Ikalakalu ya Jipoxolo 7:1-60
7 Kyenyiki o mukunji wadikota webhwidisa Xitevá: “O kwila o ima yiyi ya kidi mwene?”
2 Xitevá wa tambwijila: “Enu akwetu phange jami ni enu mu jitata, ivwenu! O Nzambi yafuma watukulukila tat’etu Mbalahamu, kyoso mwene kyatungile ku Mezopotâmya, ande dya kuya mutunga ku Halane.
3 wa mwambela: ‘Tunda mu ixi yé ni ku jindandu jé, ndé mu ixi i nganda kulondekesa.’
4 Mwene watundu mu ixi ya akwa Kaladeya, wayi mutunga mu ixi ya Halane. Kyoso tat’ê kyafu mu mbanza yenyóyo, Nzambi wa mutumu phala kutunga mu ixi yenyiyi mu mwatungu kindala.
5 Maji mwene kamubhana-mu undundu, né mwene kididi phala kutula o kinama, maji wakanena ku mubhana o ixi yiyi ni ku ibhana ku mwiji wê,* sumbala mwene kakexile hanji ni twana.
6 Nzambi wa mwambela we kwila, o mwiji wê* weji tunga mu ixi yengi, ixi ki ya atokalele, ni kwila akwa ixi yenyóyo eji kwabhanga abhika ni kwatalesa hadi mu hama jiwana ja mivu.
7 Nzambi wa mwambela dingi: ‘Eme nganda fundisa o kifuxi kyanda kwabhanga abhika. Kyoso kyanda bhita o ima yiyi, ene anda tunda mwenyomo ni ku ngibheza mu kididi kiki.’
8 “Nzambi wabhange-nê o kikutu kyalungu ni kusaya, Mbalahamu anga ukala tata ya Izake. Kyoso kyabhiti dinake dya izuwa Mbalahamu wasaye Izake. Izake anga ukala tata ya Jakobo, Jakobo ukala tata ya kwinyi ni kiyadi kya miji.*
9 O jiphange ja Zuze a mukwatela difuba, anga a musumbisa ku akwa Ijitu. Maji Nzambi wakexile-nê,
10 yu wa mubhulula ku jiphaxi jê joso, wa mwidikisa henda ni ku mubhana unjimu bhu pholo ya Falawó, o sobha ya Ijitu. Mwene wa musolo phala kutumina o ixi ya Ijitu ni dibhata dyê dyoso.
11 Kyenyiki-phe, kukala nzala yavulu ni jiphaxi javulu mu ixi yoso ya Ijitu ni mu ixi ya Kanana. O jikuku jetu kexile musanga kima phala kudya.
12 Maji Jakobo wevu kwila ku Ijitu kwakexile kúdya,* anga utumikisa-ku o jikuku jetu muveji ya dyanga.
13 Muveji ya kayadi, Zuze wa dilondekesa ku jiphange jê, anga Falawó wijiya o mwiji wa Zuze.
14 Kyenyiki Zuze watumu kutakana tat’ê Jakobo, ni jindandu jê joso, exile makwinyi a sambwadi ni kitanu kya athu.
15 Jakobo anga ukulumuka ku Ijitu yu wafwila kwenyóko, kyene we kyabhiti ni jikuku jetu.
16 O imbi yâ ayambata mu mbanza ya Xikeme, a ifundu mu mbila ya sumbile Mbalahamu ni kitadi kya phalata ku an’a Hamolo, mu mbanza ya Xikeme.
17 “Kyoso kyazukamene o kithangana kya Nzambi ku kumbidila o kikanenu kyabhangele kwa Mbalahamu, o mundu wa Izalayele wexile mu dibandekesa kyavulu mu ixi ya Ijitu.
18 Kyenyiki ku Ijitu kukala sobha yéngi kejidile Zuze.
19 Mwene wafunyu ndunge yayibha ku mwiji wetu, watalesa hadi ku jikuku jetu mu kwa jijidika kuxisa o tubwetele twâ, n’afu.
