Embo laJohannes 8:12-59
8 12 Jesus okwe va lombwela ta ti: “Aame ouyelele wounyuni. Keshe ou ta shikula nge ita ka enda nandenande momilaulu, ndele ota ka mona ouyelele oo tau yandje omwenyo.”
13 Opo nee Ovafarisai ova tya kuye: “Ove oto hepaulula kombinga yoye mwene, nehepaululo loye kali fi loshili.”
14 Jesus okwa tya kuvo: “Nonande ohandi hepaulula kombinga yange mwene, ehepaululo lange oloshili, molwaashi ondi shii apa nda dja nondi shii apa handi i. Ndele nye kamu shii apa nda dja naapa handi i.
15 Nye ohamu tokola pambelela,* ashike ame ihandi tokola nande omunhu.
16 Ashike ngeenge handi tokola, etokolo lange ola yuka, molwaashi ihandi tokola aame andike, ndele ohandi tokola naTate ou a tuma nge.
17 Natango, mOmhango yeni omwa shangwa taku ti: ‘Ehepaululo lovanhu vavali olashili.’
18 Ame ohandi hepaulula kombinga yange mwene, na Tate ou a tuma nge ota hepaulula kombinga yange.”
19 Opo nee ove mu pula tava ti: “Xo oku li peni?” Jesus okwe va nyamukula ta ti: “Kamu shii nge, na Tate kamu mu shii. Ngeno omwa li mu shii nge, ngeno naTate omu mu shii yo.”
20 Eendjovo odo okwe di popya fimbo a li ta hongo motembeli e li monhele omo hamu kala oikefa yomayambidido. Ndele kapa li nande oumwe e mu kwata po, molwaashi efimbo laye kala li la fika natango.
21 Okwa tya vali kuvo: “Ohandi i, notamu ka konga nge; ndele otamu ka fila moulunde weni. Apa handi i itamu dulu okuuya po.”
22 Opo nee Ovajuda ova ti: “Mbela ote ke lidipaa? Molwaashi ota ti, ‘Apa handi i itamu dulu okuuya po.’”
23 Jesus okwa tya kuvo: “Nye ovokedu; ame onda dja pombada. Nye ovomounyuni ou; ame nghi fi womounyuni ou.
24 Nomolwaasho nde mu lombwela nda ti: Otamu ka fila moulunde weni. Ngeenge inamu itavela kutya aame oo a li e na okuuya, otamu ka fila moulunde weni.”
25 Ndele ove mu pula tava ti: “Oove lyelye hano?” Jesus okwa tya kuvo: “Otashi kwafa shike handi popi nanye ndele kamu udite ko?
26 Ondi na oinima ihapu okupopya nokutokola kombinga yeni. Kakele kaasho, ou a tuma nge oha popi oshili, nohandi lombwele ounyuni oinima oyo nda uda kuye.”
27 Ndele kava li va didilika kutya okwa li te va lombwele kombinga yaXe womeulu.
28 Opo nee Jesus okwa ti: “Ngeenge Omona womunhu omwe mu endjelelifa pombada, otamu ka shiiva kutya aame oo a li e na okuuya, nonokutya ihandi longo sha pahalo lange; ndele ohandi popi ashike oinima oyo Tate a honga nge.
29 Ou a tuma nge oku li pamwe naame; ina efa nge, molwaashi ohandi longo alushe osho tashi mu hafifa.”
30 Eshi a popya oinima oyo, vahapu ove mu itavela.
31 Ndele Jesus okwa tya kOvajuda ovo ve mu itavela: “Ngeenge omwa diinine eendjovo dange, nye ovahongwa vange shili,
32 notamu ka shiiva oshili, noshili otai ke mu mangulula.”
33 Vamwe ova tya kuye: “Fye oludalo laAbraham nokatu na efiku twa li ovapika vaumwe. Omolwashike to ti, ‘Otamu ka mangululwa’?”
