Edina laKalunga olyelye? Kalunga ye mwene okwa ti: “Aame Jehova, olo edina lange.” (Jesaja 42:8, NW) Edina laKalunga ola holoka lwoikando 7 000 lwaapo mOmbiibeli. Shinyikifa oluhodi, omatoloko mahapu Eembiibeli okwa kufa mo edina laKalunga noku li pingena po nomadinafimaneko, ngaashi “Omwene.” Kalunga okwa hala u ‘ifane edina laye!’ — Epsalme 105:1.

Omadinafimaneko aJehova. Ngeenge Ombiibeli tai popi kombinga yaJehova, ohai longifa omadinafimaneko ngaashi “Kalunga,” “Omunaenghono adishe,” “Omushiti,” “Tate,” “Omwene” nosho yo “Omunamapangelo weshito alishe.” Omailikano mahapu oo a shangwa mOmbiibeli okwa longifa omadinafimaneko oo nosho yo edina laKalunga, Jehova. — Daniel 9:4.

 Olupe laKalunga. Kalunga omhepo, iha monika. (Johannes 4:24) Ombiibeli otai shi koleke kutya “kape na nande omunhu a mona Kalunga.” (Johannes 1:18) Ombiibeli oya holola yo omaliudo aye. Ovanhu otava dulu okunyikifa Kalunga oluhodi ile va kale ‘va hokiwa kuYe.’ — Omayeletumbulo 11:20; Epsalme 78:40, 41.

Omaukwatya mawa aKalunga. Kalunga ke na onhondo novanhu nonande ova dja moiwana nomomaputuko a yoolokafana. (Oilonga 10:34, 35) Kalunga ‘omunefilonghenda, omunanghenda, omunanheni, nomunene mouwanghenda nomoudiinini.’ (Exodus 34:6, 7) Kakele kaasho, Kalunga oku na omaukwatya ane a tongomana.

Eenghono. Molwaashi oye “Kalunga Omunaenghono adishe,” eenghono daye inadi ngabekelwa sha okuwanifa po keshe osho a udaneka. — Genesis 17:1.

Ounongo. Kalunga oku na ounongo wa shiya ko u dule wovanhu aveshe. Nomolwaasho Ombiibeli tai mu ifana kutya oye “aeke omunaendunge.” — Ovaroma 16:27.

Ouyuki. Kalunga oha longo alushe osho sha yuka. Ashishe osho ta longo osha “wana,” noke na nande “owadi.” — Deuteronomion 32:4.

Ohole. Ombiibeli oya ti “Kalunga oye ohole.” (Johannes 4:8) Kalunga iha ulike ashike ohole, ndele oye oshihopaenenwa sha denga mbada shohole. Nohole ya tya ngaho ohai mu linyengifa mukeshe osho ta ningi, nohashi tu etele ouwa meenghedi dihapu.

Ekwatafano laKalunga novanhu. Kalunga oye Tate yetu omunahole womeulu. (Mateus 6:9) Ngeenge otwa kala twe mu lineekela, ohatu dulu okuninga ookaume kaye. (Epsalme 25:14) Natango, Kalunga ote tu shivi tu ehene popepi naye okupitila meilikano notu mu ‘shiivifile oisho yetu aishe, molwaashi oku na ko nasha nafye.’ — 1 Petrus 5:7; Jakob 4:8.

Jesus haye Kalunga. Jesus okwe likalekelwa; oye ashike a shitwa odikilila kuKalunga. Nomolwaasho Ombiibeli tai mu ifana Omona waKalunga. (Johannes 1:14) Konima eshi Jehova a shita Jesus, okwe mu longifa onga “omunongoelela” opo a shite oinima aishe nakeshe umwe. — Omayeletumbulo 8:30, 31; Ovakolossi 1:15, 16.

 Jesus Kristus ke na fiku a tile oye Kalunga. Ponhele yaasho, okwa yelifa a ti: “[Kalunga] oye a tuma nge nondi li omukalelipo waye.” (Johannes 7:29) Eshi a li ta popi naumwe womovahongwa vaye, okwa popya kutya Kalunga oku li ‘Tate yaye, oo e li Xe yavo naKalunga kaye, oo e li yo Kalunga kavo.’ (Johannes 20:17) Konima eshi Jesus a fya, Jehova okwe mu nyumunina omwenyo meulu ndele te mu pe eenghonopangelo kolulyo laYe. — Mateus 28:18; Oilonga 2:32, 33.

Jesus Kristus ota dulu oku ku kwafela u ehene popepi naKalunga

Jesus okwe u yile kombanda yedu a honge vamwe ehalo laxe. Jehova mwene okwa popya kombinga yaJesus a ti: “Ou Omona wange omuholike. Mu udeni.” (Markus 9:7) Jesus oku shii nawa Kalunga e dule omunhu keshe. Okwa ti: “Kape na yo ou e shii Tate, kakele kOmona nakeshe oo Omona a hala oku mu hololela Xe.” — Lukas 10:22.

Jesus oha ulike filufilu omaukwatya a fa aKalunga. Jesus okwa li a ulika omaukwatya a fa axe filufilu, nomolwaasho a dula okutya: “Keshe ou a mona nge, okwa mona yo Tate.” (Johannes 14:9) Jesus okwa ehenifa ovanhu popepi naKalunga eshi a ulika ohole ya fa yaXe okupitila meendjovo nomoilonga yaye. Okwa ti: “Aame ondjila, noshili nomwenyo. Kape na ou te uya kuTate, ngeenge ita pitile mwaame.” (Johannes 14:6) Okwa ti yo: “Ovalongelikalunga vashili va longele Tate momhepo nomoshili, osheshi Tate okwa hala ovanhu ve mu longele monghedi ya tya ngaho.” (Johannes 4:23) Diladila moule kombinga yaasho! Jehova ota kongo ovanhu ngaashi ove, ovo va hala okushiiva oshili kombinga yaye.