Omuudifi 4:1-16
4 Onda konakona vali omafininiko aeshe, oo haa ningwa koshi yetango. Onda mona omahodi ovafininikwa nokapa li umwe oo te va hekeleke. Ovafininiki vavo ove na eenghono, nokapa li umwe oo te va hekeleke.
2 Onda didilika kutya ovo va fya ove li nawa ve dulife ovo ve na omwenyo natango.
3 Naava ve li nawa ve va dule aveshe ovovo inava dalwa natango, ovo inava mona oilonga idjuu, oyo hai longwa koshi yetango.
4 Onda mona nghee ovanhu tava ningi eenghendabala da mana mo* nokulonga nounghulungu omolwomhepo yefiyafanepo, naashi yo oshongaho elela, ngaashi okutaataa omhepo.
5 Elai ohali kala le lixukata, ofimbo olutu lalo tali ende tali fipatele po.*
6 Oshixwepo okufuda po kanini,* shi dulife okulonga to lidipaele po* nokutaataa omhepo.
7 Onda mona vali oshinima shimwe shongaho elela koshi yetango:
8 Ope na omunhu, oo e li oye aeke, ehe na kaume; ke na omona, ile omumwaina, ndele oilonga yaye aishe idjuu kai na exulilo. Omesho aye ihaa kuta nandenande koupuna. Ndele mbela ohe lipula ngoo kutya, ‘Olyelye handi longele noudiinini nokuliimba* oinima iwa’? Naashi yo oshongaho elela noshi li oilonga inyemateka.
9 Ovanhu vavali ove dule omunhu umwe, molwaashi otava mono ondjabi iwa* omolwoilonga yavo idjuu.
10 Molwaashi umwe ngeenge okwa punduka, mukwao ota dulu okukwafela kaume kaye a yambuke po. Ndele oshike tashi ka ningilwa oo a punduka ehe na oo te mu kwafele a yambuke po?
11 Natango, ngeenge ovanhu vavali va nangala pamwe, otava dulu okukala ve udite oupyu, ndele ongahelipi oo e li oye aeke ta dulu okukala a pupyala?
12 Umwe ota dulu okufindwa komukondjifi, ngeenge oye aeke, ndele vavali otava dulu oku mu kondjifa. Ongodi ya pandwa neengodi nhatu ihai tokoka diva.*
13 Omunyasha ohepele, ndele oku na eendunge, oku dule ohamba inamido, ndele oilai, oyo ihai pwilikine vali komayele.
14 Okwa* dja mo modolongo a ninge ohamba, nonande okwa dalwa ohepele, eshi ohamba inamido ya li tai pangele.
15 Onda didilika ovanamwenyo aveshe, ovo hava ende koshi yetango nosho yo nghee hashi endele omunyasha, oo ha pingene po ohamba.
16 Nonande ovayambididi vaye aveshe ova kale vahapu, ovo tave ke uya lwanima, itava ka kala ve mu hafela. Naashi yo oshongaho elela, ngaashi okutaataa omhepo.
Eshangelo lopedu
^ Ile “longo noudiinini.”
^ Eln., “notali li ombelela yalo vene.”
^ Eln., “etulumuko li fike peke.”
^ Eln., “eshambekela loilonga idjuu.”
^ Ile “nokwiimba omwenyo wange.”
^ Ile “ouwa muhapu.”
^ Ile “noupu.”
^ Tashi dulika, tashi ulike komunyasha omunaendunge.