20 Mu kithangana kyenyókyo, Mozé a mu vwala, mwene wa wabhele kyavulu.* A musasele jimbeji jitatu mu inzo ya jitata jê.
21 Maji kyoso kya muxisa,* o mon’a muhatu a Falawó wa mu bongo, anga u musasa kala mon’ê.
22 Kyenyiki Mozé a mulongo mu unjimu woso wa akwa Ijitu. Mwene wexile mesene mu ima yoso yazwela ni mu ibhangelu yê.
23 “Kyoso mwene kyatenesa makwinyi a wana a mivu, waxinganeka* kukunda* o jiphange jê akwa Izalayele.
24 Kyoso kyamono mukwa Ijitu kutalatala kyayibha mukwa Izalayele, mwene wazokela phang’yê, anga u vutwila phonzo ku mukwa Ijitu, yu wa mujibha.
25 Mozé wabanze kwila o jiphange jê eji tongolola kwila, Nzambi wakexile mwa bhulula bhukaxi kê, maji kikyene kyatongolola.
26 Mu kizuwa kyakayela, mwene wasange kiyadi kya athu akwa Izalayele akexile mubhânga,* yu wamesenene kwa tululukisa, wixi: ‘Enu akwetu, enu mwala mu jiphange. Mukonda dyahi mwa mubhânga?’
27 Maji o yó wexile mubhanga kyayibha kwa mukwá, wa mulundula, wambe: ‘Nanyi wa kubhange u mutwameni ni mufundixi wetu?
28 O kwila eye wamesena we ku ngijibha, kala ki wajibha o mukwa Ijitu mazá?’
29 Kyoso kyevu o maka enyá, Mozé walenge, wayi mutunga kala musonyi mu ixi ya Midiyana. Mwenyomo, wa vwala-mu kiyadi kya ana.
30 “Kyabhiti makwinyi awana a mivu, kwa mu tukulukila anju mu kikangalakata kya Mulundu wa Sinayi, mu mulengu wa kisasa kyexile mu wama túbhya.
31 Mozé kya kimono wadiwana kyavulu. Maji kyazukama phala kumona kyambote, mwene wevu o dízwi dya Jihova, dixi:
32 ‘Eme ngi Nzambi ya jikuku jé, ngi Nzambi ya Mbalahamu, ya Izake ni Jakobo.’ Mozé anga uteketa, kamesenene kuzukama-ku dingi.
33 Jihova wa mwambela: ‘Katula o jihayi jé, mukonda o kididi bhu wala, kididi kikôla.
34 Eme ngamono o hadi ya mutala o mundu wami mu ixi ya Ijitu, ngevu o kukema kwâ, eme ngatuluka phala kwabhulula. Kindala zá, ni ngi kutumikise ku Ijitu.’
35 O Mozé yú, a muditunine, kyoso kya mwambela kwila: ‘Nanyi wa kubhange u mutwameni ni mufundixi wetu?’ Mwéne a mutumu kála mutwameni ni mubhuludi bhukaxi ka anju ya mutukulukile mu kisasa.
36 O diyala didi, wa akatula mu ixi ya Ijitu mu kubhanga isumwa ni madiwanu mu ixi yenyóyo ni mu Kalunga ka Kusuka ni mu kikangalakata, mu makwinyi awana a mivu.
37 “O Mozé yú, mwéne wambele akwa Izalayele kwila, ‘Nzambi wanda mi bhana mwaxaxi ka jiphange jenu polofeta wasokela n’eme.’
38 Mwéne yó wakexile kumoxi ni kifuxi kya Izalayele mu kikangalakata, mwene wakexile ni anju yazwela-nê ku Mulundu wa Sinayi. Wakexile we kumoxi ni jikuku jetu. Mwene wevu o maka a mwenyu kwa Nzambi, yu wa tutangela-wu.
39 O jikuku jetu kaxikina ku mubelesela, a muditunu, anga ku mixima yâ abanze kuvutuka ku Ijitu.
40 Ene ambela Alá, exi: ‘Tubhangele jinzambi, phala ji tu twamene ku pholo, mukonda kitwejiya se ihi yabhiti ni Mozé, yó wa tukatula mu ixi ya Ijitu.’
41 Mu izuwa yenyóyo ene ayudika kangombe, anga abhakula jisata ku kiteka kyenyókyo, ene abhangele fesa mu kusanguluka ni kiteka kya yudikile ni maku mâ.
