Kũbatithio nĩ kuuga mũndũ kũrikio maĩ-inĩ agacoka akaumĩra. a Ũndũ ũcio nĩ ũratũteithia kũmenya kĩrĩa gĩatũmire Jesu abatithĩrio rũũĩ rũrĩ na maĩ maingĩ. (Mathayo 3:13, 16) O ũndũ ũmwe na ũcio, hĩndĩ ĩrĩa mũndũ ũmwe Mũethiopia ooririe abatithio, we hamwe na Filipu ‘maaingĩrire maĩ-inĩ.’—Atũmwo 8:36-40.

Ũrĩa kũbatithio kuugĩte

 Bibilia ĩringithanagia kũbatithio na gũthikwo. (Aroma 6:4; Akolosai 2:12) Kũbatithio na maĩ kuonanagia mũndũ gũkua ũtũũro-inĩ wake wa hau kabere na kwambĩrĩria ũtũũro mwerũ arĩ Mũkristiano wĩyamũrĩire Ngai. Kũbatithio, o hamwe na makinya marĩa mũndũ oyaga nĩguo abatithio, nĩ mũbango wa Ngai wa gũteithia mũndũ agĩe na thamiri theru kũgerera igongona rĩa Jesu Kristo. (1 Petero 3:21) Nĩkĩo Jesu aarutanire atĩ no mũhaka arutwo ake mabatithagio.—Mathayo 28:19, 20.

Hihi kũbatithio na maĩ nĩ gũtheragia mehia?

 Aca. Bibilia ĩrutanaga atĩ no thakame ya igongona rĩa Jesu ĩngĩtheria mũndũ mehia. (Aroma 5:8, 9; 1 Johana 1:7) No nĩguo mũndũ agunĩke nĩ igongona rĩa Jesu, no mũhaka onanie wĩtĩkio harĩ Jesu, acenjie ũtũũro wake ũringane na morutani ma Jesu, na abatithio.—Atũmwo 2:38; 3:19.

Hihi Bibilia nĩ ĩrutanaga atĩ ciana nĩ ciagĩrĩire kũbatithio?

 Aca ndĩrutanaga ũguo. Ũhoro wa ciana kũbatithio ndũrĩ thĩinĩ wa Bibilia. Kanitha imwe nĩ ciĩkaga igongona rĩa kũbatithia mwana, na njĩra ya kũmũminjaminjĩria maĩ kana kũmũitĩrĩria maĩ mũtwe, agacoka akaheo rĩĩtwa. Ũbatithio wa Gĩkristiano nĩ wa arĩa marĩ na ũhoti wa gũtaũkĩrũo na gwĩtĩkia “ũhoro mwega wa Ũthamaki wa Ngai.” (Atũmwo 8:12) Mũndũ atanabatithio no mũhaka aigue Kiugo kĩa Ngai, agĩtĩkĩre, na erire, no mwana mũnini ndangĩhota gwĩka maũndũ macio.—Atũmwo 2:22, 38, 41.

 Makĩria ma ũguo, Bibilia nĩ yonanagia atĩ Ngai nĩ onaga ciana cia Akristiano irĩ theru, nĩ ũndũ wa wĩhokeku wa aciari a cio. (1 Akorintho 7:14) Angĩkorũo ũbatithio wa ciana nĩ mwĩtĩkĩrĩku, Ngai ndangĩbatara kuona ciana icio irĩ theru nĩ ũndũ wa wĩhokeku wa aciari a cio. b

Mawoni mahĩtanu megiĩ ũbatithio wa Gĩkristiano

 Mawoni mahĩtanu: Kũminjaminjĩria mũndũ maĩ kana kũmũitĩrĩria maĩ mũtwe no ũndũ ũmwe na kũmũrikia maĩ-inĩ.

 Ũrĩa kũrĩ: Andũ arĩa othe magwetetwo thĩinĩ wa Bibilia maabatithirio, nĩ kũrikio maarikirio maĩ-inĩ. Kwa ngerekano rĩrĩa Filipu aabatithagia mũndũ ũrĩa Mũethiopia, ‘maaingĩrire maĩ-inĩ’ nĩguo amũbatithie. Thutha ũcio, ‘makiumĩra maĩ-inĩ.’—Atũmwo 8:36-39. c

 Mawoni mahĩtanu: Bibilia yonanagia atĩ o na ciana nĩ ciabatithagio hĩndĩ ĩrĩa andũ othe a nyũmba ĩmwe maabatithagio. Kwa ngerekano yugaga ũũ igũrũ rĩgiĩ mũrangĩri ũmwe warĩ Filipi: “Thutha ũcio akĩbatithio marĩ hamwe na andũ othe a nyũmba yake.”—Atũmwo 16:31-34.

 Ũrĩa kũrĩ: Rũgano rũu rwa ũrĩa mũrangĩri ũcio aatuĩkire Mũkristiano, ruonanagia atĩ arĩa othe maabatithirio a nyũmba yake nĩ maataũkĩirũo nĩ “kiugo kĩa Jehova,” na nĩ ‘maakenire mũno.’ (Atũmwo 16:32, 34) Ũndũ ũcio ũratũteithia kuona atĩ mwana o wothe warĩ nyũmba ya mũrangĩri ũcio ndangĩabatithirio, tondũ ndangĩataũkĩirũo nĩ kiugo kĩa Jehova.

 Mawoni mahĩtanu: Jesu aarutanire ũbatithio wa ciana rĩrĩa ooigire atĩ Ũthamaki nĩ wa arĩa matariĩ ta ciana.—Mathayo 19:13-15; Mariko 10:13-16.

 Ũrĩa kũrĩ: Jesu ndaaragia ũhoro wa ũbatithio rĩrĩa ooigire ciugo icio. Eendaga kuonania atĩ nĩguo mũndũ akaagaya Ũthamaki wa Ngai, no mũhaka akorũo arĩ mwĩnyihia na eharĩirie kũrutwo, o ta kaana.—Mathayo 18:4; Luka 18:16, 17.