Ngaashi edina Olupale lOuhamba tali shi holola, ehongo lOmbibeli olo hali yandjwa momalupale a tya ngaho ohali yukifa elitulemo kOuhamba waKalunga oo wa li enenediladilo leudifo laJesus.— Lukas 8:1.

Omalupale Ouhamba oku li ondingandinga yelongelokalunga lashili moshitukulwa. Oilonga yokuudifa onghundana iwa yOuhamba ohai unganekwa okudilila mOlupale lOuhamba lomoshitukulwa. (Mateus 24:14) Omalupale Ouhamba ohaa kala a yoolokafana mounene nomomutungilo, ashike aeshe okwa tungwa paunafangwa, namahapu ohaa longifwa komaongalo e dulife pulimwe. Omido opo da di ko, otwa tunga Omalupale Ouhamba omayovi omilongo (oupokati womalupale a-5 efiku keshe), molwaashi ovaudifi nomaongalo otaa ende taa hapupala neenghono. Omalupale oo ohatu a tungu ngahelipi?— Mateus 19:26.

Ohaa tungwa nomayambidido oo haa yandjwa mounyuni aushe e na sha nokutungifa Omalupale Ouhamba. MOlupale lOuhamba keshe omu na okakefa kOmayambidido Okutungifa Omalupale Ouhamba mOunyuni Aushe. Omayambidido oo ohaa tuminwa koshitaimbelewa opo omaongalo oo a pumbwa oshimaliwa shokutungifa ile okuwapekulula Olupale lOuhamba a kwafelwe oshimaliwa, oo e shi alule nopehe na oishoshela.

Ohaa tungwa kovaliyambi ovo ve li meenghalo da yoolokafana. Moilongo ihapu omu na Eengudu dOkutunga Omalupale Ouhamba. Eengudu dovatungi novaliyambi odo tadi longo moshilongo shonhumba, mwa kwatelwa oitukulwa yasho yokomikandi, ohadi ende tadi tungu omalupale. Ohadi i di ka kwatele komesho oilonga yokutunga nokudeula Eendombwedi domoshitukulwa. Moilongo imwe omu na Eekomitiye dOkutunga domOshitukulwa odo hadi pashukile oilonga yokutunga nokuwapekulula Omalupale Ouhamba moshitukulwa shonhumba. Ovakulunhuongalo ovo ve na owino momatungo ohava wilike eongalo pefimbo lokutunga olupale fiyo osheshi la pwa, novalumenhu ovo ve na owino oo wa pumbiwa ohave liyambe nehalo liwa va kwafele. Pefimbo lokutunga Olupale lOuhamba, oilyo yeongalo lomoshitukulwa oyo hai kala po momuvalu muhapu. Ohatu pondola okulonga oilonga aishe oyo kekwafo lomhepo yaJehova, nomolwaashi ovamwatate ohava longo noudiinini, tave shi ningi tashi di komutima.— Epsalme 127:1; Ovakolossi 3:23.

• Omolwashike eenhele detu dokwoongalela hadi ifanwa Omalupale Ouhamba?

• Ohatu shi ende ngahelipi opo tu dule okutunga Omalupale Ouhamba mounyuni aushe?