Sooq Jehovap Nalunaajaasui aalersortikkumaneq ajorpat?
Kukkusumik isummernerit nalinginnaasut
Kukkusoq: Jehovap Nalunaajaasuisa nakorsat ikiuisinnaanerat upperinnginnamikku nakorsartikkusunneq ajorput.
Eqqortoq: Uagutsinnut ilaquttatsinnullu nakorsaariaatsit pitsaanerpaat ujartortarpavut. Peqqiillioraangatta aak atornagu nakorsaasinnaasunut pilattaasinnaasunullu nakorsiartarpugut. Nakorsartinnermut tunngatillugu pitsanngorsaanerit qujamasuutigaavut. Jehovap Nalunaajaasui ikiorniarlugit aak atornagu nakorsaasarnerit ineriartortinneqarsimasut maanna inuiaqatigiinnut iluaqutaalersimapput. Nunani amerlasuuni nakorsiat aalersortinnerup ulorianaatai – soorlu nappaatit aakkut tuniluuttartut, timip ajoqutaasumik imminut illersornera inuillu kukkusarnerat – ingalassimasinnaavaat.
Kukkusoq: Jehovap Nalunaajaasuisa upperaat Guutimut uppernikkut ajorunnaarsitsisoqartartoq.
Eqqortoq: Uppernikkut ajorunnaarsitsineq ajorpugut.
Kukkusoq: Aalersortinnani nakorsartinneq akisoorujussuuvoq.
Eqqortoq: Aalersortinnani nakorsartinneq imminut akilersinnaavoq. a
Kukkusoq: Ukiut tamaasa Nalunaajaasorpassuit, aamma meeqqat, aalersortikkusunnginnertik pissutigalugu toqusarput.
Eqqortoq: Taamatut oqarneq tunngavissaqanngilluinnarpoq. Pilattaasartut pisariusunik, soorlu uummammik, saarnginik ujallunillu aamma timip pisataasa ilaannik, akulikitsumik aalersuinertaqanngitsumik pilattaasarput. b Nakorsiat, aamma meeqqat, aalersortikkusunngitsut aalersortittutut aaqqikkiartortarlutilluunniit taakkunannga aaqqikkiartupallannerusarput. c Tamatuma saniatigut inuup aalersortikkusunnginnini toqqutigissagaa imaluunniit aalersortikkusunnini inuuginnassutigissagaa qulakkeerlugu oqaatigineqarsinnaanngilaq.
Sooq Jehovap Nalunaajaasui aalersortikkumaneq ajorpat?
Nakorsartinneq pingaarnertut pissutiginagu upperisarli pissutiginerullugu. Testamentitoqqami Testamentitaamilu ersarissumik aattoqqusinnginnermik peqqussuteqarpoq. (1 Mosesi 9:4; 3 Mosesi 17:10; 5 Mosesi 12:23; Apustilit Suliaat 15:28, 29) Aamma Guutip aak inuussutaasutut isigaa. (3 Mosesi 17:14) Taamaattumik Guutimut naalannerput pissutigiinnarnagu aammali Guuti inuunermik tunisisutut ataqqigatsigu aalersortinneq ajorpugut.
Isummanik allanngortitsinerit
Kinguneqarluartumik aalersuinertaqanngitsumik pisariusunik pilattaasoqarsinnaavoq
Siusinnerusukkut nakorsat amerlanerit aalersortinnertaqanngitsumik pilatsinnerit ingasattajaartutut allaallu imminut toqunniarnertut isigisarpaat, tamannali ukiuni kingullerni allanngorsimavoq. Assersuutigalugu 2004-mi nakorsanut atuagassiami allassimavoq “Jehovap Nalunaajaasui ikiorniarlugit passusseriaatsit ineriartortinneqarsimasut ukiut arlaqanngitsut qaangiuppata nalinginnaasutut isigineqalissasut”. d 2010-mi atuagassiami Heart, Lung and Circulation-imi allassimavoq “aalersuinertaqanngitsumik pilattaanerit J[ehovap] N[alunaajaasuinut] taamaallaat atorneqartaratik pilattaasarnermi nalinginnaasutut atorneqartariaqaraluartut”.
Nunarsuaq tamakkerlugu nakorsat tuusintillit aalersuinertaqanngitsumik suliarinnissinnaajumallutik periutsit aammik annaasaqarnannginnerusut atortalersimavaat. Taamatut aak atornagu passusseriaatsit allaat nunani ineriartortinneqarpiarsimanngitsuni atorneqartarlutillu Jehovamik Nalunaajaasuunngitsut taakku atorlugit suliaritikkusuttalersimapput.
a Takuuk Transfusion and Apheresis Science, Volume 33, No. 3, p. 349.
b Takukkit The Journal of Thoracic and Cardiovascular Surgery, Volume 134, No. 2, pp. 287-288; Texas Heart Institute Journal, Volume 38, No. 5, p. 563; Basics of Blood Management, p. 2; aamma Continuing Education in Anaesthesia, Critical Care & Pain, Volume 4, No. 2, p. 39.
c Takukkit The Journal of Thoracic and Cardiovascular Surgery, Volume 89, No. 6, p. 918; aamma Heart, Lung and Circulation, Volume 19, p. 658.
d Continuing Education in Anaesthesia, Critical Care & Pain, Volume 4, No. 2, page 39.