INDONESIAMI qeqertaaqqami Sangir Besarimi qatanngutigut arnat pingasut najugaqarput. Ukiuialuit matuma siornatigut sissami suleqatigiis­simapput. Inuit Biibilimik paasinnin­nissaannik ikiorlugit qeqertami tassani oqaluus­sisarnertik ilisimaneqaatigaat. Allaanerul­luinnar­tumilli sissami taamani suliaqar­tarsimapput.

Siullermik, naloraarlutik ujaqqanik aallertarput sissamullu qaqillugit. Ujaqqat ilaat arsatut atsigisarput. Taava arnat taakku issiaveeqqanut qisuusunut ingeriarlutik ujaqqat taakku kaattamik aserorter­tarpaat kukkukuut manniiniit mikinerulersillugit. Taava ujaqqat mikisut qattanut plastik­kiusunut iliorariarlugit majuartarfikkut majuullugit illumik eqqaannut ilisarpaat. Taava poorsuarnut ikiorar­tarpaat lastbiilinut issoraateriaan­nanngorlugit. Taakkulu aqqusin­niornermi atorneqartarput.

Qatanngutit taakkua ilaat Huldamik ateqarpoq. Taanna sulinerunis­saminut periarfis­saqarneruvoq. Nalingin­naasumik akissarsiani ilaquttami pisariaqar­titaannut atortarpai. Maannali aamma allamik anguniagaqarluni sulivoq. App-imut JW Library^®-mut isersin­naajumalluni tabletimik elektroniskiusumik pisaarusuppoq. Nalunngilaa app-imi tassani videut allallu oqaluus­sinermini Biibilimillu paasisaqar­nerunis­saminut iluaqutissani pissarsiarisin­naallugit.

Hulda qaammat ataaseq affarlu ullaat tamaasa akunnerni marlunni pooq lastibiileeq­qaniissinnaasoq ulikkaarlugu ujaqqanik aserorterilluni sulisarpoq. Naggataatigut tabletisinis­saminut naammattunik aningaasaateqalerpoq.

Hulda ima oqaluttuarpoq: “Ujaqqanik aserorterinermik timikkut qasungaaraluarlunga sanneqqangaaraluarlungalu tabletitaara oqaluus­sinermi ataatsimiin­nernilu iluaqutissara tigugakku anniarnikka sanneqqanikkalu suujunnaarluinnarput.” Aamma oqarpoq COVID-19-ip atuunnerani tabletitaani iluaqutigalugu ataatsimiinnernut oqaluus­sinermilu ilagiit ilagisin­naalerlugit. Huldap anguniakkani angummagu nuannaaqatigaarput.