Isỹ mur ja nĩ, ẽmã sĩ tỹ Saxônia, República Democrática Alemã ki. Inh ĩn ki, ẽg tỹ jagnẽ to há tãvĩ tĩ vã. Inh mỹnh fag tỹ inh kanhrãnrãn ja nĩgtĩ, sỹ tỹ ũn jykre há ke nĩ vã. Ti kar vỹ Saxônia ki ag tỹ religião to jykrén tũg nĩ vã. Hã tugnĩn, inh pi Topẽ kri fi tĩ mỹr. Isỹ prỹg tỹ 18 nĩn kã, nén ũ régre ag inh krĩ vẽnh mỹ han ja: isỹ Topẽ kri fig tũ kar comunismo kri fig tĩ vã.

Inh mỹ ne to comunismo vỹ tỹ nén ũ há kãfór nĩ vã? Comunismo vỹ ẽg ki kanhrãn ja, ti kar vỹ jagnẽ ri ke nỹtĩ vã. Isỹ tag to há nĩ vã. Isỹ to jykrén tĩ vã, vẽnh kar vỹ nén ũ há nỹtĩ vã. Kỹ ũn ag tỹ ri ke nỹtĩ mũ vã. Hã tugnĩn, isỹ prỹg tỹ 14 nĩn kã, isỹ ũn kyrũ kar ũn tỹtá fag tỹ tỹ comunista mré rãnhrãj ja nĩ. Pãꞌi ag tỹ ẽmã tỹ Aue ki, isỹ hã tá ẽmã tĩ vã, inh rãnhrãj to há tãvĩ sir. Hã tugnĩn ag tỹ inh mỹ prêmio nĩm ja nĩ. Jérĩn mỹ isỹ tỹ ũn kyrũ nĩ, isỹ político comunista e ag ki kanhró nĩ ha. Inh mỹ, isỹ ẽmĩn há kri tĩg nĩ sir.

Vẽsỹmér ke tĩ, nén ũ kar ke kãn, 1989 ki, Berlim jy ró vỹ kutẽ ja nĩ. Kar pãꞌi ag tỹ comunista Europa tá tỹ tũꞌ ke gé. Tag vỹ inh mỹ e ja nĩ. Hã ra nén ũ kórég tag krỹg ke tũ nĩ. Tag pãte isỹ ki kanhró mũ, pãꞌi ag tỹ inh país ki tỹ ũn ag mỹ nén ũ kórég hyn han tĩ vã. Ũn ag tỹ comunismo to há tũg kỹ, ti tỹ tỹ to é he ja nĩ vã. Kỹ isỹ vẽso jykrén nĩ vã: ‘Tag ne to hẽn ri ke tĩ? Comunista ag tóg ẽg mỹ tó ja nĩ, vẽnh kar vỹ jagnẽ ri ke nỹtĩ vã. Comunista mỹ ẽg mỹ ón kỹ kãmén nĩ hẽn?’ Nén ũ kar tag vỹ inh krĩ kufy han mũ.

Isóg vãkyr kar kãgrá tãvĩn to jykrén mũ sir. Isỹ vãkyr to kanhrãn tĩ vã, kar tag to kanhrãn kãfór sór tĩ vã, faculdade ki. Isóg inh mỹnh fag tỹ nén ũ há to inh kanhrãn ja ag tovãnh mũ sir. Vãhã isỹ kanhir tãvĩ sór mũ kar ũn tỹtá e nĩ. Jérĩn mỹ isỹ nén ũ kórég tag ag hyn han tĩ vã, isỹ nén ũ tỹ hẽn ri kenh ke mũ ag kamẽg tĩ vã. Isỹ kãgrá han ja ẽn ag vỹ ũn ag mỹ ven nĩ vã, isỹ kamẽg nĩ vã. Isỹ vẽso jykrén nĩ vã: ‘Ne nỹ inh mỹ hẽn ri kenh ke mũ? Ne tugnĩn ẽg vỹ nỹtĩg ti?’

Isỹ nén ũ tag ag ki kanhrãn há kỹ, tóg inh mỹ há han mũ. Iskóra tá, isỹ inh mré ke ag jagnẽ mré vãmén tĩ vã, nén ũ ag tỹ hẽn ri kenh ke mũ ti to. Mandy * fi tỹ tỹ Jeová Kãmén fã nĩ vã. Kỹ fi tóg inh jyvẽn mũ, isỹ nén ũ tag ag tugnỹm há han jé, Topẽ Vĩ Rá ki.

Jérĩn mỹ inh pi tag kri fig tĩ vã, isóg Mandy fi vĩ jẽmẽ mũ. Fi vỹ vẽnh rá tỹ Daniel 2 mág inh mỹ ven mũ, Topẽ Vĩ Rá ki. Tag tóg inh mỹ e tĩ. Vẽnh rá tag vỹ inh mỹ ven tĩ, ũri ẽg tỹ ẽprã ke pãꞌi e ag krẽm ke nỹtĩ ke mũ vẽ. Fi vỹ inh mỹ ven ke mũ gé, Topẽ Vĩ Rá kãki, nén ũ ag tỹ ẽg mỹ hẽn ri kenh ke mũ ti. Vãhã isỹ nén ũ ẽn ag ki kanhrãn há nĩ vã. Kỹ, isỹ Topẽ Vĩ Rá tỹ nén tó ja ẽn ag to jykrén mũ: ‘Ũ nẽ nén ũ tỹ hẽn ri kenh fã ki hã kãmén tĩ? Mỹ Topẽ nĩ hẽn?’

