Ikinnguterput eqqarsar­taatsikkut nappaatilik naalliuttoq takugaangatsigu immaqa nalusarparput qanoq iliussanerluta. Asannin­nerpulli ersersis­sinnaavarput ikinngutitta nappaatimi naammagalugu atornissaanut ikiorneratigut. Qanoq?

‘Tusaaniapallattarit.’ – JAAKU 1:19.

Ikinngutit oqalukkusuppat ikiorluarsinnaavat tusarnaarnikkut. Tamatigut oqaasiinut akissutis­saqartariaqan­ngilatit. Malugitiguk tusarnaarit asagillu. Qanoq misiginersoq paasiniarsariuk isornar­torsiornagulu. Eqqaamajuk kingornatigut peqqissimis­sutigisaminik oqaaseqarsin­naammat. – Jobi 6:2, 3.

‘Tuppallersaagit.’ – TESSALUUNIKAMIUNUT 1. 5:14.

Ikinngutit immaqa annilaangavoq imaluunniit naleqan­ngitsutut misigaluni. Oqaasis­satilluunniit nalornis­sutigigaluarukkit asanerarlugu qularun­naarsikkukku tuppallersarlugulu qiimmas­sassavat.

“Ikinngutaasup asannissutsi tamatigut takutittarpaa.” – USSATIT 17:17.

Ikinngutivit suna pisariaqar­tinneraa eqqoriaan­narnagu qanoq ikiorsin­naanerlugu aperiuk. Ikinngutivit pisariaqartitani oqaatigisin­naanngikkuniuk  siunnersuuteqarit marluullusi iliuuserisin­naasassinnik, soorlu pisuttuaqatigiinnermik. Imaluunniit ikiorumallugu neqeroorfigiuk, soorlu pisiniullugu eqqiaas­sulluguluunniit. – Galaatiamiut 6:2.

‘Naammagittarit.’ – TESSALUUNIKAMIUNUT 1. 5:14.

Ikinngutit oqalukkumajuaan­narnavian­ngimmat oqalukkusulerpat tusarnaar­nissannut piareersimajuarninnik ilisimatiguk. Nappaateqarnini pissutigalugu ikinngutit ajuallaatigisannik oqaseqar­toorlunilu iliuuseqar­toorsinnaavoq. Pilersaarutissinnik taamaatitseratarsinnaavoq uumisul­luniluunniit. Ikiuunninni naammagit­tarlutillu paasinnittuugit. – Ussatit 18:24.

“Qularun­naarsin­niartarpara ikinngutaallunga tatiginartoq. Naak ajornar­torsiutaanut aaqqiis­sutissaqan­ngikkaluarlunga oqaasii tusarnaarluar­niartarpakka. Ilaannikkut tusarnaar­neqaannarluni iluaallattarpoq.” – Farrah, a ikinngutaa annilaanganermik isumatsaq­qarujus­suarnermillu nappaateqarami neriumajun­naartartoq.

“Ikinngutima ilaat inussiar­nersuullunilu qiimmas­saasuuvoq. Imminut neriartoq­qummanga nuannisangaaratta misigis­sutsikka oqaluttuarisin­naavakka. Qiimmaal­laatigeqaara!” – Ha-eun, isumatsaq­qarujus­suarnermik nappaatilik.

“Naammagit­tartuuneq pingaaruteqangaarpoq. Nuliama napparsimanini pissutigalugu oqaatsiminik ajuallatsik­kaangaminga eqqaamaniar­tarpara napparsimammat taama iliortoq. Tamanna kamalin­nginnissannut inussiar­nisaarfigiin­narnissaanullu iluaqutigisarpara.” – Jacob, isumatsaq­qarujus­suarnermik nappaatilimmik nulialik.

“Nuliama tapersersorluar­tarpaanga tuppallersar­tarlungalu. Annilaanganermik nanertisimagaangama nuannarin­ngisannik iliuuseqar­tinnaveersaar­tarpaanga. Taamaattumik ilaannikkut nuannerunar­titaminik iliuuseqan­ngitsoortarpoq. Qujamasuutigeqaara tukkortuullunilu namminis­sarsior­tuunngimmat.” – Enrico, nanertisimariataarnermik nappaatilik.