Mukanda wa Dyanga ku Akwa Kolindu 7:1-40
7 Kyenyiki-phe, yalungu ni maka u mwa ngi sonekena, ngi mitangela kwila, kota se o diyala ukamba kuzeka ni muhatu.
2 Kuma kwene undumbu wavulu,* kala diyala dikale ni muhatu wê, kala muhatu akale we ni mwadi wê.
3 O diyala abhane kwa muhatu wê ya mutokala, o muhatu abhane we kwa mwadi wê ya mutokala.
4 O muhatu o mukutu wê ki wa mutokala, maji watokala ku diyala dyê. Kyene we kimoxi, o diyala, o mukutu wê ki wa mutokala dingi, maji watokala kyá ku muhatu wê.
5 Kiyadi kyâ, kana muthu udituna mukwâ, kikale ngó se abakana mu kakithangana, phala ate o mixima mu kusamba. Kyanda bhita o kakithangana, akale dingi kumoxi, phala Satanaji ka akwate mukonda dya kukamba kuditumina o jihânji.
6 Ki nga muzwela o ima yiyi phala ku mibhana kijila, kana, maji ndunge ngó.
7 Eme nga mesenene kwila athu oso akale kala kingala eme. Maji kala muthu wala ni ujitu wê wa mubhana Nzambi, yú wa kukala dikudi, o yó wa kukazala.
8 Kindala ng’ambela o makudi ni atudi kwila, kota se akale kala kingala eme.
9 Maji se katena kuditumina o jihânji, akazale. Mukonda kota o kukazala, muveji dya kukala ni jihânji javulu.
10 Ngitendelesa o makaza, k’eme kana, maji Ngana mwéne wa mu tendelesa kwila, o muhatu kaxise mwadi wê.
11 Maji se o muhatu uxisa mwadi wê, akale sé kukazala, mba avutuke ni mwadi wê. O diyala we katokala kuxisa muhatu wê.
12 Maji athu amukwá, ng’a ambela, éme mwene, ki Ngana kana: Se phange wala ni muhatu kaxikana Ngana, anga o muhatu wandala kutunga nê, o diyala katokala ku muxisa.
13 Se muhatu wala ni diyala kaxikana Ngana, maji o diyala wandala kutunga-nê, o muhatu katokala ku muxisa.
14 Kuma o diyala kaxikana Ngana, bhu pholo ya Nzambi, mwene wazele mukonda dya kukala ni muhatu waxikana. O muhatu kaxikana Ngana, bhu pholo ya Nzambi wazele, mukonda dya kukala ni diyala dya xikana Ngana. Se kikyene, an’enu keji kala athu azele bhu pholo ya Nzambi, maji kindala ene ala kyá athu azele.
15 Se diyala mba muhatu kaxikana Ngana usola kuxisa mukwâ,* mwene ayé. O phange ya muhatu mba ya diyala kabhing’yé kutunga-nê, mukonda Nzambi wamesena kwila tukale ni kutululuka.
16 Eye u muhatu, se ukala ni mwadi wé, nange wanda tena ku mubhulula. Eye u diyala, se ukala ni muhatu wé, nange wanda tena ku mubhulula.
17 Maji kala muthu ende mu ukexilu wandala Jihova, asuluke kala kyoso kya mwixanene Nzambi. Kyenyiki, o kitendelesu kiki ngi kibhana mu ilunga yoso.
18 Se muthu kyoso kya mwixana kwa Nzambi, amusaye kyá, mwene asuluke mu ukexilu yú. Maji se muthu kyoso kya mwixana kwa Nzambi, ka musaye luwa, asuluke kyenyiki sé ku musaya.
19 O kukala muthu amusaye kikima, o kukala muthu akambe ku mu saya kikima. O kya betakota, o kutumaka o itumu ya Nzambi.
20 Kala muthu akale mu ukexilu kala kya mwixana.
21 O kwila Nzambi wa kwixana kyoso ki wexile u mubhika? Kana kutandanganya ni kima kiki, maji se akubhana ufôlo, tambula-wu.
