Job 1:1-22
1 Moshilongo shaUs omwa li omulumenhu wedina Job.* Okwa li omulumenhu omuyuki nomudiinini;* ha tila Kalunga noku tonde osho shii.
2 Okwa dala ovanamati vaheyali novanakadona vatatu.
3 Okwa li e na oufita weedi 7 000, eengamelo 3 000, eengobe 1 000* neendongi* 500 nosho yo ovapiya vahapu neenghono. Onghee okwa li a tumbala unene e dule ovanhu aveshe vokOushilo.
4 Keshe umwe womovanamati vaye okwa li ha kala e na oitelekela keumbo laye mefiku laye, olo la tulwa po.* Ova li hava shivi ovamwainakadona vavo vatatu va lye nova nwe pamwe navo.
5 Ngeenge omafiku oitelekela okwa pu ko, Job ohe va tumu ko, opo e va yapule. Opo nee oha fikama ongula inene nokuyambela keshe umwe womuvo omaxwikiloyambo. Molwaashi Job oha ti: “Pamwe ovanamati vange ova nyona nova tuka Kalunga momitima davo.” Job osho a li ha ningi ngaho alushe.
6 Efiku limwe, ofimbo ovanamati vaKalunga kashili* ve uya okufikama koshipala shaJehova, Satana okwa holoka yo mokati kavo.
7 Opo nee Jehova okwa pula Satana, a ti: “Oto di peni?” Satana okwa nyamukula Jehova, a ti: “Onda li nda ka elaela nokweendaenda kombada yedu.”
8 Jehova okwa tya kuSatana: “Owa didilika tuu* omupiya wange Job? Kombada yedu kaku na umwe e mu fa. Ye omulumenhu omuyuki nomudiinini,* ha tila Kalunga noku tonde osho shii.”
9 Opo nee Satana okwa nyamukula Jehova, a ti: “Mbela Job oha tila ashike Kalunga ngahenya?
10 Mbela ino tula po oshikelelifongubu shoku mu amena, osho she mu dingilila, eumbo laye naashishe osho e na? Owa nangeka noupuna oilonga yomake aye, noimuna yaye oya hapupala moshilongo.
11 Ashike nana eke loye, ndele to kufa po ashishe osho e na note ke ku tuka shili moipafi yoye.”
12 Opo nee Jehova okwa tya kuSatana: “Tala, oinima aishe oyo e na oi li meke loye.* Ashike omulumenhu ye mwene ino mu kuma neke loye!” Onghee Satana okwa dja po moipafi* yaJehova.
13 Mefiku olo, ofimbo ovanamati novanakadona vaJob va li tava li nokunwa omaviinyu meumbo lomumwainamati, ou a kula,
14 omutumwa okwe uya kuJob, ndele ta ti: “Eengobe oda li tadi pulula, neendongi oda li tadi li pomunghulo wado,
15 eshi Ovasaba va ponoka, ndele tave di kufa po, nova dipaa ovapiya neongamukonda. Aame andike nda xupa po ndi ku lombwele.”
16 Ofimbo a li ta popi natango, mukwao umwe okwe uya, ndele ta ti: “Omundilo wa dja kuKalunga* owa wa meulu, ndele tau xwike po nokulungwinifa po eedi nosho yo ovapiya! Aame andike nda xupa po ndi ku lombwele.”
17 Ofimbo a li ta popi natango, mukwao umwe vali okwe uya, ndele ta ti: “Ovakaldea ove litukula meengudu nhatu, ndele tava ponokele eengamelo noku di kufa po, nova dipaa ovapiya neongamukonda. Aame andike nda xupa po ndi ku lombwele.”
18 Ofimbo a li ta popi natango, mukwao umwe vali okwe uya, ndele ta ti: “Ovanamati novanakadona voye ova li tava li notava nu omaviinyu meumbo lomumwainamati, ou a kula.
19 Ombadilila, omhepo inene oye uya ya dja mombuwa, ndele tai denge eehuke nhee deumbo nola wila kombada yovanyasha, ndele tava file mo. Aame andike nda xupa po ndi ku lombwele.”
20 Opo nee Job okwa fikama, ndele ta pombaula oshikutu shaye nokwe likulula eexwiki komutwe waye; okwa wila pedu nokwe linyongamena,
21 ndele ta ti:
“Onda dile moshidalelo shameme hamunghele,Nohandi shuna hamunghele.
Jehova okwa pele nge, na Jehova okwa kufa nge.
Edina Jehova nali twikile okutangwa.”
22 Moinima aishe oyo, Job ina nyona, ile a vele Kalunga ombedi omolwoshinima keshe shii.*
Eshangelo lopedu
^ Tashi dulika tali ti “Oshishonekwa shOutondwe.”
^ Ile “omulumenhu ehe na etimba nomuyuki.”
^ Eln., “eengobe lwomapa 500.”
^ Eln., “eendongi deenghadi.”
^ Ile “keumbo lakeshe umwe molufo laye.”
^ Omupopyofano wOshiheberi tau ulike kovaengeli, ovanamati vaKalunga.
^ Eln., “tula omutima woye.”
^ Ile “omulumenhu ehe na etimba nomuyuki.”
^ Ile “mepangelo loye.”
^ Eln., “koshipala.”
^ Ile tashi dulika, “Okashelu.”
^ Ile “ina popila Kalunga mowii.”
