OMUNHU oha kala a dengwa pomutima ngeenge kaume kaye kopahombo ehe fi omudiinini kuye. Vamwe otashi dulika va dimine po ookaume kavo kopahombo ovo ve livela ombedi ndele tava kala vali ve na ekwatafano liwa. * Kashi na nee mbudi kutya otava kala va hombola ile otava teya ohombo, ovo ookaume kavo hava kala vehe fi ovadiinini kuvo ohava kala va dengwa pomutima. Ongahelipi tava dulu okuungaunga nomaliudo a tya ngaho?

Nonande ova dengwa pomutima, vahapu ova mona ehekeleko mOmishangwa. Ove lihonga kutya Kalunga oku na ko nasha navo nohe va kenukile. — Malakia 2:13-16.

“Ngeenge ndi noshisho shoudjuu meni lange, omahekeleko oye oo a hekeleka omwenyo wange.” — Epsalme 94:19.

Bill okwa ti: “Ngeenge handi lesha ovelishe oyo, ohandi kala nda fa ndi wete Jehova ta hekeleke nge, ngaashi xe omunanghenda.”

“Osheshi kwaau omunefilonghenda oto limonifa oove mwene omunefilonghenda.” — Epsalme 18:25.

Carmen okwa ti: “Omushamane wange okwa kala ehe fi omudiinini kwaame oule weemwedi. Ashike ondi na elineekelo kutya Jehova ota kala alushe omudiinini kwaame. Ke na efiku a fiye nge po.”

“Kaleni muhe na nande oshisho shasha, ndelenee oufyoona weni u shiivifileni Kalunga momailikano nomomaindilo . . . , nombili yaKalunga ei i dule eendunge adishe, otai ka amena omitima deni nomadiladilo eni muKristus Jesus.” — Ovafilippi 4:6, 7.

Sasha okwa ti: “Ohandi leshulula ovelishe oyo lwoikando. Kalunga okwa pa nge ombili yopamadiladilo monghalamwenyo yange eshi nda kala handi ilikana lwoikando.”

Aveshe ovo va tumbulwa ova li hava kala va hala okusholola omafimbo amwe. Ashike ova li ve lineekela muJehova Kalunga nova li va tuwa omukumo kEendjovo daye. Bill okwa weda ko a ti: “Eitavelo lange ola kwafela nge ndi kale ndi na onghalamwenyo tai ti sha nonande oinima kaya li tai ende nawa. Nonande onda li handi ende oule wefimbo ‘molufilu lomudile wefyo,’ Kalunga okwa li e li pamwe naame.” — Epsalme 23:4.