Onda dalelwa moCiudad Obregón, shaMexico; otwa dalwa tu li omuwoi, ame omutitano. Otwa li hatu di koitukulwa yokomikandi oko tate a li e na ofaalama inini. Otwa li hatu hafele okukala oko, notwa li twa hangana tu li oukwaneumbo. Shi nyikifa oluhodi, eshi nda li ndi na omido nhano, ofaalama yetu oya li ya hanaunwa po koshikungulu notwa li twa tembukila kodoolopa imwe.

Tate okwa li a hovela oku shi endifa nawa pashimaliwa. Ashike pefimbo opo tuu opo, okwa li a ninga ongholwe. Osho osha li sha kuma ohombo yaye nosho yo fye. Otwa li twa hovela okushila omakaya oo twa li hatu vake kutate. Onda li nda kolwa oshikando shange shotete eshi nda li ndi na omido hamano. Konima yaasho, ovadali vetu ova li va topoka nelihumbato lange ola li la naipala.

Otwa ya nameme eshi a ka kala nomulumenhu umwe e lili. Omulumenhu oo ka li ha pe meme oimaliwa, noimaliwa oyo meme a li ha mono ka ya li hai tu wanene. Ame novamwaina vange otwa li hatu nyangadala penya naapenya, ashike ka twa li hatu mono oimaliwa ya wana. Onda li handi pushu eenghaku nokulandifa eemboloto, oifokundaneki, ouleke nosho tuu. Onda li yo handi kongo oikulya meendoloma doimbodi momaumbo ovakengeli.

Eshi nda li ndi na omido omulongo, omulumenhu umwe okwa shiva nge ndi ka longe naye ketoto loimbodi. Onda li nda dimina, ndele ofikola handi i tu okati nomeumbo onda dja mo. Okwa li ha futu nge odola efiku keshe noku pa nge oikulya oyo a toola. Onda li handi di meumbo olo nda tunga noimbodi oyo nda toola. Ovanhu ovo va li va dingilila nge ova li hava longifa elaka la honga nova li ve na onghalamwenyo inai koshoka. Vahapu ova li va pikwa koingangamifi nova li eengholwe. Osha li efimbo lidjuu monghalamwenyo yange nonda li handi lili oufiku keshe nokukala nda tila. Onda li nda fya ohoni molwaashi onda li ohepele nokanda li nda hongwa. Ketoto oko onda kala ko omido nhatu ndele handi tembukile kodoolopa imwe moMexico. Kodoolopa oyo onda li handi longo moshikunino; handi kona eengala, omundele, eemweenge nosho yo oihakautu.

Konima yomido nhee onda ka shuna koCiudad Obregón. Meme omumwaina watate, oo a li ondudu, okwa li a idilila nge. Onda li nda hovela okutwa eendjodi ditilifa nonda li nda kwatwa komadiladilo okulidipaa molwaashi onda li nda polimana. Oufiku umwe onda ilikana kuKalunga nda ti: “Omwene, ngeenge oko u li, onda hala oku ku shiiva nohandi ku longele fiyo alushe. Ngeenge oku na elongelokalunga lashili, onda hala oku li shiiva.”

Onda kala alushe nda hala okulihonga kombinga yaKalunga. Naashi nda li okaana, onda li handi i keengeleka di lili na di lili, ashike oda li da fifa nge ounye. Kada li hadi hongo kombinga yOmbiibeli ile di kwafele nge ndi shiive shihapu kombinga yaKalunga. Dimwe oda li nokuli hadi yandje unene elitulemo koimaliwa, ofimbo mu dimwe ovafita hava hondele.

Eshi nda li ndi na omido 19, shuwala shange umwe okwa li a lombwela nge kutya Eendombwedi daJehova ode mu ulikila osho Ombiibeli tai ti shi na sha nokulongifa oihongwafano. Okwa leshela nge Exodus 20:4, 5. Omushangwa oo owa ti katu na okulihongela oihongwafano. Ovelishe 5 oya ti: “Ino linyongamena moipafi yayo ndele ino i longela. Osheshi Aame Omwene Kalunga koye, Aame Kalunga omuladi.” Opo nee shuwala shange okwa pula nge a ti: “Ngeenge Kalunga oha longifa oihongwafano opo a longe oikumwifilonga ile a hala tu i longife eshi hatu mu longele, omolwashike a indika tuhe i longifa?” Osho osha ningifa nge ndi diladile moule. Konima yaasho, otwa li hatu kundafana oikundafanwa ya yoolokafana ya kanghamena kOmbiibeli. Onda li handi hafele eenghundafana odo neenghono nonda li ndi wete hadi pu diva.

Lwanima, otwa li twa ya naye kokwoongala kumwe kEendombwedi daJehova. Onda li nda kuminwa kwaasho nda li nda mona naasho sha li sha popiwa ko. Nokuli novanyasha ova li tava kufa ombinga, nokupopya oinima ya yela komutune! Onde lipopila nda ti, ‘Taa, omu na ovanhu va hongwa ngahelipi omu!’ Eendombwedi oda tambula nge ko nohamu nonande onda li ndi na eexwiki dile nokanda li ndi na eholokepo liwa. Oukwaneumbo umwe owa li wa shiva nge ndi ka lye pamwe navo ouvalelo konima yokwoongala oko.

Eshi nda konakona Ombiibeli nEendombwedi, onde lihonga kutya Jehova Kalunga oku li Xe omunahole oo e na ko nasha nafye kashi na nee mbudi kutya otu na oimaliwa i fike peni, tu na ondodo ya tya ngahelipi, twa dja momuhoko ulipi ile ngeenge otu na ouhongelwe wonhumba. Ke na onhondo nandenande. (Oilonga 10:34, 35) Onda li ndi udite ndi na ekwatafano paife naJehova. Kanda li vali ndi udite ndihe na oshilonga.

Onda li nda hovela okuninga omalunduluko manene! Onda efa po okushila omakaya, okulongifa nai oikolwifa nosho yo elaka la honga. Kanda li vali ndi na onghone; noihandi tu vali eendjodi ditilifa. Onda li nda itavela kutya kandi na oshilonga omolweenghalo didjuu odo nda pita mudo naashi inandi hongwa, ashike paife onda itavela kutya ondi na oshilonga nonda fimana.

Ondi na omukulukadi oo e hole Jehova noha yambidida nge. Paife ondi li omupashukilishikandjo, handi talele po omaongalo opo ndi twe ovamwatate novamwameme omukumo nosho yo oku va honga. Omolwekwafo lOmbiibeli, paife onda hongwa lela noinandi lifya vali ounye.