Ovagalati 3:1-29
-
Eyooloko pokati koilonga yOmhango nosho yo eitavelo (1-14)
-
Ovayuki otava ka kala nomwenyo omolweitavelo (11)
-
-
Eudaneko olo la udanekelwa Abraham inali kanghamena kOmhango (15-18)
-
Kristus oku li oludalo laAbraham (16)
-
-
Ehovelo lOmhango nelalakano layo (19-25)
-
Ovana vaKalunga omolweitavelo (26-29)
-
Ovahongwa vaKristus ove li oludalo laAbraham (29)
-
3 Ovagalati nye muhe na eendunge, olyelye e mu nwefa mo mu longe owii, mwa fa inamu yelifilwa nawa shi na sha nanghee Jesus Kristus a valelwa komuti?
2 Onda hala oku mu pula* oshinima shimwe: Mbela omwa pewa omhepo iyapuki molwaashi mwa wanifa po Omhango ile omolwaashi mwa itavela onghundana iwa oyo mwa uda?
3 Hano kamu na eendunge? Nale omwa li hamu wilikwa komhepo iyapuki, ndele paife omolwashike mwa hala okushikula omadiladilo opanhu?*
4 Okumona oixuna kweni mbela okwongaho? Ondi shi shii kutya kaku fi kwongaho.
5 Mbela oo e mu pa omhepo iyapuki nokwa longa oilonganghono mokati keni okwe shi ninga molwaashi mwa wanifa po Omhango ile omolwaashi mwa itavela onghundana iwa oyo mwa uda?
6 Abraham naye “okwa itavela muJehova, nokwa talwa ko omuyuki.”
7 Omu shi shii kutya ovo ve na eitavelo ovo ovana vaAbraham.
8 Kalunga okwa popya meendjovo daye kutya ota ka tala ko ovanhu vomoiwana imwe ve li ovayuki omolweitavelo lavo, nonghundana oyo iwa okwa li e i lombwela Abraham ta ti: “Oiwana aishe otai ka nangekwa noupuna okupitila mwoove.”
9 Onghee hano, ovo ve na eitavelo otava ka nangekwa noupuna pamwe naAbraham, oo naye a li e na eitavelo.
10 Aveshe ovo ve lineekela moilonga yomhango otava ka handukilwa, osheshi omishangwa oda ti: “Keshe oo iha diinine nokuwanifa po ashishe osho sha shangwa membo lOmhango ota ka handukilwa.”
11 Osha yela kutya kape na oo a talika ko omuyuki kuKalunga omolwoilonga yomhango, molwaashi “omuyuki ota ka kala nomwenyo omolweitavelo.”
12 Omhango inai kanghamena keitavelo. Ndele “keshe oo ha dulika koiteelelwa yomhango ota ka kala nomwenyo omolwayo.”
13 Kristus okwe tu landa eshi e tu mangulula mefingo lOmhango nokwa fingwa omolwetu, molwaashi omishangwa oda ti: “Keshe oo ta endjelelifwa komuti okwa fingwa.”
14 Osho osha ningwa opo oiwana i ka mone omanangeko noupuna okupitila muJesus Kristus ngaashi sha li sha udanekelwa Abraham. Nokungaho ohatu ka pewa omhepo iyapuki oyo Kalunga e tu udanekela omolweitavelo letu.
15 Ovamwatate, ohandi popi nanye handi longifa efaneko: Ngeenge ehangano ola kolekwa, kashi na nee mbudi kutya okomunhu, kape na ou ta dulu oku li xulifa po ile oku li lundulula.
16 Omaudaneko okwa udanekelwa Abraham noludalo laye.* Inaku tiwa “omaludalo oye,”* sha fa ngeno tashi ulike kovanhu vahapu. Ndele okwa tiwa “oludalo loye,”* tashi ulike komunhu umwe, sha hala okutya Kristus.
17 Shimwe vali: Omhango, oyo ya ka totwa po konima yomido 430, inai xulifa po ehangano olo la ningilwe kuKalunga opo ngeno eudaneko liha wanifwe.
18 Osheshi ngeenge efyuululo olo la yandjwa kuKalunga ola kanghamena komhango, osha yela kutya inali kanghamena keudaneko; ashike Kalunga okwa pa Abraham efyuululo okupitila meudaneko.
19 Omhango oya li ya totwa nelalakano lashike? Oya li ya totwa po opo i holole omanyono fiyo oludalo* olo la li la udanekwa le uya. Kalunga okwa longifa ovaengeli va yandje Omhango kovanhu okupitila momupokati.
20 Ndele oshinima ngeenge osha kwatela mo Kalunga oye aeke, inapa pumbwa omupokati.
21 Mbela Omhango oi li omhinge nomaudaneko aKalunga? Hasho nandenande! Ngeenge omhango oya li ya totwa po opo ovanhu va dule okukala nomwenyo, osha yela kutya omuyuki okwa li ta dulu okukala nomwenyo omolwomhango.
22 Ashike Omishangwa oda holola kutya ovanhu otava pangelwa koulunde, nonokutya ovo ve na eitavelo* muJesus Kristus otava ka wanifilwa omaudaneko aKalunga.
23 Ofimbo twa li inatu itavela muKristus, notwa li twa teelela eitavelo olo Kalunga a li ta ka holola, otwa li hatu pangelwa nokuwilikwa komhango.
24 Omhango oya li onga omutekuli* wetu oo te tu twala kuKristus, opo tu talike ko ovayuki omolweitavelo.
25 Ndele paife eshi tu na eitavelo, inatu pumbwa vali omutekuli.*
26 Nye amushe ovana vaKalunga molwaashi omu na eitavelo muKristus Jesus.
27 Osheshi amushe ovo mwa ninginifwa nomwa hangana naKristus, omwa hopaenena* Kristus.
28 Kape na vali Omujuda ile Omugreka, omupika ile omudalwa, omulumenhu ile omukainhu, osheshi amushe omwa hangana muKristus Jesus.
29 Ngeenge omwa ninga ovahongwa vaKristus, omu li lela oludalo* laAbraham, notamu ka fyuulula omaudaneko oo a udanekelwa Abraham.
Eshangelo lopedu
^ Eln., “okushiiva.”
^ Ile “okutomhafana pambelela.”
^ Eln., “nombuto yaye.”
^ Eln., “eembuto doye.”
^ Eln., “ombuto yoye.”
^ Eln., “ombuto.”
^ Ile “eitavelo li na oilonga.”
^ Ile “omuleli.”
^ Ile “omuleli.”
^ Eln., “omwa djala.”
^ Eln., “ombuto.”
