Mukanda wa Kayadi ku Akwa Kolindu 8:1-24
8 Enu akwetu jiphange jami, kindala twa mesena ku mi tangela yalungu ni ngalasa ya londekesa Nzambi ku jiphange mu ilunga ya Masedonya.
2 Né mwene ni jihadi javulu mu kithangana kya izukutisu, ene ni wadyama wâ wavulu, a kwatekesa akwâ ni kusanguluka kwoso. Kiki kya londekesa kwila, ene ala ni ukexilu wa kubhana.
3 Ngala ngi mbangi ya kwila, ene abhana yoso ya kexile nayu, katé kya somboka mu kubhana o ima ya kexile nayu.
4 Mu vondadi yâ, a tudyondela lwavulu phala tutambule o ujitu wenyú phala kukwatekesa o athu a asolo.*
5 Ene a dibhakula ni muxima woso phala kusidivila Ngana, anga a tukwatekesa kala kya mesena Nzambi.
6 Kyenyiki, twa swinisa Titu phala kuzubha o kikalakalu kiki kya matekene mwaxaxi kenu, kya kubhongolola o maujitu u mwabhana ni henda yoso.
7 Enu mwezala ni idifwa yambote kala o kixikanu, uhete wa kuzwela, ni kwijiya. Enu wenu mwa swina mu ima yoso i mubhanga, mwa zolo kyavulu o athu kala ki twa mi zolo. Swinenu we mu kikalakalu kiki kya kukwatekesa.
8 Eme ki nga mu myambela o maka enyá phala ku mi tumina, maji nga mesena ngó ku mijidisa o kuswina kwa londekesa akwenu, phala ngi mone we se o henda yenu ya kidi.
9 Mukonda enu mwejiya o henda yadikota ya londekesa Ngana yetu Jezú Kidistu. Sumbala mwene wexile mvwama, wakituka ngadyama mukonda dyenu, phala enu mu kituke mu jimvwama bhukaxi ka wadyama wê.
10 Mu maka enyá, o kibanzelu kyami kyenyiki: O kikalakalu kiki kya kukwatekesa, phala o mbote yenu we, kuma kwa bhiti kyá muvu umoxi tundé ki mwa londekesa o vondadi yenu ya kukwatekesa mu kikalakalu kiki ni ku kibhanga we.
11 Kindala zubhenu o kikalakalu ki mwa matekene kyá. Mu kyenyiki, yoso i mubhana kala ki mwa soko nayu, yanda londekesa kwila mwa mesena mwene kukwatekesa.
12 Mukonda se mwa mesena kukwatekesa, Nzambi uxikina o ujitu yú. Muthu watokala kubhana kala kya kala nakyu, kana mu ima kala nayu.
13 Ki ngi mesena kwila o ima i mi nemena, maji i bhebhuluke phala akwenu.
14 Kuma mwala ni ima yavulu, sotenu kusuwa o ibhindamu ya akwenu, phala kyoso ki mwanda bhindamena, ene we a mi suwe o ibhindamu yenu ni ima yâ ya nzungule, phala mu sokele.
15 Kala kyosoneke mu Mikanda Ikôla, exi: “O muthu wakexile ni ima yavulu, kasubhuka ni kima, o yó wakexile ni ima yatolo, sé-ku kima kya mu kambe.”
16 Twasakidila Nzambi mu kubhana kwa Titu muxima wa ku mi kwatekesa, kala ki twene ku mi kwatekesa.
17 Mukonda mwene waxikina kubhanga o kima ki twa mu bhingile, maji kuma mwene wala ni vondadi ya ku mi kwatekesa, wanda kibhanga mwene mu vondadi yê.
18 Kumoxi ni Titu, twa mu tumikisa o phange ene mu mu ximana kyavulu mu ilunga yoso mukonda dya kikalakalu kyê kyakutula o njimbu yambote.
19 Ki kyene ngó, maji o phang’yetu yú a mu solo ku jiphange mu ilunga phala kwenda kumoxi n’etu mu kubhanga o kikalakalu kiki kya kukwatekesa, phala kuximana Ngana ni kulondekesa kwila twa mesena ku mi kwatekesa ni lusolo lwoso.
20 Kyenyiki, ki tu mesena kwila kukala athu a tuzwela kyayibha mukonda dya kikalakalu kiki kya henda ki twa mubhanga.
21 Mukonda ‘ima yoso tu ilanga ni kidi kyoso, kana ngó bhu pholo ya Jihova, maji ni bhu pholo we ya athu.’
22 Kindala twa mu mi tumikisa kumoxi ni mwene, phang’yetu twa mu mono kwila wa swina mu ikalakalu yavulu, maji kindala mwene wa swina dingi, mukonda wa mi dyelela kyavulu.
23 Mu kyenyiki, se mwala ni phata yalungu ni Titu, ngi mi tangela kwila mwene mukalakadi ni mukwetu, wene we mu kwenda n’eme phala ku mi kwatekesa. Se bhu kala we phata yalungu ni jiphange jetu, ngi mi tangela kwila o jiphange ja ilunga ene a a tumikisa, kuma ene abhana fuma kwa Kidistu.
24 Mu kiki, londekesenu kwila mwa azolo, mwidikisa we ku jiphange mu ilunga se mukonda dyahi twene mu dinanza mu kuzwela yalungu ni enu.
Footnotes
^ Mu Ngel.: “athu akôla.”
