EKWAFO KOUKWANEUMBO
Nghee to dulu okukwafela okaana koye ka kale haka pondola mofikola
Okaana koye otashi dulika kehe na ko nasha nofikola, iha ke lihongo noiha ka ningi oifiilwalonga yako. Oshidjemo? Iha ka piti, nelihumbato lako ola naipala. Ongahelipi to dulu okukwafela okaana koye ka kale haka pondola mofikola?
Osho u na okushiiva
Omafininiko ohaa naipike oupyakadi. Okufininika okaana koye ohashi ka ningifa ka kale ke na oisho kofikola nosho yo keumbo. Opo ka kufe po ostresa, otashi dulika ka popye oipupulu, ka holeke odjapo yako, ka hopaenene nghee ho shaina podjapo yako, ile ka faule ofikola. Oupyakadi otau ka naipala ashike.
Okuyandja omaano otashi dulika shi ete oidjemo ii. Andrew, oo e li xe omudali, okwa ti: “Opo tu ladipike okamonakadona ketu otwa li twa ninga eenghendabala tu kale hatu ka pe omaano ngeenge ka pita nawa, ndele osho osha li ashike hashi ka ningifa ka yandje elitulemo komaano. Ngeenge ka dopa, oka li ha ka udu nai unene eshi inaka mona omaano shi dulife eshi ka dopa.”
Okuyandja ombedi kovahongi itashi kwafele okaana koye. Okaana koye otashi dulika ka fike pexulifodiladilo kutya ihashi pula eenghendabala okumona oidjemo iwa. Otashi dulika nako ka kale haka pe ombedi vakwao omolwomapuko ako nokukala ka teelela va kandule po omaupyakadi ako. Kakele kaasho, okaana koye itaka ka kala ke na eshiivo lasha eshi taka ka kula, sha hala okutya, okutambula ko oinakuwanifwa yeenghatu dako.
Osho to dulu okuninga
Pangela omaliudo oye. Ngeenge owa handuka, ino kundafana nokaana koye kombinga yoidjemo yako. Brett, xe omudali, okwa ti: “Ame nomukulukadi wange otwa mona oidjemo iwa eshi twa li twa ngungumana notwa yavelela.”
Efinamhango lopaMbiibeli: ‘Endelela okupwilikina, liteelela mokupopya, ove u liteelele mokuhanduka.’ — Jakob 1:19.
Didilika osho tashi eta oupyakadi. Okushindwa kofikola, okutembukila keefikola dimwe, okutila omakonakono, omaupyakadi moukwaneumbo, oku ha kofa nawa, okuhe na elandulafano, ile oku ha yandja elitulemo nako ohaku etifa oidjemo ii. Ino diladila kutya okaana koye iha ka dulu sha.
Efinamhango lopaMbiibeli: “Ou ta diinine ondjovo, ote ke limonena ouwa.” — Omayeletumbulo 16:20.
Konga onhele oyo tai wapalele okulihongela. Ninga elandulafano li na sha nokuninga oifiilwalonga nokulesha. Kala u na onhele omo okaana koye taka dulu okuningila oifiilwalonga yako nopehe na okupiyaanekwa (mwa kwatelwa o-tv nosho yo eengodi dopeke). Tukula efimbo lokuninga oifiilwalonga opo u kwafele okaana koye ka yandje elitulemo. Hector, xe omudali wokoGermany, okwa ti: “Ngeenge okaana oka pewa okakonakono, ohatu lesha po kashona efiku keshe ponhele yokuteelela komunute waxuuninwa.”
Efinamhango lopaMbiibeli: “Ashishe oshi notundi yasho ya pangelwa.” — Omuudifi 3:1.
Ka ladipika ke lihonge. Ngeenge okaana koye oka kala ke udite ko paife omauwa oo haa di mofikola, otaka ka kala ka halelela okulihonga. Pashihopaenenwa, omwaalu otau dulu oku ka kwafela ka dule okulongifa nawa oimaliwa.
Efinamhango lopaMbiibeli: “Lihapupalifila ounongo, likongela omayele! . . . U fimaneka.” — Omayeletumbulo 4:5, 8.
Osho to dulu okuninga: Kwafela okaana koye noshifiilwalonga shako, ndele ino ka ningila ko. Andrew okwa ti: “Okamonakadona ketu oha ka kala ka hala tu ka pe omanyamukulo, ndele iha ka kendabala oku a konga koovene.” Honga okaana koye nghee taka dulu okuninga oifiilwalonga ku ko vene.