Щәм тә ԛә ӧса ԛәԝьмийә, ԝәки кәсәк шине дькьр у тә нькарьбуйә аликʹарийе бьди ԝи? Щарна әм ньзаньн чь бежьн у чь бькьн, ләма жи әм хԝә кәр дькьн. Ле һьнә тьштед керһати һәнә, чь кӧ әм дькарьн бькьн.

Щарна лазьм ә, ԝәки тӧ тʹәне бал ԝи мәрьви би у ԝирʹа әʹйан ки кӧ чьԛас сәва ве йәке бәрхԝәдькʹәви. Мәсәлә дь гәләк културада ӧса нә: һәрге тӧ мәрьв һʹәмез ки йан жи дәсте хԝә бьди сәр мьле ԝи, ӧса тӧ хәмгинийа хԝә дьди кʹьфше. Һәрге мәрьве кӧ шине дькә, дьхԝазә тʹәви тә хәбәр дә, гӧһ бьдә ԝи. Ӧса жи ԝе баш бә, һәрге тӧ хԝарьне сәва ԝи мәрьви һазьр ки, мьԛати зарʹед ԝи би, йан жи аликʹарийе бьди шьхӧлед дьнда, һәрге әԝ дьхԝазә. Шьхӧлед ӧса ԝе даһа керһати бьн, нә кӧ пʹьрʹхәбәрийа мә.

Щарна тӧ дькари дәрһәԛа мьрийед ԝан хәбәр ди у дина хԝә бьди һьнә хәйсәтед ԝанә баш йан ԛәԝьмандьнед һʹәԝас. Хәбәрдана ӧса дькарә ша кә мәрьве дьлтәнг. Бәʹса хәбәре, Пем йе кӧ шәш сал пешда мере хԝә Ийан ӧнда кьр, дьбежә: «Щарна мәрьв мьрʹа тьштед ӧса баш дәрһәԛа Ийан гьли дькьрьн, чь кӧ мьн ньзаньбу. Әв йәк мьн дьлрʹьһʹәт дькьр».

 Гәләк щара мәрьве дьлтәнг, жь һәвалед хԝә дәрбера аликʹарийе дьстинә. Ле йазьх, паше һәвалед ԝи жь бо шьхӧлед хԝә, зу бир дькьн һʹәԝщед ԝи. Бьхәбьтә сәр ве йәке, ԝәки тʹәви мәрьве дьлтәнг текли би. * Мәрьве дьлтәнг гәләк әве йәке дьшекьринә, чьмки ӧса әԝ дькарә еша дьле хԝә һьнәки сьвьк кә.

Ԝәрен мәсәла Каори бьньһерʹьн, кʹӧлфәта кӧ дь Жапонийеда дьжи. Әв гәләк дьлтәнг бьбу чьмки әԝе дийа хԝә ӧнда кьрьбу у паши 15 мәһа хушка хԝә жи ӧнда кьр. Һәвалед ԝейә амьн, тʹьме бәр дьле ԝеда дьһатьн. Кʹӧлфәтәкә бь наве Ритсуко, готә Каори, ԝәки дьхԝазә бьбә һәвала ԝейә незик. Каори дьбежә: «Бь рʹасти бежьм, жь бо ԝе йәке әз ша нәбум. Мьн нәдьхԝәст кӧ кәсәк дәԝса дийа мьн буйа. Ле Ритсуко Де, гәләк тʹәви мьн назьк бу у жь бо ԝе йәке әз незики ԝе бум. Һәр һʹәфти әм тʹәвай дәрдькʹәтьнә хьзмәте у тʹәвай жи дьчунә щьвате. Әԝе әз тʹәглиф дькьрьм сәр чай, хԝарьн мьнрʹа дьани у гәләк щара нәʹмә мьнрʹа ледькьр. Ньһерʹандьна рʹаст йа Ритсуко Де, баш ль сәр мьн һʹӧкӧм кьр».

Жь мьрьна дийа Каори, ида донздәһ сал дәрбаз бу. Иро Каори тʹәви мере хԝә ԝәк пешәнге һәртʹьм хьзмәт дькә. Каори дьбежә: «Ритсуко Де, диса жи дәрһәԛа мьн хәм дькә. Чахе әз ԝәдьгәрʹьм шәһәре хԝә, әз тʹьме дьчьмә щәм ԝе у ләзәтәкә мәзьн дьстиньм жь һәвалтийа ԝе».

Диса мәсәләк һәйә дәрһәԛа Поли, йа кӧ Шәʹде Йаһоԝа йә у хԝәха жь Кипрусе йә. Әԝе жи аликʹарийа мәзьн стандьбу жь һәвала. Мере Поли, бь наве Созос мәрьвәки баш бу. Әԝ ча шьване Мәсиһи, мәсәләкә баш һишт ԝе йәкеда кӧ гәләк щара жьнәби у зарʹед етʹим, ль сәр хԝарьне тʹәглифи мала хԝә дькьр, сәва кӧ ԝәʹдә дәрбаз кьн (Аԛуб 1:27). Йазьх, ле чахе әԝ 53 сали бу, әԝи мьр жь бо гьре кӧ сәре ԝида дәркʹәтьбу. Поли дьбежә: «Мьн мере хԝәйи амьн ӧнда кьр, тʹәви кʹижани кӧ әз ԝәкә 33 сала зәԝащеда бум».

Паши чʹәлкьрьне, Поли тʹәви кӧрʹе хԝәйи 15 сали, бь наве Данийел, дәрбази Канаде бу. Ль ԝьр ԝана дәстпекьр тʹәви щьватәкә Шәʹдед Йаһоԝа шьхӧлкʹарийе бькьн. Поли тинә бира хԝә: «Һәвалед жь щьвата мәйә тʹәзә, тʹӧ тьшт ньзаньбун дәрһәԛа дәрәщед чәтьн кӧ жийина мәда һәбун. Ле йәкә әԝана тʹьме незики мә дьбун у әм һʹәмез дькьрьн. Әԝана гьлийед һеланкьрьне мәрʹа дьготьн у аликʹарийа керһати жи дьдан. Бь рʹасти жи аликʹарийа ԝан, ԝи чахи ԝәʹдәда бу, чьмки һьнге кӧрʹе мьн гәләк һʹәԝще бав бу! Бьред щабдар һьндава Данийел гәләк дьлован бун. Мәсәлә чахе әԝана тʹоп дьбун, гази Данийел жи дькьрьн кӧ тʹәви ԝан ԝәʹдә дәрбаз кә, йан футболе бьлизә». Иро де у кӧрʹ, хԝә баш тʹәхмин дькьн.

Бь һʹәлали бежьн, гәләк мәщал һәнә кӧ чаԝа әм дькарьн аликʹарийа керһати бьдьнә мәрьвед дьлтәнг у бәр дьле ԝанда бен. Кʹьтеба Пироз жи дьлбиникә мәзьн дьдә мә у созе баш дәрһәԛа ахьрийе.