Timuutiusimut 2. 2:1-26
2 Taamaattumik, illit qitornara, ajunngisaangaarneq Kristusimi Jiisusimiittoq nukissamik aallerfigiuaruk.
2 Uannillu tusakkatit ilisimannittunit amerlasuunit uppernarsarneqartut inunnut tatiginartunut ilinniartitsissutigissavatit, taamaalillutik allanik ilinniartitsinissamut piukkunnarsissapput.
3 Kristusimut Jiisusimut sakkutuujulluartutut naallioqataagit.
4 Sakkutooq kinaluunniit sakkutuunngortitsisiminit akuerisaajumalluni niuernermut* tunngasunut akuliunnavianngilaq.*
5 Unammisitsinernilu malittarisassat malillugit unammeqataasut kisimik niaqoruserneqartarput.
6 Naasorissaasoq tamaviaarluni sulisoq inerittunik siulliulluni nerisariaqarpoq.
7 Allakkakka eqqarsaatigiuakkit. Naalakkap sunik tamanik paasinninnissannut* ikiussavaatit.
8 Eqqaamassavat Jiisusi Kristusi toqusunit makititaasoq Daavimullu kinguaajusoq, tamannalu nutaarsiassatut nuannersutut oqaluussissutigisara
9 pillugu naalliullungalu pinerluttutut parnaarussaaqqavunga. Guutilli oqaasia qilersugaanngilaq.
10 Taamaattumik aamma toqqakkat Kristusi Jiisusi aqqutigalugu aniguisitaaqqullugit naassaanngitsumillu alutornarsisitaaqqullugit sutigut tamatigut pinertusaartuarpunga.
11 Una tutsuiginarpoq: Toqoqatigigutsigu aamma inooqatigissavarput.
12 Pinertusaartuarutta aamma kunngisut naalakkersueqatigissavarput. Miserratigigutsigu aamma miserratigissavaatigut.
13 Imminik miserratigisinnaannginnami aalajaanngikkaluartugut aalajaattuassaaq.
14 Tamakku pillugit eqqaasittuassavatit. Guutip saavani ilitsersussavatit* oqaatsit pillugit assortuuttaqqunagit, tamannami tusarnaartunut ajoqutaasarami* iluaqutaanngilluinnarpoq.
15 Guutimit iluarisaasutut, sulisartutut kanngusuutissaqanngitsutut ilumoortorlu pillugu Guutip oqaasianik eqqortumik atuisutut imminut sassaassinnaaqqullutit tamaviaarit.
16 Iluaqutaanngitsumilli oqalunneq illernartumut kanngunarsaataasoq itigartissavat guutiitsuunerujartuinnarnermik kinguneqartarmat
17 aseruunnertullu siammaraluttuinnartarmat. Hymeniiusi Filiitusilu taama oqaluttartut ilagaat.
18 Angutit taakku oqartaramik toqusut makititaareersimasut ilumoortoq tunullugulu upperunnaarsitsisarput.
19 Taamaakkaluartoq Guutip toqqaviliaa ima allannilik qajannaappoq: “Jehovap pigisani ilisimavai,” aamma: “Jehovap atianik tatiginnittut* tamarmik eqqunngitsuliunngikkilik.”
20 Illorsuarmi kuultiinnarnik sølviinnarnillu atortoqarnani aamma qisunnik marrarnillu sanaanik atortoqarpoq.* Taakkua ilaat pingaartorsiornermi allallu ulluinnarni atorneqartarput.
21 Kingullertut eqqaaneqartunit avissaarsimasoq atortuuvoq* pingaartorsiornermi atugassaq, illernartitaasoq, piginnitsiminut iluaqutaasoq sutigullu tamatigut ajunngitsuliornissamut piareersimasoq.
22 Taamaattumik inuusuttut pilerigisaat qimarratigissavatit, minguitsumilli uummateqarlutik Naalakkamik tatiginnittut* ilagalugit anguniassavatit naapertuilluarneq, upperneq, asanninneq eqqissinerlu.
23 Aamma oqallinnerit sianiitsorpallattut isumaqanngitsullu assortuunnernik kinguneqartartut nalunnginnakku itigartissavatit.
24 Naalakkammi inussiaataa allanik assortuinani tamanut inussiarnersuussaaq,* ilinniartitsinissamut piukkunnassaaq, eqqunngitsumik pineqaraangami imminut aqussinnaasassaaq
25 akerliliisunillu saamasumik ilitsersuisinnaassalluni. Taava immaqa Guutip peqqissiminissamut* periarfississavai ilumoortoq pillugu eqqoqqissaartumik paasisimasaqaleqqullugit,
26 silattuaqeqqullugit Diaavulullu napiarniutaanit* qimaaqqullugit. Diaavulummi piumasamisut ilioqqullugit uumatillugit tigusarisimavai.
Ilanngussat
^ Imalt. immaqa: “ulluinnarni suliassanut”.
^ Nutsiinn.: “ilagunnavianngilaq”.
^ Imalt.: “sunut tamanut tunngatillugu ilisimassuseqalernissannut”.
^ Imalt.: “ilisimannittutut nassuiaateqqissaassavatit”.
^ Imalt.: “aserorsaataasarami; tusarnaartunik tunussisitsisarami”.
^ Imalt.: “torlorfiginnittut”.
^ Imalt.: “immersagaqartarpoq”.
^ Imalt.: “immersagaavoq”.
^ Imalt.: “torlorfiginnittut”.
^ Imalt.: “periaaserissuussaaq”.
^ Imalt.: “isummamik allannguinissamut”.
^ Imalt.: “nigarniutaanit”.