Mandy fi vỹ inh mỹ Horst kar Angelika ven mũ. Fag tỹ tỹ Jeová Kãmén Fã nỹtĩ vã, kar inh mỹ kanhrãnrãn kãfór mũ, Topẽ Vĩ Rá to. Kỹ ki kanhrãn mỹ inh, Jeová Kãmén Fã tãvĩn tỹ ũn ag mỹ kãmén tĩ, Topẽ jyjy tỹ tỹ Jeová nĩ. Isóg ki kanhrãn mũ gé, Ga há ki ẽg tỹ rĩr krỹg ja tũ ẽn venh ke mũ. Tag vỹ Jeová jykre nĩ. Salmo 37:9 vỹ ẽg mỹ ke tĩ: “Ũ tỹ TOPẼ hã ki ẽvãnh mũ ag tóg jatun mỹ ti tỹ ag mỹ ga há ven ke ẽn ki nỹtĩnh ke mũ.” Isỹ ki kanhrãn kỹ, ũn tỹ Topẽ vĩ jẽmẽ há han mũ ag tỹ rĩr krỹg ja tũ venh ke mũ, tag vỹ inh mỹ há tãvĩ han mũ.

Hã ra isỹ Topẽ jykre han jé, inh mỹ jagy tãvĩ ja nĩ, isóg vãsãn tãvĩ mũ. Inh jykre ki, isỹ tỹ ũn ag kãfór nĩ vã, inh vãkyr ag kar inh kãgrá ag tugnĩn. Kỹ, isỹ vẽsỹ ũn mág han sór tũ ke nĩ vã. Inh mỹ jagy tãvĩ nĩ vã, ũn tỹtá ẽn ag tugvãnh tĩ gé. Hã ra ẽg tỹ vãsãnsãn kỹ, Topẽ vĩ ki króm jé, ti tỹ tag ve tĩ. Ti tóg inh mỹ vẽnh pãte fón mũ, hã tugnĩn isỹ Jeová agradecer ke tĩ.

Isỹ prỹg tỹ 18 jo, inh pi Jeová kri fi nĩ vã, comunismo inh krĩn konãn ja tugnĩn.Tag pãte, isóg Topẽ Vĩ Rá ki króm mũ. Nén ũ to kanhrãn ja ẽn ag vỹ inh tar han mũ. Kỹ, isỹ nén ũ ag tỹ hẽn ri kenh fã kamẽg tũ nĩ vã. Prỹg tỹ 1993 ki, isóg vẽnh kype mũ. Kỹ isóg Jeová Kãmén Fã vẽsỹ han mũ. Prỹg tỹ 7 ke kar, isóg ũn há fi tỹ prũg mũ. Fi jyjy tỹ tỹ Tabitha nĩ. Ũri ẽg tỹ vãsãnsãn tãvĩ tĩ, ũn ag mỹ Topẽ vĩ to kãmén jé. Ag tỹ comunismo to jykrén tĩ kar Topẽ kri fi tũ nỹtĩ. Inh mỹ há tãvĩ tỹ tĩ, isỹ ũn ag ajũna ken kỹ, ag tỹ Jeová ki kanhró kãfór jé.

Isỹ Topẽ Vĩ Rá to kanhrãn nĩn kỹ, Jeová Kãmén Fã ag mré, inh mỹnh fag tỹ krĩ kufy gy nỹtĩ vã. Hã ra pipir tỹ pipir fag tóg vigvég mũ, tag vỹ inh mỹ há nĩ vã. Ũri fag tỹ Topẽ Vĩ Rá to jẽn tĩ gé. Kỹ, fag tỹ jagnẽ venhmãn nỹtĩ, Jeová Kãmén Fã ag mré. Hã tugnĩn, isỹ mỹ sér tãvĩ nĩ.

Inh kar Tabitha fi ẽg tỹ mỹ sigsér nỹtĩ, ẽg vẽnh prũg ki, ẽg tỹ Topẽ Vĩ Rá ki króm nĩn kỹ. Ha to jykrén nĩ: Topẽ Vĩ Rá vỹ ũn prũg ja mỹ ge tĩ, ag tỹ jagnẽ to há tãvĩ jé. Kỹ, fag tỹ vẽnh jyvẽn há tag jẽmẽ kỹ, tag vỹ vẽnh prũg tar han tĩ.​ — Hebreu 13:4.

Ũri, isỹ nén ũ tỹ hẽn ri kenh fã kamẽg tũg nĩ. Isỹ mỹ sér nĩ, Jeová Kãmén Fã ag kãmĩ. Jeová Kãmén Fã ag tỹ tỹ família ri ke nĩ, ẽmã kar ki. Ẽg tỹ jagnẽ mré há kar nỹtĩ. Isỹ mỹ há pẽ tag tugnĩn.