O Mukanda wa Kayadi kwa Timote 2:1-26
2 Eye-phe monami, kolokota mu ku dikwatenena mu ngalasa ya Nzambi yala mwa Kidistu Jezú.
2 O ima iwevu kokwami, anga a imono ni ku ixikina ku jimbangi javulu, longa-yu ku athu ala jifiyele, phala ene ejiye kyebhi kyatena kulonga we akwâ.
3 Kuma udisoladi dya kidi dya Kidistu, kala polondo phala kutala hadi.
4 O muthu wa musidivila kala disoladi kalanduka* ni mawenji,* mukonda mwene wamesena kusangulukisa yó wa musolo kala disoladi.
5 Ne mwene mu jijoko, o muthu utambula ngó o kikowe se ukayela o itendelesu yoso yalungu ni joko yiyi.
6 O kidimakaji ukalakala ni nguzu yoso, mwéne watokala kudyanga kudya ku idima yakunu.
7 Xinganeka kyambote mu ima ingene mu kutangela, o Ngana wanda kubhangesa kutendela* o ima yoso.
8 Lembalala kwila Jezú Kidistu a mu fukununa mwaxaxi ka madifundu, watokalele ku mwiji* wa Davidi, kala kingene mutanga mu njimbu yambote ingene muboka.
9 Mukonda dya njimbu yiyi, kyene ki nga mutalela o hadi, anga angikutu ni malubhambu kala ngi kisweya. Maji seku muthu utena kukuta o Mak’â Nzambi.
10 Mukonda dya kiki, nga mu kolokota jinga mu ima yoso mukonda dya yó osole.* Phala ene wá, atambule o ubhulukilu wijila mwa Kidistu Jezú ni fuma ikalelaku.
11 Maka ya akidi, abhingi kwa dyelela: Se twafu kumoxi ni mwene, mu kidi, twanda kala we ni mwenyu kumoxi ni mwene.
12 Se tusuluka ni kukolokota, twanda tumina kumoxi ni mwene, se tu mudituna, mwene we wanda tudituna.
13 Se tukamba kukala jifiyele, mwene ukala jinga fiyele, kuma mwene katena kudituna mudyê mwene.*
14 Suluka mu kwa lembalesa o ima yiyi, ni kwalonga* bhu pholo ya Nzambi kwila, kazoke mukonda dya izwelu, kuma o ima yiyi ki yala ni valolo. Mukonda ibhanga ngó kyayibha kwa* yó a ivwa.
15 Bhanga yoso phala udilondekese kwila u muthu a kuxikina kwa Nzambi, u mukalakadi wakambe kima ki kukwatesa jisonyi, ulonga kyambote o kidi kya Nzambi.
16 Maji ditune o izwelu yakambe valolo ki yalungu ni ima ikôla. Mukonda yanda kwabhangesa ngó kudisandula dingi kwa Nzambi.
17 O izwelu yâ yanda dimwanga, kala kidimwanga o fidila mu mukutu. Himinewu ni Filetu, atokala ku athu yá.
18 Ene axisa o kidi, azwela kwila o difukunukinu dyabhiti kya ukulu. Mu kubhanga kiki, a muzozesa o kixikanu kya akwâ.
19 Né kiki, o kaboko ka Nzambi kakolo, kanangenena, kwene asoneka-ku, exi: “Jihova wejiya oso a mutokala.” Ni kwila: “Oso yó adikola mu dijina dya Jihova, aditune o ima yayibha.”
20 Mu inzo yadikota ki mwala ngó itutu ya ulu ni ya phalata, maji mwala we itutu ya mabaya ni ya mavu. Sayi itutu yiyi yala ni valolo yadikota, maji o ya mukwa ki yala ni valolo yavulu.
21 Se muthu udisandula ku itutu yiyi ki yala ni valolo yavulu, wanda kala kála kitutu kya ujitu, kyazele, kyafwama phala o ngana yê, kyoyudike phala kubhanga nakyu ikalakalu yoso yambote.
22 Mu kyenyiki, o jihânji ja unzangala, lenga-ju. Maji sota o kuyuka, o kixikanu, o henda ni paze, kumoxi ni yó adyelela Ngana* ni muxima wazele.
23 Ditune we o kuzoka kwa wowa kikwala ni valolo, mukonda o ima yiyi ibhekela ngó jimvunda.
24 O mubhika wa Ngana katokala kuzoka, maji mwene watokala kukala mukwa kulenduka,* wejiya kulonga kyambote, ka vutula phonzo kyoso kya mubhanga kyayibha.
25 Ulonga ni kulenduka kwoso yó abhukumuka, nange Nzambi wanda kwabhana kithangana kya kudyela,* n’eze mu kwijiya o kidi.
26 Mu kubhanga kiki, ene anda dyela, kanda bwa mu mubhetu wa Dyabhu, mukonda mwene wa akwata mu mubhetu phala kubhanga o vondadi yê.
Footnotes
^ Mu Ngel.: “kadite.”
^ Mba nange, “mu ikalakalu ya kizuwa ni kizuwa.”
^ Mba, “kwijiya.”
^ Mu Ngel.: “mbutu.”
^ Mba, “athu akôla.”
^ Mba, “mwene katena kwaluluka.”
^ Mu Ngel.: “kubhana umbangi ku athu oso.”
^ Mba, “ibwikisa.”
^ Mba, “adikola kwa Ngana.”
^ Mba, “mukwa kuzwela ni masunga.”
^ Mba, “kulungulula o ukexilu wâ.”
