Hihi nĩ ũndũ ũtangĩhoteka atĩ arĩa makuĩte nĩ magaatũũra rĩngĩ? Ũguo tiguo mũtũmwo Paulo onaga. Aandĩkire ũũ atongoretio na roho: “Kũngĩgĩkorũo kwĩrĩgĩrĩra kũrĩa twĩrĩgĩrĩire Kristo gũkoniĩ o muoyo ũyũ tũtũire-rĩ, ithuĩ tũrĩ a kũũmĩrũo tha gũkĩra andũ arĩa angĩ othe. No rĩrĩ, ũrĩa kũrĩ, nĩ atĩ Kristo nĩariũkĩtio akoima kũrĩ arĩa akuũ, agagĩtuĩka mũtũrio [kana maciaro ma mbere] wa andũ arĩa makomete.” (1 Akorintho 15:19, 20) Paulo aarĩ na ma biũ atĩ andũ nĩ makaariũkio. Ũndũ ũcio wekĩrirũo hinya kũgerera kũriũkio kwa Jesu Kristo. * (Atũmwo 17:31) Nĩkĩo Paulo eetire Jesu “mũtũrio” kana maciaro ma mbere, tondũ nĩwe warĩ wa mbere kũriũkio akĩgĩa na muoyo wa tene na tene. Angĩkorũo Jesu aarĩ wa mbere-rĩ, no mũhaka kũngĩkorũo na angĩ.

Nĩ kũrĩ ũndũ ũngĩ ũngĩtũma ũkorũo na ma atĩ andũ nĩ makaariũkio. Jehova nĩ Ngai waragia ma. ‘Ngai ndangĩheenania.’ (Tito 1:2) Jehova ndarĩ aaheenania, na gũtirĩ hĩndĩ akaaheenania. Hihi no atũhe kĩĩrĩgĩrĩro atĩ arĩa makuĩte nĩ makaariũkio, o na onanie atĩ no ahote kũmariũkia, acoke age kũhingia kĩĩranĩro kĩu? Ũcio nĩ ũndũ ũtangĩhoteka!

Jehova abangĩte gũkaariũkia andũ nĩkĩ? Tondũ nĩ amendete. Ayubu oririe ũũ: ‘Mũndũ aakua-rĩ, nĩkũngĩhoteka acoke muoyo rĩngĩ? Hĩndĩ ĩo wetana, na niĩ ndagwĩtĩka; nĩ kwĩrirĩria ũngĩkorũo ũkĩĩrirĩria wĩra ũyũ wa moko maku.’ (Ayubu 14:14, 15) Ayubu aarĩ na ma biũ atĩ Ithe wa igũrũ ũrĩ wendo nĩ angĩkerirĩria kũmũriũkia. Hihi Ngai nĩ agarũrũkĩte? “Niĩ [Jehova] ndigarũrũkaga.” (Malaki 3:6) Ngai no eriragĩria kuona andũ arĩa makuĩte macokete muoyo, marĩ na ũgima mwega wa mwĩrĩ na marĩ na gĩkeno. No ta ũrĩa mũciari o wothe ũrĩ wendo angĩenda kuona mwana wake rĩngĩ angĩkua. Ngũrani nĩ atĩ Ngai  arĩ na ũhoti wa kũhingia ũndũ ũcio eriragĩria.—Thaburi 135: 6.

Jehova nĩ akaahee Mũrũ wake hinya nĩguo arehe gĩkeno kĩnene kũrĩ arĩa macakayaga nĩ ũndũ wa gũkuĩrũo nĩ endwa ao. Ĩ nake Jesu aiguaga atĩa ũhoro-inĩ ũcio wa andũ kũriũkio? Atanariũkia Lazaro, Jesu nĩ onire ruo rũrĩa aarĩ a nyina na Lazaro o hamwe na arata ao maarĩ naruo, na “akĩrĩra maithori.” (Johana 11:35) Hĩndĩ ĩngĩ Jesu nĩ aacemanirie na mũtumia wa ndigwa kuuma Naini, ũrĩa wakuĩrĩirũo nĩ mũrũ wake wa mũmwe. Jesu “akĩmũiguĩra tha akĩmwĩra atĩrĩ, Tiga kũrĩra.” O hĩndĩ ĩyo akĩriũkia mwanake ũcio. (Luka 7:13) Kwoguo Jesu nĩ atuuragwo mũno nĩ ũndũ wa kĩeha o na gĩkuũ. Na githĩ ndagagĩkena mũno rĩrĩa akaagarũra kĩeha gĩtuĩke gĩkeno thĩinĩ wa thĩ yothe!

Hihi ũrĩ wanyitwo nĩ kĩeha? Wahota kuona ta gĩkuũ arĩ thĩna ũtangĩkorũo na kĩhonia. No kũrĩ na kĩhonia—Ngai nĩ akaahũthĩra Mũrũ wake kũriũkia andũ. Ririkana atĩ Ngai nĩ arenda wee ũkoona kĩhonia kĩu. Arenda ũgaakorũo kuo ũhĩmbĩrie rĩngĩ andũ arĩa wendete.Ta hũũra mbica mũkĩbanga hamwe nao maũndũ ma ihinda rĩũkĩte tene na tene, gũtarĩ hĩndĩ ĩngĩ mũgaatigana!

Lionel ũrĩa ũkũgwetetwo, oigire ũũ: “Thutha-inĩ nĩ ndeerutire atĩ andũ nĩ makaariũkio. Kĩambĩrĩria-inĩ warĩ ũndũ mũritũ gwĩtĩkia ũhoro ũcio, na ndiehokaga mũndũ ũrĩa wanjĩrĩte ũndũ ũcio. No nĩ ndetuĩrĩirie thĩinĩ wa Bibilia na ngĩona atĩ ũhoro ũcio warĩ wa ma! Nĩ ndĩĩriragĩria mũno gũkona guka witũ rĩngĩ.”

Hihi no wende kũmenya ũhoro makĩria? Aira a Jehova no makene mũno gũkuonia thĩinĩ wa Bibilia yaku mwene kĩrĩa gĩtũmaga makorũo na ma biũ atĩ andũ nĩ makaariũkio. *