Itsarnisarsiuunit nassaarineqartut tunngavigalugit inuit Biibilimi eqqartorneqartut inuusimanerat toqqaannartumik toqqaannanngitsumilluunniit ilaannikkut uppernarsarneqartarpoq. Assersuutigalugu 2011-mi ilisimatuut israelimeersut taamaattumik nassaartoqarsimaneranik paasissutissiipput. Ossuariumi — inuup timaanut saanikuinnanngorsimasumut illerfik — ujaqqamik kalkilimmik sanaaq ukiunik 2000-inik pisoqaassusilik nassaarineqarsimavoq.

Tassani saanikunut illerfimmi ima kigartugaqarpoq: “Mirjam, Kajfasip Bet Imrimeersup Ma’azjami palasip ernerata, Jeshuap pania.” Juuteq palasiuneq Jiisusip eqqartuunneqarneranut toqutaaneranullu pisooqataasoq Kajfasimik ateqarpoq. (Joh 11:48-50) Oqaluttuarisaanermik ilisimatuup Flavius Josefusip taanna “Josef, Kajfasimik taaneqartutut” eqqaavaa. Illerfik taanna taassuma ilaqutaaninngaanneersuunerarneqarpoq. Palasiunerup saanikuisa illerfiunerarneqartumi siornatigut nassaarineqarsimasumi Jehosef bar Kajafamik — imaluunniit Josef, Kajfasip erneranik * — kigartugaqarnera pissutigalugu Mirjami Kajfasimut ilaqutaasimavoq.

Israel Antiquities Authority (IAA) naapertorlugu Mirjamip illerfia ilivermit ujajaasunit tillinneqarsimasoq arsaarinnissutigineqarsimavoq. Nassaaq itsarnisaq taassumunngalu allallugu kigartorneqarsimasoq misissoqqissaarneqarmata illerfiup ilumoortuunera uppernarsineqarpoq.

Saanikunut illerfik taanna aamma nutaamik paasisaqarfigaarput. Tassani “Ma’azja”, Jerusalemimi naalaffimmi palasini nikittaattartoqatigiinni 24-ni kingullersaasoq, eqqaaneqarpoq. (1 Nal 24:18) IAA paasissutissiivoq kigartorlugu allanneqarsimasumit ersertoq “Kajfasip ilaqutai Ma’azjap nikittaattatoqatigiivinut ilaasut”.

Kigartorlugu allatami aamma Bet Imri eqqaaneqarpoq. Kigartorlugu allataq taanna marlunnik assigiinngitsunik isumaqarsinnaavoq. IAA ima paasissutissiivoq: “Siullertut Bet Imri eqqarleriit palasikkormiut — Immerip kinguaavisa — aterisimasinnaavaat, (Ezra 2:36, 37; Nehemia 7:39-42) taakkulu Ma’azjap nikittaattartoqatigiivinut ilaasimasinnaapput. Aappaattut sumiiffik [Bet Imri] toqusimasup taassumaluunniit ilaqutaasa nunagisimasinnaavaat.” Qanorluunniit isumaqaraluarpat Mirjamip saanikuinut illerfik inuit Biibilimi eqqartorneqartut taakkualu ilaqutaat ilumut inuusimanerannut uppernarsaataavoq.