Abhana Jibulaxa ku Jimbwa Jami
NICK watungu ku mbanza ya Oregon, ku Estados Unidos, wasoneka: “Mu kixibhu kya muvu wa 2014, ngexile mukwenda ni jimbwa jami, mu mbanza yetu. O Jimbangi ja Jihova ngene mu amona kyavulu mukaxi ka mbanza, ene mukwimana mumbandu ya tumakalu twamadivulu. Ene azwata kyambote, adimenekena ni kisangusangu kyavulu.”
“O Jimbangi ja Jihova atalatala kyambote o athu, katé mwene o jimbwa jami ajitalatala we kyambote. Sayi kizuwa, Elaine, wemanene ku kadikalu kamadivulu, wabhana jibulaxa kujimbwa jami jiyadi. Kyenyiki, ithangana yoso itwexile muzukama ku kadikalu kamadivulu, o jimbwa jami ja kexile mudisunga phala kutambula o ‘jibulaxa’ ja Jimbangi ja Jihova.
“Kwabhitile tumbeji, o jimbwa jexile mudya o jibulaxa, kyoso kingexile mudizwelesa bhofele ni Jimbangi ja Jihova. Kingimesenene kuzwela kyavulu ni ene. Ngexile kyá ni 70 amivu, kingejidile we o ixikanu ya Jimbangi ja Jihova. Ngaluwalele ni jingeleja ja Protestante, kyenyiki, ngaxinganeka kwila, kota se ngidilonga o Bibidya ubheka wami.
“Mu ithangana yiyi, ngexile mumona o Jimbangi ja Jihova mu ididi yamukwa mu mbanza yetu, emanene bhumbandu ya tumakalu twamadivulu. Ene we exile mutalatala kyambote akwâ. Ene axikina kutambwijila o ibhwidisu yami, bhukaxi ka Bibidya, o kiki kyangibhangesa kwa adyelela dingi.
“Sayi kizuwa, Elaine wangibhwidisa: ‘Eye uxikina kwila o yama ni ibhaku ujitu watubhana Nzambi?’ Eme ngatambwijila: ‘Xe, ngixinika!’ Mukusuluka, Elaine wangitangela Izaya 11:6-9. Kiki kyalungulula o kixinganeku kyami, sumbala ngexile hanji ni hele yakuxikina o madivulu.
“Mu izuwa yakayela, ngawabhela kyavulu kuzwela ni Elaine ni mwadi wê, Brent, sumbala mu tu ithangana twofele. Ene angiswinisa kutanga o madivulu a Matesu ndu Ikalakalu, phala kutendela ihi ilombolola kukala Kidistá yakidi. Kyenyiki, ngatange mwene o madivulu oso ya. Kikubhiti ithangana yavulu, ngaxikina kudilonga o Bibidya ni Brent ni Elaine. Kiki kyabhiti mu thembu ya mvula, mu muvu wa 2016.
“Ngexile mukingila ni hanji yoso o kithangana kya kudilonga o Bibidya kubhata ni kuya mu yonge mu Kididi kya Ubhezelu. Ngasanguluka kyavulu mukudilonga o kidi kya Bibidya. Mukubhita tumivu, angibatizala kala ngi Mbangi ya Jihova. Kindala, ngala mukitala kya 79 amivu, ngejiya ni kidi kyoso kwila, ngala mu njila yatokala. Jihova wangibhana dibesá dyakatunda, mukungixana phala kubhanga mbandu ya mwiji wa jiselevende jê jafiyele, adibhakula kwa mwene.”
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