34 Jesus okwe va nyamukula ta ti: “Oshili ohandi mu lombwele, keshe ou ta longo oulunde omupika woulunde.
35 Kakele kaasho, omupika iha kala meumbo lamwene waye fiyo alushe, ndele omona waye oha kala mo fiyo alushe.
36 Onghee Omona ngeenge okwe mu mangulula, otamu ka kala mwa manguluka shili.
37 Ondi shi shii kutya nye oludalo laAbraham. Ndele omwa hala okudipaa nge molwaashi inamu tambula ko ehongo lange.
38 Ohandi popi oinima oyo nda mona eshi nda li puTate, ndele nye ohamu ningi oinima oyo mwa uda kuxo.”
39 Opo nee ova tya kuye: “Fye tate oAbraham.” Jesus okwa tya kuvo: “Ngeno omwa li ovana vaAbraham, ngeno otamu shikula oshihopaenenwa shaye.
40 Ndele paife omwa hala okudipaa nge, ame ou nde mu lombwela oshili oyo nda uda kuKalunga. Abraham ngeno ita ningi oshinima sha tya ngaho.
41 Nye otamu longo oilonga yaxo.” Ova tya kuye: “Fye inatu dalwa moluhaelo; otu na Tate umwe aeke, Kalunga.”
42 Jesus okwa tya kuvo: “Ngeno Kalunga okwa li oXo, ngeno omu hole nge, osheshi onda dja kuKalunga nondi li apa omolwaye. Inandi uya pahalo lange, ndele oye a tuma nge.
43 Inamu hala okutambula ko ehongo lange nomolwaasho muhe udite ko eendjovo dange.
44 Nye omu na xo yeni Ondiaboli, nomwa hala okulonga ehalo laye. Ye omudipai nghee a dja pehovelo, noina diinina oshili molwaashi ke na oshili. Ngeenge ta popi oipupulu, ota popi osho shi li muye, molwaashi ye omunaipupulu naxe yayo.
45 Ndele molwaashi ame ohandi mu lombwele oshili, inamu hala okwiitavela nge.
46 Olyelye womunye ta dulu okutya ame omulunde? Ngeenge ohandi popi oshili, omolwashike inamu hala okwiitavela nge?
47 Ou womuKalunga oha pwilikine keendjovo daKalunga. Ndele nye ihamu pwilikine molwaashi kamu fi vomuKalunga.”
48 Ovajuda ova tya kuye: “Inatu popya sha yuka eshi twa ti, ‘Ove Omusamaria nou na ondemoni’?”
49 Jesus okwa ti: “Ame nghi na ondemoni; ohandi fimaneke Tate, ndele nye otamu fifa nge ohoni.
50 Ashike itandi likongele efimano; ndele ope na ou a hala oku li pa nge noku li omutokoli.
51 Oshili ohandi mu lombwele, ou ta diinine eendjovo dange ita ka fya nandenande.”
52 Ovajuda ova tya kuye: “Paife otu wete lela kutya ou na ondemoni. Abraham okwa fya nosho yo ovaprofeti, ndele ove oto ti, ‘Ou ta diinine eendjovo dange ita ka fya nandenande.’
53 Mbela ou dule tate Abraham oo a fya nale? Ovaprofeti navo ova fya nale. Oto diladila kutya oove lyelye?”
54 Jesus okwe va nyamukula ta ti: “Ngeenge onde lifimanekifa, efimano lange olongaho. Tate oye ta fimanekifa nge, ou tamu ti kutya oye Kalunga keni.
55 Ashike kamu mu shii, ndele ame ondi mu shii. Ngeenge onda ti kandi mu shii, ohandi ningi omunaipupulu ngaashi nye. Ndele ondi mu shii nohandi diinine eendjovo daye.
56 Xo Abraham okwa li a teelela nodjuulufi efiku olo nda li handi ke uya; okwe li mona nokwa li a hafa.”
57 Opo nee Ovajuda ova tya kuye: “Mbela Abraham owe mu mona, ove uhe na natango omido 50?”
58 Jesus okwa tya kuvo: “Oshili ohandi mu lombwele, fimbo Abraham ina dalwa, ame opo ndi li nale.”
59 Onghee ova kufa omamanya ve mu kupule, opo nee Jesus okwa hondama, ndele ta di mo motembeli.
Eshangelo lopedu
^ Ile “pataleko lopanhu.”
