Eudeko la puka: Etomheno molwaashi Eendombwedi ihadi dana Okristmesa ololo kutya inava itavela muJesus.

 Oshili: Fye Ovakriste. Otwa itavela kutya ovanhu otava xupifwa ashike okupitila muJesus Kristus.—Oilonga 4:12.

 Eudeko la puka: Ohamu tukaula omaukwaneumbo eshi hamu hongo ovanhu kutya inava dana Okrismesa.

 Oshili: Otu na ko nasha neenghono nomaukwaneumbo, nohatu longifa Ombibeli opo tu a kwafele a kale a pama.

 Eudeko la puka: Ohamu pitililwa po kehafo olo hali di mokupaafana omaano, ombili oyo ohai kala mounyuni aushe nosho yo okuhalelafana omayambeko.

 Oshili: Ohatu kendabala okukala hatu yandje nokukala ovanambili efiku keshe. (Omayeletumbulo 11:25; Ovaroma 12:18) Pashihopaenenwa, onghedi omo hatu ningi okwoongala kwetu nosho yo omo hatu udifa, oi li metwokumwe nelombwelo laJesus olo kutya: “Onye mwa tambula oshali, yandjeni yo oshali.” (Mateus 10:8) Shikwao vali, ohatu yukifa elitulemo kOuhamba waKalunga molwaashi oo auke tau ka eta ombili kombada yedu.—Mateus 10:7.

•   Jesus okwe tu lombwela tu kale hatu dimbuluka efyo laye ndele hadalo laye.—Lukas 22:19, 20.

•   Ovayapostoli vaJesus novahongwa vaye vonale kava li va dana Okrismesa. O-New Catholic Encyclopedia oya ti kutya, “oshivilo shedalo laKristus osha li sha totwa po okudja mo 243 [O.P.],” konima yomido efele nasha okudja eshi ovayapostoli ava va xuuninwa ko va fya.

•   Kape na oumbangi oo tau ulike kutya Jesus okwa dalwa mo 25 Desemba; efiku ledalo laye inali shangwa mo mOmbibeli.

•   Otwa itavela kutya Okrismesa inai tambulwa ko kuKalunga molwaashi oya kanghamena keenghedi nokomaitavelo oshipaani.—2 Ovakorinto 6:17.

 Vahapu otava twikile okudana Okrismesa nonande ove shii kutya oya kanghamena komifyuululwakalo doshipaani noitai yambididwa kOmbibeli. Ovanhu va tya ngaho otashi dulika va pule kutya: Omolwashike Ovakriste vamwe inava hala okudana Okrismesa ngaashi ovanhu aveshe? Omolwashike ve na okukala tave lipula shi na sha nokuhadana Okrismesa?

 Ombibeli oye tu ladipika tu kale hatu diladila fye vene, hatu longifa “eenghono detu dokudiladila.” (Ovaroma 12:1, 2, NW) Otai tu hongo tu kale twa lenga oshili. (Johannes 4:23, 24) Ndele nonande otu na ohokwe monghedi omo vamwe have tu tale ko, ohatu kanyatele komafinamhango Ombibeli nonande otashi tu ningifa tu kale twa yooloka ko kuvamwe.

 Nonande fye vene ihatu dana Okrismesa, otwa fimaneka oufemba wakeshe umwe wokuhoolola osho a hala okuninga moshinima osho. Ihatu lidopo mokudana kwavamwe Okrismesa.