Sayi munzangala amwixana Willi, wambe kiki: “Eye se kwijiye o ukexilu watokala wa kutanga, o Bibidya itena kukukumisa.”

 Wamesena kwijiya kyebhi ki utena kuwabhela kutanga o Bibidya? O milongi yiyi yandakukwatekesa.

•  Bhangesa o Mikanda Ikôla kukala divulu dya mwenyu

•  Tokwesa!

•  Ihi yamba o minzangala ni akwenu

 Kana kulanduka, ta o muxima wé mu yoso iwamutanga. Utena kukayela o jindunge jiji:

1.   Sola musoso wa Bibidya u wamesena o kudilonga. Utena kusola kutanga kizulukutu kya Bibidya mba mbandu yatokala mu madivulu azwela yalungu ni Jezú mba utena hanji kusola misoso yongalavale kya mu ukexilu wa drama, misoso yala mu jw.org.

2.   Tanga o musoso. Tanga-u eye mwene mudyé mba tanga-u kumoxi ni makamba mba mwiji, tangenu-u ni dizwi dya swina. Muthu umoxi utanga o mbandu ya mukwa musoso mba narrador, athu amukwa a tanga o izwelu yengi imoneka mu musoso.

3.   Ku jindunge jala kulwiji, fikisaku ndunge imoxi mba jiyadi:

   •   Bhanga jifikula phala kujimbulula o musoso. Mba bhanga tudezenyu mba jifikula phala kulombolola o izulukutu, kutunda kizulukutu kwiza kizulukutu. Soneka tu izwelu phala kujimbulula ihi yamubhita mu jifikula.

   •   Bhanga diagrama. Mu kifika, kyoso kiwandaya ni kutanga yalungu ni muthu wa fiyele, sokesa o idifwa ya muthu mwenyú, yoso yabhange mwene, u isokesa ni mabesá yatambula mwene.

   •   Bhangesa o musoso kukituka jihundu. Tanga o musoso mu maukexiu avulu, kala “kwibhwidisa athu” mba kubhanga entrevista ku athu abeta kuatambula mu musoso ni yo ala jimbangi.

   •   Se muthu umoxi amutumbula mu musoso, kasolo kyambote, xinganeka ihi yejibhita se mwene wasolele kima kyengi. Mu kifika, kwata o musoso wa Phetele waditunu Jezú. (Máluku 14:66-72) Hinu ihi yeji bhanga Phetele kyoso kyamujijidika?

   •   Twejiya kwila yabhonzo maji se utena, soneka drama yé mu kukayela o musoso wa Bibidya. Soneka we o madisá ututena o kudilonga ku musoso yú.—Loma 15:4.

 Se utokwesa mwen kyambote katé ni tuima twofele twalungu ni musoso, wandatena kudilonga ima yavulu ku musoso. Sayi bhabha, kizwelu kimoxi mba izwelu iyadi imoneka mu musoso wa Bibidya, ikala ni valolo yavulu.

 Mu kifika, sokesa Matesu 28:7 ni Máluku 16:7.

•    Mukonda dyahi Máluku wasoneka kwila Jezú weji moneka ku maxibulu mê yu wambe dingi kwila “ni Phetele”?

•  Ndunge: Máluku kakexilemu kyoso kyabhiti o izulukutu yiyi; Phetele nange mwéne wamutangela o maka yá.

•  Milongi ya katunda: Mukonda dyahi Pethele wadivu kyambote mu kwivwa kwila Jezú wamesenene kudisanga ne dingi? (Máluku 14:66-72) Kyebhi Jezú kyalondekesa kwila wexile dikamba dya kidi phala Phetele? Kyebhi kiuena kukayela Jezú mu kukala u dikamba dyambote phala akwenu?

 Kyoso kiubhangesa o misoso mu Mikanda Ikôla kukala ni mwenyu, ni kutokwesa katé ni tuima twofele, o kitangelu kya Bibidya kitowala dingi!