Tutena Kudilonga Yalungu ni Nzambi Bhukaxi ka Jipolofeta Jê
M’ukulu, Nzambi wabhanene ku jipolofeta jê jinjimbu jakatunda phala o athu. O kwila o jinjimbu jiji jitena kulondekesa kyebhi kitutena kutambula o mabesá a Nzambi? Xé, jitena. Tumone ihi itutena kudilonga ku jipolofeta jitatu ja fiyele.
MBALAHAMU
Nzambi ki mukwa katombo, mwene wamesena kubesowala o athu oso.
Nzambi wakanene kwa polofeta Mbalahamu kwila “momwé mwene mwa ká zediwila o miji yoso mu ngongo.”—Dimatekenu 12:3.
Ihi itutena kudilonga? Nzambi watuzolo kyavulu, wamesena kubesowala o athu oso amubelesela, kikale mala, ahatu ni anandenge.
MOZÉ
Nzambi mukwa jihenda, mwene ubesowala yó abhanga nguzu phala kumwijiya.
O Muteni-a-yoso wabhana o kutena kwa polofeta Mozé phala kubhanga madiwanu akatunda. Mozé wasambe: “Ng’idikize jinjila jé ja ku di tuma ni athu, phala ng’ijiye wendelu wé, ngi sange ngalasa ku mesu mé.” (Makatukilu 33:13) Nzambi waxikina yabhingi Mozé, yu wamubesowala ni kwijiya kwavulu ni kutendela o ukexilu wê ni idifwa yê. Mu kifika, Mozé wadilongo kwila o Mubhangi wetu, “Nzambi ya jihenda.”—Makatukilu 34:6, 7.
Ihi itutena kudilonga? Nzambi wamesena kutubesowala, kikale se tu mala, tu ahatu mba tu anandenge, se tubhanga yoso phala kumwijiya kyambote. Mu Mikanda Ikôla, mwene watulondekesa kyebhi ki twatokala kumubheza ni kwila wamesena kyavulu kutulondekesa o favolo yê ni kutubesowala.
JEZÚ
Jezú ni henda yoso wasake mawuhaxi amawukexilu oso
Tutena kutambula o mabesá akalelaku a Nzambi, se tudilonga yalungu ni Jezú, ni yabhange ni yalongo.
Mu Mak’â Nzambi mwala ima yavulu yalungu ni mwenyu wa Jezú ni ima yalongo. Nzambi wabhana kwa Jezú o kutena kwa kubhanga madiwanu avulu, kala o kusaka o ifofo, o maxilu ni inema. Mwene wafukununa we athu afwile. Mu kubhanga kiki, mwene walondekesa o mabesá anda bheka Nzambi phala o athu kuhadya. Mwene wajimbulula kyebhi kala muthu mudyetu kyatena kutambula o mabesá yá: “O mwenyu ki wábhwa wenyú: Kwila oso a ku ijiye eye u Nzambi ya kidi imoxi-èlele, ni kwijiya we Jezú Kidistu, yó wa mu tumu eye.”—Nzwá 17:3.
Jezú wexile musuwa akwa, wexile mukwa henda. Mayala ni ahatu, minzangala ni adyakime, axikina o kixanu kyê kya henda kyoso kyambe: ‘Mu di longe kokwami; mbata eme nga belesela, nga batama muxima, nda mu mone kutululuka ku myenyu yenu.’ (Matesu 11:29) Mwene kadifwile ni athu mu izuwa yê akexile musebhulula o ahatu, Jezú wexile mutalatala o ahatu ni henda ni kwaxila.
Ihi itutena kudilonga? Jezú walondekesa henda yadikota ku athu, mwene watuxila o phangu yalungu ni kyebhi ki twatokala kutalatala akwetu.
JEZÚ KI NZAMBI KANA
O Mikanda Ikôla itulonga kwila “kwa tu kala ngó Nzambi imoxi” ni kwila Jezú Kidistu wexile o mukunji wa Nzambi. (1 Kolindu 8:6) Jezú walondekesa kwila Nzambi wabeta kota mwene ndenge, ni kwila Nzambi wamutumikisa mu ixi.—Nzwá 11:41, 42; 14:28. *
