KALENI OUPAFI!
Oudu wopamadiladilo movanyasha tau lundu pombada — Ombiibeli otai ti ngahelipi?
Oikondo yOkuungaunga nOkukelela Omikifi mo-United States oya pitifa olaporta mOmaandaxa, mo 13 Februali 2023, i na sha noudu wopamadiladilo movanyasha moshilongo osho. Oya popya kutya eepelesenda di dulife po 40 dovanafikola, ovo ve li peengudu dopombada, ova kala va polimana efimbo noule, ile ve udite vehe na oshilonga oule wefimbo lile.
Omuunganeki wOfikola yOukolele wOvanyasha, ndokotola Kathleen Ethier, okwa ti: “Nonande otwa mona nghee oudu wopamadiladilo movanyasha wa enda nokunaipala momukokomoko womido 10 da ka pita, inatu mona nande onale onghalo ya naipala ngaashi ei; omadiladilo okulikufa omwenyo nosho yo okukendabala oku shi ninga moukadona ovanyasha owa londa pombada neenghono, osho inashi monika nande onale.”
Olaporta oya ti:
Moukadona ovanyasha 10, okakadona kamwe oka fininikwa ka ye momilele inaka hala. Omundokotola Ethier okwa ti: “Osho oshitilifa neenghono. Moukadona 10 keshe ovo u shii, kamwe, ile vahapu otashi dulika va kwatwa keenghono.”
Hanga okakadona kamwe okanyasha moukadona 3 (eepelesenda 30) ohaka diladila moule shi na sha nanghee taka dulu okulikufa omwenyo.
Hanga oukadona 3 ovanyasha moukadona 5 (eepelesenda 57) ova kala va polimana efimbo noule, ile ve udite vehe na oshilonga.
Okutala komivalu odo, otadi ehameke neenghono. Efimbo lounyasha woye oli na okukala efimbo lehafo nenyaku. Oshike tashi dulu okukwafela ovanyasha ve lididimikile o-stress, oyo va taalela kunena? Ombiibeli otai ti ngahelipi?
Ombiibeli otai yandje ekwafo tali longo kovanyasha
Ombiibeli oya popya shi na sha nomafimbo madjuu oo tu li muo kunena. Oya popya kutya omafiku oo “omafimbo madjuu okukaliwa muo.” (2 Timoteus 3:1-5) Ashike Ombiibeli oi na omayele, oo ehe na efiku a kwishe, taa kwafele ovanyasha omamiliyona ve lididimike nomupondo, kashi na nee mbudi kutya ova taalela shike. Natu ka taleni koitukulwa imwe, oyo ya kanghamena kOmbiibeli.
Ekwafo kovanyasha ovo ve na omadiladilo okulikufa omwenyo
Ekwafo kovanyasha ovo va polimana, va nyemata, ile ve na omadiladilo mai
Nghee to dulu okukala wa hafa vali (ouvidio vokoupelende)
Ekwafo kovanyasha ovo hava shindwa komudidi, ile kointaneta
Nghee to dulu okufinda ovo hava shindi nopehe na okulwa (ouvidio vokoupelende)
Ekwafo kovanyasha ovo tava kondjifilwa momilele
Ombiibeli otai yandje omayele taa longo kovadali
Ombiibeli otai yandje yo omayele taa longo kovadali, opo va dule okukwafela ovanyasha nghee ve na okuungaunga nomashongo omonghalamwenyo, oo e li ko kunena. Natu ka taleni koitukulwa imwe, oyo ya kanghamena kOmbiibeli.