YOMARA ni jiphange jê jiyadi, Marcelo ni Hiver, atungu mu sanzala ya mbanza ya Guatemala. Yomara wamateka kudilonga o Bibidya ni Jimbangi ja Jihova, mukusuluka o jiphange jê amateka we kudilonga. Maji kwexile maka. Kitatu kya exile ifofo, ene kejidile kutanga ni kusoneka mu ukexilu wa ifofo. Mu kiki o phange wexile mudilonga nawu o Bibidya, mwene wexile mutanga o jikaxi ni jivelusu joso ja Bibidya ja madisá oso.

Phala kuya mu yônge, kwexile mumoneka ibhidi ya mukwa. Ene kejitena kwenda mu 40 a ithangana phala kubhixila ku Kididi kya Ubhezelu kya zukama ku mbandu ya inzo yâ. Maji o jiphange exile mwakwatekesa phala kuya mu yônge yoso. Kyoso kyamateka kubhanga o jimbandu mu yônge, o jiphange exile mwakwatekesa kubhaka mu kilunji o jimbandu jâ.

Ku muvu wa 2019, amateka kubhanga o yônge mu sanzala yâ. Mu kithangana kyenyókyo, sayi dikaza dimoxi ayi mutunga mu sanzala yóyo. O dikaza didi aboki a thembu yoso, amesenene kukwatekesa o jiphange jitatu ifofo, kwijiya o kutanga ni kusoneka mu dimi dyâ. Maji ene we kejidile né ngó kima kyalungile ni ukexilu yu wakutanga ni kusoneka. Ene ayi mu inzo mwene mubhakela o madivulu, phala kudilonga o ukexilu yu wa kutanga ni kusoneka, anga alongo o jiphange jetu ifofo.

Mukubhita tumbeji o jiphange jiji jiyadi amateka kutanga ni kusoneka mu ukexilu wa ifofo, o kiki kyakolesa dingi o ukamba wâ ni Jihova. a Kindala Yomara, Marcelo, ni Hiver, akituka kya aboki a thembu yoso. Marcelo wakituka kya mukwatekexi wa tufunga. Mu semana joso ene adibhakula kyavulu mu kikalakalu kyâ mu nzumbi. O kisangusangu kyâ, kyene mu swinisa we akwá.

O jiphange jitatu jiji, asakidila kyavulu mu kikwatekesu kyene mwabhana o kilunga kya Jihova. Yomara wambe “Ene, éne mulondekesa o henda ya kidi yatokala kukala nayu o Jikidistá.” Marcelo wambe we: “Ngitena kuzwela kuma twala ni makamba a kidi, ni kwila tubhanga mbandu ku mwiji wala ni henda ku mundu woso.” Yomara ni jiphange jê jiyadi amesena kyavulu kumona kyoso o ixi yanda kala palayízu.—Jisá. 37:10, 11; Iza. 35:5.