22 Mukonda woso wexile mubhika kyoso kya mwixana kwa Ngana, kindala muthu wala ni ufôlo, mwene watokala kwa Ngana. Kyene we kimoxi, woso wexile ni ufôlo kyoso kya mwixana, kindala wakituka mubhika wa Kidistu.
23 Enu a misumbu ni kima kyala ni valolo yadikota. Mu kiki, kanenu kukala mu abhika a athu.
24 Enu jiphange jami, kala muthu akale mu ukexilu kala kya mwixana kwa Nzambi.
25 Ki ngatambula kitendelesu kwa Ngana phala kubhana kwa yó kiluwa akazala.* Kuma ngi muthu wa fiyele, nga muzwela mukonda dya ngalasa ya ngi londekesa Ngana.
26 Kyenyiki, ngamono kwila, kota o muthu kukala kála kyala, mukonda dya ibhidi ya izuwa yiyi.
27 Eye wala ni muhatu? Kana kusota kudixisa-nê. O kwila kiwala ni muhatu? Kana kusota muhatu.
28 Maji se ukazala ki wamuta kituxi. O muthu kiluwa ukazala,* se ukazala, ka muta kituxi. Maji oso akazala anda bhita mu ibhidi ku mwenyu. Eme-phe ngamesena kwila, ki mubhite mu ibhidi yiyi.
29 Phange jami, ngi mitangela kwila, o thembu yabutu kyá. Kyenyiki, woso wala ni muhatu, akale kála kalé ni muhatu.
30 Oso adila, akale kála yó ka mudila, o asanguluka, akale kála yó ka sanguluka, oso asumba, akale kála yó ka sumbu kima.
31 Oso asota o ima ya ngongo yiyi, kakale kála yó alanduka kyá ngó mu ku isota. Mukonda o funza ya ngongo yiyi, ya mubhita.
32 Mu kidi, ngamesena kwila, ki mukale ni hele. O muthu wala dikudi, usuwa o ima ya Ngana, mwene ubanza kyebhi kyatena kusangulukisa Ngana.
33 Maji o diyala wakazala usuwa o ima ya ngongo yiyi, ni kyebhi kyatena kusangulukisa muhatu wê.
34 Mwene walanduka. O muhatu kakazala, ni yó wala muzeletete, asuwa o ima ya Ngana, n’a kale athu azele mu xitu ni mu kilunji.* Maji o muhatu wakazala, usuwa o ima ya mundu yú, ni kyebhi kyatena kusangulukisa mwadi wê.
35 Nga muzwela o ima yiyi phala o mbote yenu. Ki ngimesena ku mifidisa,* maji ngamesena ku mi swinisa kubhanga o ima yafwama ni mu suluke kutumaka Ngana, sé kulanduka.
36 Maji se muthu umona kwila, ka mutena dingi kuditumina o jihânji jê mukonda dya kukamba kukazala, se wabhiti kyá mu kitala kya kikumbi, kota se ukazala, mwene ka muta kituxi.
37 Maji-phe se muthu wasolo ku muxima wê kukamba kukazala, yu wala ni nguzu ya kuditumina o jihânji jê* ni kwila, ka bhindamena kukazala, mwene wa mubhanga kyambote.
38 Kyenyiki, woso ukazala, ubhanga kyambote, maji woso wakambe kukazala, wabetakota kubhanga kyambote.
39 O muhatu wakazala wadikutu kwa mwadi wê, se mwadi wê wala hanji ku mwenyu. Maji se mwadi wê wafu, mwene wajituka, utena kukazala ni diyala dyoso dya mesena mwene, maji kikale ngó ukaza mwa Ngana.
40 Mudyami, o muhatu wanda beta o kuzediwa se kakazala dingi. Eme ngejiya kwila, ngala we ni nzumbi ya Nzambi.
Footnotes
^ Tala o Dilombolwelu.
^ Mba, “ku di mwangununa ni mukwâ.”
^ O athu a a tumbula bhabha, mizeletete mba mayala kiluwa a zeka ni muhatu.
^ O muthu a mu tumbula bhabha, muzeletete mba diyala kiluwa u zeka ni muhatu.
^ Mu Ngel.: “nzumbi.”
^ Mu Ngel.: “ku mi tela mubhetu.”
^ Mba, “wa kukala muzeletete.”
