3. Һʹьзкьрьне у ԛәнщийе бьдьнә кʹьфше.

Һәрге әм һʹьзкьрьн у ԛәнщийе бьдьнә кʹьфше, һәвалтийа мә ԝе дьреж бә. Иса гот: «Хԝәзи ль дайийа, нә кӧ ль стандийа» (Кʹаред Шандийа 20:35). Бешьк, әм дьвиньн кӧ әм чьԛас зедә һʹьзкьрьне бьдьнә кʹьфше, һаԛас зедә әме һʹьзкьрьне бьвиньн. Иса шагьртед хԝәрʹа гот: «Бьдьн, ԝәрʹа ԝе бе дайине» (Луԛа 6:38).

Чахе әм һʹьзкьрьне дьдьн у дьстиньн, әм хԝә дьлрʹьһʹәт у хԝәйкьри тʹәхмин дькьн. Чаԝа кӧ Кʹьтеба Пироз дьбежә: «Һʹьзкьрьн тʹӧ щар кʹӧта набә» (1 Корьнтʹи 13:8). Мариа дьбежә: «Әз дәрһәԛа хԝә хьраб дьфькьрьм, ле әз заньм кӧ әԝ йәк нәрʹаст ә. Әз жь ԝан фькьра хьлаз дьбьм бь ԝе йәке, кӧ әз али мәрьвед дьн дькьм у дәрһәԛа ԝан дьфькьрьм, у ләма дәрһәԛа хԝә кем хәмгин дьбьм. Әз тʹьме хԝә дьлрʹьһʹәт тʹәхмин дькьм, чахе али мәрьвед дьн дькьм».

Әԝ се тьшт кӧ жоре һатьнә готьне, дәрберʹа рʹьһʹәтийе мәрʹа найньн, ле йәкә әԝ гӧһастьнед мәзьн дькьн. Каролин дьбежә: «Әз һәла һе хԝә нәрʹьһʹәт тʹәхмин дькьм. Ле ньһа әз ԛәдьре хԝә заньм. Әз заньм ԝәки хԝәде бона мьн хәм дькә, у гәләк һәвалед мьнә незик һәнә кӧ али мьн дькьн, у әз хԝә рʹьһʹәт тʹәхмин дькьм». Рейчал жи сәр хԝә ӧса тʹәхмин дькә. Әԝ дьбежә: «Щар-щара әз гәләк мәʹдәкьри мә. Ле щьватеда хушк у бьре мьнә рʹӧһʹани һәнә, жь кʹижана әз дькарьм ширәта һьлдьм у аликʹарийе бьстиньм, кӧ бь позитив сәр тьшта бьньһерʹьм. У йа лапә фәрз, Баве мьни әʹзмана һәйә, тʹәви кʹижани кӧ әз дькарьм һәр рʹож хәбәрдьм. Әԝ йәк һʹәму тьшт дьгӧһезә».

Диса чʹарәк әԝ ә кӧ ԝе хьлазийа хофийе у нәрʹьһʹәтийе бе. Кʹьтеба Пироз дьбежә кӧ дьнйа тʹәзә ԝе бе, кʹидәре кӧ һәр кәс жь мә ԝә бехоф у рʹьһʹәт бьжи. Хәбәра Хԝәде соз дьдә мә: «Ле бәле дә һәр кәс дь бьн меԝа хԝәда у дь бьн даре хԝәйи һежиреда рʹунен у йе кӧ ԝан бьтьрсинә тʹӧнә бә» (Миха 4:4). Һьнге тʹӧ кәс ԝе ӧса нәкә кӧ әм хԝә бехԝәйи тʹәхмин кьн у ԝе тʹӧ кәс зийане нәдә мә. Һәла һе дәрдед гьран жи, ԝе нәкʹәвьнә бира мә (Ишайа 65:17, 25). Хԝәде у Кӧрʹе ԝи Иса Мәсиһ, ԝе «рʹастийе» биньн сәр әʹрде. Ахьрийеда, һʹәта-һʹәтайе ԝе рʹьһʹәти у бехофи һәбә (Ишайа 32:17).