A ngi vualela, ia a ngi sase mu jinzala mu ixi ia Loma, mua tungile athu exile jingadiama. O ima ia bhonzele kiavulu. Ki ngejiia’mi manh’etu, eme ni tat’etu ki tuexile tu makamba. Nga di longo o ku dikila o ibhindamu iami mu ikoka.

Nga mateka o ku nhana, kioso ki nga tenesa dikuinhi dia mivu. Mu kitala kia 12 nga xisa o dibhata dia tat’etu mu veji ia dianga. O xiku dia ngoji akexile mu ngi kuata veji javulu, tat’etu ua kexile mu ngi bhulula. Nga kexile mu bhanga jinvunda ni athu izuua ioso—ng’exile ngi kindanda ni ku di kuata ni athu oso. Ki nga tenesa 14 dia mivu, nga xisa o dibhata dia tat’etu sé dingi ku banza o ku vutuka. Nga mateka o ku buakula ni ku zeka mu ikoka. Kuma ki ngi kexile ni kididi kia ku zeka, nga kexile mu zeka mu makalu katé ki kukia. Eme nga kexile mu sota tu menha phala ku di sukula.

Nga kexile ni masunga avulu a ku nhana—kima kioso-kioso mu jimbuenga ja athu, mu jinzo ni mu jisanzala mu usuku. Athu a ngi jidile kala ngi muthu ua iibha, mu ku bhita kithangana a ngi xana phala ku kala mu kibuka kia jibandi, kia ngi “bhangesa” o ku nhana kitadi mu ji bangu. Kuma ng’exile ngi kindanda, athu oso mu kibuka akexile mu ngi xila. Nga kexile mu kuambata o uta uami mu ididi ioso; katé ni mu ku zeka, nga kexile mu u ta ku mutuelu. O jinvunda, kangonha, ku nhana, ku xinga ni undumbu, íii o ima i nga kexile mu bhanga ku muenhu uami. O xiku dia ngoji a kexile mu ngi sota izuua ioso. A ngi kutu veji javulu ni ku bhita mivu iavulu mu kaleia.

Saí kizuua kioso ki nga tundu mu kaleia, ngai mu kunda sekaji’ami. Sé eme ku kijiia, mbé o sekaji’ami ni tuana tuê tuiadi, exile Jimbangi ja Jihova. A ngi xana phala kuia mu kiônge kumoxi ni ene. Ngai phala ku mona ngó kioso kia  bhanga o iônge iâ. Kioso ki tua bhixila mu Kididi kia Ubhezelu, nga jijile o ku xikama bhu muelu phala ku mona uoso u bokona ni uoso u tubhuka. Nga kexile ni uta uami.

O kiônge kieniókio kia lungulula o muenhu uami. Nga divuile kala nga kexile mu ixi iéngi! O athu a ngi tambulula kiambote, ni henda ni ku sanguluka kuoso. Nga mu di lembalala hanji o ukexilu ua zele ni ua sanguluka ua Jimbangi ja Jihova. Ki u difuile ni ukexilu ua muenhu uami!

Nga mateka o ku di longa ni Jimbangi ja Jihova. Mu ku di longa kuami, nga mono kuila nga tokalele ku lungulula o ukexilu uoso ua muenhu uami. O izuelu i tu sanga mu divulu dia Jisabhu 13:20, ia ngi tula ku muxima, iambe: “Uoso uenda ni jinjimu, u biluka njimu; uoso-phe u kala kamba dia ku kaiela o ioua, kanange kukituka kala ene.” Nga mono kuila nga bhingile ku batula o ukamba uami ni kibuka kiami kia jibandi. Kia ngi bhonzele kiavulu maji Jihova ua ngi kuatekesa.

Nga lungulula o ukexilu uami. Nga bhange ioso phala kueha o makanha ni kangonha. Nga bhutu o ndemba, nga katula o jibixa, eme nga xisa ué ku xinga jindaka. Kiene ki nga mateka o kuendesa kiambote o muenhu uami.

Eme ki ngi uabhele o ku tanga ni ku di longa, mukonda dia kiki, kia ngi bhonzele kiavulu ku ta o muxima uami mu milongi ia Bibidia ni ku i kumbidila. Maji mu ku bhanga nguzu, nga mateka o ku zola Jihova anga kima moxi diami kia mateka o ku lungulula—o kitongoluelu kiami kia mateka o ku ngi fundisa. Nga kexile ni ibanzelu ia iibha ia lungu n’eme, ki ngi xikinine ué kuila Jihova ueji loloka o ima ia iibha i nga bhangele m’ukulu. Mu kithangana kieniókio, nga divu kiambote ku tanga mu Bibidia kiebhi Jihova kia lolokele Sobha Davidi kioso kia tele ituxi iavulu.​—2 Samuuele 11:1–12:13.

O kibhidi kia mukuá kia lungile ni ku bokela akuetu o mak’â Nzambi, mu inzo ni inzo. (Matesu 28:19, 20) Nga kexile ni uôma ua ku di sanga ni muthu u nga mu kuamene mba nga mu bhangele kia iibha m’ukulu! Maji bhofele-bhofele, nga tolola o uôma iú. Nga sangulukile kiavulu mu ku kuatekesa akuetu kuijiia Tat’etu ia kazola uene mu diulu u loloka ni kidi kioso.

O kuijiia Jihova, kua bhulula o muenhu uami! Athu avulu nga kexile mu kuenda nau m’ukulu, saí iá afu kiá, a mukuá ala mu kaleia maji eme nga zediua, ngala ni kidielelu. Nga di longo o ku lenduka, ku belesela ni ku tululuka mu ku dibhana ni akuetu. Mukonda dia kiki, ngala ni ukamba uambote ni athu mua’xaxi kami. Nga sanguluka ué mu ku kazala ni muhatu ua uabha, Carmen. Tu sanguluka kiavulu mu ku kuatekesa o athu ku di longa o Bibidia.

Ki ngene mu nhana dingi, ngi mukalakadi uambote—saí izuua ngi kalakala mu jibangu maji ki phala ku nhana-mu maji phala ku xixila-mu!