Kũguũrĩrio kwa Johana 11:1-19
11 Na ngĩneo ithanjĩ rĩatariĩ ta rũthanju*+ na akĩnjĩra atĩrĩ: “Ũkĩra ũthime harĩa hatheru ha hekarũ ya Ngai o na kĩgongona hamwe na arĩa mathathayagĩria kuo.
2 No ũhoro-inĩ wĩgiĩ nja ya harĩa hatheru ha hekarũ, ũmĩtige ũguo na ndũkamĩthime, tondũ nĩ ĩheetwo ndũrĩrĩ, na nĩ ikũrangĩrĩria itũũra rĩrĩa itheru+ rungu rwa magũrũ ma cio ihinda rĩa mĩeri 42.+
3 Nĩ ngaatũma aira akwa erĩ marathe mehumbĩte nguo cia makũnia ihinda rĩa thikũ 1,260.”
4 Acio mahaananĩtio na mĩtĩ ĩrĩa ĩĩrĩ ya mĩtamaiyũ+ na mĩtĩ ĩrĩa ĩĩrĩ ya kũigĩrĩrũo matawa+ na marũgamĩte mbere ya Mwathani wa thĩ.+
5 Mũndũ o wothe angĩenda kũmeka ũũru, mwaki uumaga tũnua-inĩ twao na ũkaniina thũ ciao. Mũndũ o wothe angĩgeria kũmeka ũũru, ũguo nĩguo agĩrĩire kũũragwo.
6 Acio marĩ na wathani wa kũhinga igũrũ+ nĩguo gũtikoire mbura+ matukũ-inĩ marĩa mararatha, na marĩ na wathani igũrũ rĩa maĩ, wa kũmatua thakame+ na kũhũũra thĩ na mahũũra ma mĩthemba yothe maita maingĩ o ta ũrĩa mangĩenda.
7 Na marĩkia kũruta ũira, nyamũ ya gĩthaka ĩrĩa yaambatire ĩkiuma thĩinĩ wa irima rĩrĩa rĩtarĩ gĩturi* nĩ ĩkaarũa nao na ĩmatoorie na ĩmorage.+
8 Nacio ciimba ciao igaakorũo njĩra-inĩ nene ya itũũra rĩrĩa inene rĩtagwo na njĩra ya kĩĩroho Sodomu na Misiri, o kũrĩa Mwathani wao o nake ooragĩirũo mũtĩ igũrũ.
9 Nacio ikundi cia andũ na mĩhĩrĩga na thiomi na ndũrĩrĩ nĩ ikeerorera ciimba ciao ihinda rĩa thikũ ithatũ na nuthu,+ na itigeetĩkĩria ithikwo thĩinĩ wa mbĩrĩra.
10 Nao andũ arĩa matũũraga thĩinĩ wa thĩ nĩ magaakena nĩ ũndũ wao na makũngũĩre, na matũmanĩre iheo mũndũ na ũrĩa ũngĩ, tondũ aira acio erĩ nĩ maanyariraga arĩa matũũraga thĩinĩ wa thĩ.
11 Thutha wa thikũ icio ithatũ na nuthu, roho wa muoyo kuuma kũrĩ Ngai ũkĩingĩra thĩinĩ wao,+ makĩrũgama na magũrũ mao, na arĩa maamonire makĩnyitwo nĩ guoya mũnene.
12 Na makĩigua mũgambo mũnene kuuma igũrũ wameera atĩrĩ: “Ambatai mũũke gũkũ.” Nao makĩambata igũrũ marĩ thĩinĩ wa itũ, na thũ ciao ikĩmona.*
13 Ithaa o rĩu gũkĩgĩa gĩthingithia kĩnene, na gĩcunjĩ gĩa ikũmi gĩa itũũra rĩu gĩkĩgwa; na andũ 7,000 makĩũragwo nĩ gĩthingithia kĩu, nao arĩa maatigarire magĩĩtigĩra na makĩgooca Ngai wa igũrũ.
14 Haaro ya kerĩ+ nĩ yahĩtũka. Na rĩrĩ, haaro ya gatatũ nĩ ĩgũka o narua.
15 Mũraika wa mũgwanja akĩhuuha karumbeta gake.+ Na gũkĩgĩa na mĩgambo mĩnene igũrũ, ĩroiga ũũ: “Ũthamaki wa thĩ nĩ ũtuĩkĩte Ũthamaki wa Mwathani witũ+ o na wa Kristo wake,+ nake egwathana arĩ mũthamaki tene na tene.”+
16 Nao athuri arĩa 24+ maaikarĩire itĩ ciao cia ũnene mbere ya Ngai makĩĩgũithia magĩturumithia mothiũ mao thĩ na magĩthathaiya Ngai,
17 makiugaga atĩrĩ: “Tũragũcokeria ngatho, wee Jehova* Ngai, Mwene-Hinya-Wothe, o wee ũkoragwo ho+ na nowe warĩ ho, tondũ nĩ woete hinya waku mũnene na ũkambĩrĩria gwathana ũrĩ mũthamaki.+
18 No ndũrĩrĩ ikĩng’ũrĩka, namo mang’ũrĩ maku magĩũka, o narĩo ihinda rĩrĩa rĩatuĩtwo rĩgĩkinya rĩa gũtuĩra arĩa akuũ na rĩa kũhe ngombo ciaku anabii+ ngerenwa+ o na arĩa aamũre na arĩa metigĩrĩte rĩĩtwa rĩaku, arĩa anini na arĩa anene, na rĩa kwananga arĩa manangaga thĩ.”+
19 Naho harĩa hatheru ha hekarũ ya Ngai kũu igũrũ hakĩhingũka, narĩo ithandũkũ rĩa kĩrĩkanĩro gĩake rĩkĩoneka thĩinĩ wa harĩa hatheru ha hekarũ yake.+ Na gũkĩgĩa mĩhenũko ya rũheni na mĩgambo na marurumĩ na gĩthingithia na mbura nene ya mbembe.
Tũũhoro twa magũrũ-inĩ
^ Kana “rũthanju rwa gũthima.”
^ Kana “abiso.” Rora Ũthathaũri wa Ciugo.
^ Kana “nĩ cieroragĩra.”
^ Rora Ũhoro Muongerere A5.