42 Kyenyiki Nzambi wa asondoloka, yu wa ehela kubheza o kifuxi kya dyulu, kala kyosoneke mu divulu dya Jipolofeta: ‘O kwila mu makwinyi awana a mivu, enu mwa bhakwile kokwami o jisata jenu, enu mudibhata dya Izalayele?
43 Kana! Enu mwazangula o balaka ya Moloko ni théthembwa ya nzambi Lefani, o iteka i mwa yudika phala ku ibheza. Mukonda dya kiki, nganda mi tumikisa dingi dikanga, ku Babilonya ndenge.’
44 “O jikuku jetu akexile ni balaka ya kikutu kya Nzambi,* kala kya atendelesele Yó wazwelele ni Mozé, wa mutangele kwila watokalele kubhanga kala kya mu londekesele Nzambi.
45 O jikuku jetu a itambula ku jitata jâ. Ene ni Josuwé abheka o balaka mu ixi ya akwa jixi jengi, a akaye kwa Nzambi bhu pholo dya jitata jetu. O balaka yenyóyo, ya nangenena bhabha katé mu izuwa ya Davidi.
46 Davidi wasange kuzediwa ku mesu ma Nzambi. Mwene wabhingi phala ku mubhana o ujitu wakutunga inzo kwa Nzambi ya Jakobo.
47 Maji Solomá mwéne watungile inzo ya Nzambi.
48 Maji, o Sukeku katungu mu jinzo jobhange ku athu, kála kyambe o polofeta:
49 ‘Jihova wambe, wixi: “O dyulu dyene o kyandu kyami, o ixi yene o kididi kyami kyakutula o inama. Inzo ya kidifwa kyahi i mwanda ngi tungila? Mba kwebhi kweji kala o kididi kyami kya kunyoha?
50 O maku mami kene abhange o ima yoso yiyi?”’
51 “Enu mwajiji kyavulu, mwaxiti o mixima ni mátwi menu! Enu mwene mu bhukumukina jinga o nzumbi ikôla, kála kyabhangele o jikuku jenu kyene we ki mwene mubhanga.
52 Polofeta yebhi akambe ku mu zukutisa ku jikuku jenu? Enu mwajibha yó adyangele kubhana o ngolokela ya wijilu wa muthu wayuka, mwenyó mwa mu sumbisa ni ku mujibha.
53 Enu mwatambula o Kijila kyotange ku jianju, maji ki mwa kikumbidila.”
54 Kyoso kyevu o maka enyá, njinda ya akwata,* anga amateka kudikokota ku mazu.
55 Mwene wezala ni nzumbi ikôla, watale swí ku dyulu, wamono o fuma ya Nzambi ni Jezú wemana bhu mbandu ya kadilu ka Nzambi.
56 Mwene wambe: “Nga mumona o dyulu dya jikuka, o Mon’a muthu wemana bhu mbandu ya kadilu ka Nzambi.”
57 Ene anga adikola ni dízwi dya swína, axiti o mátwi mâ, ya adilúndula kwa mwene.
58 Kyazubha ku mukaya mu mbanza, ene amateka ku mububa ni matadi. O jimbangi ja mutatela atula o izwatu yâ bhu inama ya munzangala a mwixana Sawúlu.
59 Kyakexile mu mububa ni matadi, Xitevá wadyondela Jezú, wixi: “Ngana Jezú, tambula o nzumbi yami!”
60 Mwene anga ufukama, uzwela ni dízwi dya swína: “Jihova, kana kwafundisa mukonda dya kituxi kiki.” Kyazubha o kuzwela kiki, mwene wafu.
Footnotes
^ Mu Ngel.: “mbutu yê.”
^ Mu Ngel.: “mbutu yê.”
^ Mba, “atwameni a miji.”
^ Mba, “idima.”
^ Mba, “bhu pholo ya Nzambi mwene wa wabhele kyavulu.”
^ Mba, “kya mu bwazeka.”
^ Mba, “kya mwiza ku muxima.”
^ Mba, “kutalesa.”
^ Mba, “akexile mu di beta.”
^ Mba, “ya londekesele kwila Nzambi wa kexile na-wu.”
^ Mba, “a divu kwila, a a kwama ku mixima.”
