Bantu fioti mpamba ke vandaka ti bikalulu ya mbote. Bambefo ya kukonda luzitu ke nganinaka badoktere; bantu yina ke kwendaka kudia na barestora ke zitisaka ve bantu yina ke pesaka bantu madia; bantu ya ke salaka nzietelo na ba-avio ke zitisaka ve bansiku mpi bo ke nwanisaka bantu yina ke sadisaka bantu na ba-avio; bana ke salaka mambu ya mbi na nzo-nkanda mu mbandu kuvweza balongi na bo, kubangisa bo mpi kunwanisa bo; mpi bantu ya nkaka ya politiki ke sala mambu ya mbi kansi bankaka ke sosa kumonisa nde bo mpamba ke sadilaka kibeni bantu mambu ya mbote.

 Biblia kele mukanda ya kutudila ntima yina ke sadisaka bantu na kuvanda ti bikalulu ya mbote. Yo ke tendulaka mpi sambu na nki bubu yai bantu mingi ke zitisaka ve bantu ya nkaka.

 Kukonda kuvanda ti bikalulu ya mbote mu mbandu kusala mambu ya mbote, ya ke monisa bikalulu ya mbote mpi yina bantu ke ndimaka, ke monana bubu yai na nsi-ntoto ya mvimba.

•   Rapore mosi ke monisa nde bantu ya Amerika ke ndimaka nde bantu ya ke zingaka na États-Unis ke vandaka diaka ve ti bikalulu ya mbote bilumbu yai, kana beto fwanisa yo ti mpila bantu vandaka bamvula 22 me luta.

•   Bo salaka enketi mosi na bantu 32 000 ya ke zingaka na bansi 28. Mingi na kati na bo tubaka nde bantu fioti mpamba ke vandaka ti bikalulu ya mbote bubu yai.

 Biblia tubilaka bikalulu ya bantu ya beto ke mona bubu yai.

•   “Na bilumbu ya nsuka ta vanda mpasi mingi. Bantu ta zolaka bantu ya nkaka ve, bo ta zolaka kaka mbongo; bo ta kuditulaka, bo ta vandaka lulendo mingi; bo ta vwenzaka Nzambi, bo ta tulaka ntu-ngolo na batata ti bamama na bo; bo ta zabaka kupesa mersi ve; . . . bo ta vandaka nku mingi, bo ta zingaka kaka na kimbeni.”​—2 Timoteo 3:1-3, Bible en Kituba.

 Sambu na kuzaba mambu mingi ya me tala mpila mambu yai ya Biblia tubaka na ntwala ya ke lungana, tanga disolo “Keti Biblia Tubilaka Dezia Mambu Yina Bantu Ke Yindula mpi Ke Sala Bubu Yai?”

 Na ntoto yai ya bantu ke sala mambu ya mbi mingi, bamilio ya bantu me bakisaka nde Biblia kele mukanda yina lenda sadisa beto na kuvanda ti bikalulu ya mbote. Bandongisila na yo “me fwana na kutudila yo ntima ntangu yonso, bubu yai mpi kimakulu.” (Nkunga 111:8) Beto tadila mwa bambandu:

•   Mambu yina Biblia ke tubaka: “Mambu yonso yina beno ke zola nde bantu kusadila beno, beno mpi beno fwete sadila bo yo.”​—Matayo 7:12.

   Ntendula: Beto fwete zitisa bantu ya nkaka mpi kusadila bo mambu na mawete, kaka mpila beto ke zolaka nde bo sadila beto yo.

•   Mambu yina Biblia ke tubaka: “Ntangu yai ya beno me losa luvunu, konso muntu kutubila nkweno na yandi kieleka.”​—Baefezo 4:25.

   Ntendula: Beto fwete vanda ntangu yonso masonga na mambu ya beto ke tuba mpi ke sala.

 Sambu na kuzaba mambu mingi na yina me tala diambu yai, beto ke lomba nge na kutanga:

•   Nzozulu ya Nkengi ya kele ti ntu-diambu “Mambu ya Mbote Mpi ya Mbi—Inki Lenda Sadisa Nge na Kuzaba Yo”

•   Disolo “Kuzitisa Mambu ya Ke Salaka nde Bantu Kuvanda Ve Kiteso Mosi​—Mutindu Biblia Lenda Sadisa.”