Ahowe, omalongelokalunga aeshe inaa faafana. Ombiibeli oi na oihopaenenwa ihapu yomalongelokalunga, oo inaa hokiwa kuKalunga. Omalongelokalunga oo okwa tukulwa meengudu dopavali.

Ongudu 1: Okulongela oikalunga

 Ombiibeli oya popya kombinga yokulongela oikalunga ya longifa omautumbulilo ngaashi, “oikalunga yongaho” nosho yo kutya ‘itai dulu okukwafa’ sha. (Jeremia 10:3-5; 16:19, 20) Jehova a Kalunga okwa li a lombwela oshiwana shaIsrael shonale a ti: “Ino kala u noikalunga imwe koshipala shange.” (Exodus 20:3, 23; 23:24) Ngeenge Ovaisrael va li tava longele oikalunga, ‘ehandu lOmwene ola li hali va xwamene.’ — Numeri 25:3; Leviticus 20:2; Ovatokolipangeli 2:13, 14.

 Natango, etaleko laKalunga inali lunduluka li na sha nokulongela oinima “oyo hakutiwa ookalunga.” (1 Ovakorinto 8:5, 6; Ovagalati 4:8) Kalunga okwa lombwela ovo va hala oku mu longela va efe po okweendafana naavo ve li melongelokalunga loipupulu, a ti: “Djeni mo mokati kavo nokuliyoolola mo.” (2 Ovakorinto 6:14-17) Ngeenge omalongelokalunga aeshe okwa faafana nohaa ehenifa ovanhu kuKalunga, omolwashike Kalunga a yandja elombwelo olo?

Ongudu 2: Okulongela Kalunga kashili monghedi oyo ina hokwa

 Omafimbo amwe, Ovaisrael ova li hava longele Kalunga tava longifa omahongo nosho yo eenghedi daavo hava longele oikalunga. Ashike Jehova ka li a tambula ko onghedi ya tya ngaho yokulumbakanifa elongelokalunga lashili naali loipupulu. (Exodus 32:8; Deuteronomion 12:2-4) Jesus okwa li a tokola ovawiliki vomalongelokalunga vopefimbo laye omolwonghedi omo hava longele Kalunga. Ohave limonikifa kombada va fa tava longele Kalunga, ndele ovanaihelele ovo ohava “efa oinenenima yOmhango ngaashi ouyuki, onghenda noudiinini.” — Mateus 23:23.

 Sha faafana nokunena, elongelokalunga ashike olo la kanghamena koshili tali kwafele ovanhu va shiive Kalunga. Oshili ya tya ngaho, otai hangwa mOmbiibeli. (Johannes 4:24; 17:17; 2 Timoteus 3:16, 17) Omahongo omalongelokalunga oo itaa tu kumwe nOmbiibeli ohaa ehenifa ovanhu kokule naKalunga. Omahongo mahapu oo ovanhu hava diladila kutya okwa dja mOmbiibeli ongaashi oukwatatu, omwenyo ihau fi nosho yo okupya momundilo waalushe. Omahongo a tya ngaho, okwa dilila kwaavo hava longele oikalunga. Elongelokalunga olo hali xumifa komesho omahongo oo, ‘oloshimha,’ ile olongaho, molwaashi ola pingena po oiteelelwa yaKalunga neenghulunghedi domalongelokalunga. — Markus 7:7, 8.

 Kalunga oku tonde oihelele yomalongelokalunga. (Titus 1:16) Opo elongelokalunga li kwafele ovanhu va ehene popepi elela naKalunga, oli na oku va kwafela monghedi yavo yokukalamwenyo yakeshe efiku, ndele hakudiinina ashike eenghedindjikilile, ile omilandu dongaho. Pashihopaenenwa, Ombiibeli otai ti: “Ngeenge ope na ou ta diladila kutya oku li omulongelikalunga, ndele iha pangele elaka laye, ota pukifa omutima waye, nokulongela Kalunga kwaye okwongaho. Elongelokalunga olo la koshoka nolihe na edilo pataleko laKalunga Tate yetu oli na okufila oshisho eefiye novafiyekadi momaudjuu avo, noli na okulikaleka kokule nokuhenoukoshoki kwounyuni ou.” (Jakob 1:26, 27) Ombiibeli oya longifa outumbulilo ‘elongelokalunga la koshoka,’ tai ulike koshinima sha yela, sha hala okutya elongelokalunga lihe na oihelele.