SAMMISAQ PINGAARNEQ
Biibili nungutinneqanngilaq
AARLERINARTOQ: Politikkikkut upperisarsiornikkullu siuttorpassuit Biibilip tusarliussaanut akerliusumik anguniagaqartarput. Amerlanertigut oqartussaassusertik atorlugu inuit Biibilimik pissarsinissaat, naqiterinissaat nutserinissaalluunniit unitsittarpaat. Uku marluk eqqarsaatigikkit:
-
167-ip missaani Kr.in.si.: Kunngip Antiochos Epifanesip seleukiderinit kingoqqisup, juutit grækerisut upperisaqalernissaannik peqqussuteqartup, Allakkat Hebræerisuut allaqqitat tamarmik nungutinneqarnissaat peqqussutigaa. Oqaluttuarisaanermik ilisimatooq Heinrich Graetz ima allappoq: “Atorfilittaasa allakkat imusat Inatsisinik imallit nassaarisatik tamaasa sissorlugillu ikuallappaat, aamma nakussatsinneqarumallutik tuppallersarneqarumallutillu taakkuninnga atuartartut toquppaat.”
-
Ukiuni akullerni: Katuullit siuttuisa ilaat inuinnaat katuullit ajoqersuutaannik ilinniartitsinatik Biibilip ajoqersuutaanik ajoqersuinerat kamaatigigamikku inuinnaat latiinerisut Tussiaatit eqqaassanngikkaanni Biibilip atuagartaanik pigisaqartut ajoqersuinerluttuunerartarpaat. Ilagiinni isumalioqatigiit ataatsimiinnerisa kingorna angutit toqqakkat “illut toqqorsiviillu pasinarsinnaasut tamaasa ... peqqissaarlutik, aalajaallutik akulikitsumillu misissuiffigisarnerisigut ajoqersuinerluttunik ujaasisarnissamik” suliassinneqarput. “Illu ajoqersuinerluttumik nassaarfiusoq nungutinneqassaaq.”
Akerlilersuisut Biibili nungutissimasuuppassuk tusarliussaa annaaneqarsimassagaluarpoq.
Biibili William Tyndalep tuluttuunngortitaa inerteqqutaaleraluartoq, nungutinniarneqaraluartoq nutserisualu 1536-mi toqutaagaluartoq piujuarpoq
BIIBILI QANOQ PIUJUARTOQ: Kunngi Antiochos Israelimi Allakkanik Illernartunik nungutitsiniaagaluartoq juutit nunarpassuarni allani aamma najugaqarput. Ilisimatuut missingertarpaat ukiuni 100-ni siullerni Kr.in.king. juutit ikinnerpaamik 60 procentii Israelimi najugaqanngitsut. Juutit synagogiminni Allakkat Illernartut pigaat – taakkualu kinguaariinni amerlasuuni, aamma kristumiut akornanni, atorneqarput. – Apustilit Suliaat 15:21.
Ukiuni akullerni Biibilimik nuannarinnittut malersorneqaraluarlutik sapiillutik Allakkat Illernartut nutsertarlugillu allaqqittarpaat. Allaat 1400-kkut qiteqqunneranni suli naqiterutit katitertakkat nassaarsiarineqanngitsut Biibilip ilaa oqaatsini 33-ni pissarsiarineqarsinnaavoq! Taamanimiilli Biibili nutserneqartuarlunilu naqiterneqartuartarpoq.
INERNILIINEQ: Kunngit pissaanillit palasillu eqqunngitsunik paasitinneqarsimasut nungutitsiniaasaraluartut Biibili oqaluttuarisaanermi atuakkani naqiterneqarnerpaallunilu nutserneqarnerpaavoq. Nunat ilaanni inatsisinut, oqaatsinut inuillu millionillit inuunerannut tunngaviusimavoq.