Bingana 20:1-30
20 Vinu ke sekaka bantu,+ mpila ya kuyala malafu yina ke lawusaka ke vandaka ve;+Muntu yina yo ke vidisaka nzila kele mayele ve.+
2 Boma ya ngolo yina ntotila ke pesaka kele bonso kungana ya ntambu;*+Muntu yina ke pesa yandi makasi ke tula luzingu na yandi na kigonsa.+
3 Yo kele lukumu sambu na muntu kana yandi ke buya kuswana,+Kansi konso zoba ta kudikotisa na yo.+
4 Molo ke bundulaka ve ntoto na nsungi ya madidi,Yo yina yandi ta lombaka bima na nsungi ya kukatula bima na bilanga ntangu yandi ta vanda na kima ve.*+
5 Bangindu* ya ntima ya muntu kele bonso bamasa ya mudindu,Kansi muntu ya luswasukusu ke basisaka yo.
6 Bantu mingi ke tubilaka zola na bo ya kwikama,Kansi nani lenda mona muntu ya kwikama?
7 Muntu ya lunungu ke tambulaka na kwikama na yandi.+
Kiese na bana na yandi* yina ke kwisa na nima na yandi.+
8 Kana ntotila me vanda na kiti ya kimfumu sambu na kusambisa,+Yandi ke katulaka mambu yonso ya mbi na meso na yandi.+
9 Nani lenda tuba nde: “Mono me kumisa ntima na mono bunkete;+Mono kele bunkete, mono me konda disumu”?+
10 Bakilo ya luvunu mpi bitesilu ya luvunu*—Yonso zole kele bima ya nzanzi na meso ya Yehowa.+
11 Ata mwana* ke zabanaka na mambu ya yandi ke salaka,Kana bikalulu na yandi kele ya bunkete mpi ya mbote.+
12 Makutu ya ke waka mpi meso ya ke monaka—Yehowa muntu salaka yonso zole.+
13 Kuzola ve mpongi, kana ve nge ta kuma nsukami.+
Kangula meso, ebuna nge ta vanda ti mampa mingi.+
14 Muntu yina ke sumba ke tuba nde, “Yo kele ve mbote, yo kele ve mbote!”Na nima yandi ke kwenda mpi ke kudikumisa.+
15 Wolo kele, matadi ya korayi* kele mpi mingi,Kansi bikobo ya nzayilu kele kima ya ntalu.+
16 Baka lele ya muntu kana yandi me ndima kufutila munzenza mfuka;+Simba kima yina yandi me simbisa sambu na mfuka kana yandi salaka yo sambu na nkento ya munzenza.+
17 Dimpa ya bo me baka na nzila ya luvunu ke vandaka ntomo sambu na muntu,Kansi na nima munoko na yandi ta fuluka ti matadi ya fioti-fioti.+
18 Kana kusolula* kele, mambu ya muntu ke zola kusala ta nunga,*+Mpi nwana bitumba na nge na nsadisa ya lutwadisu ya mayele.+
19 Muntu ya ke kusilaka bantu makambu ke tambula-tambulaka sambu na kubasisa mambu ya kinsweki;+Kuvukana ve ti muntu yina ke zolaka kutonga.*
20 Muntu yina ke singa tata na yandi ti mama na yandi,Mwinda na yandi ta fwa ntangu mpimpa ta kwisa.+
21 Dikabu yina muntu bakaka ntete na lukasiTa vanda ve lusakumunu na nsuka.+
22 Kutuba ve nde: “Mono ta vutula mbi!”+
Tula kivuvu na Yehowa,+ ebuna yandi ta gulusa nge.+
23 Bakilo ya luvunu* kele kima ya nzanzi na meso ya Yehowa,Mpi bakilo ya muyibi kele mbote ve.
24 Yehowa muntu ke twadisaka bitambi ya muntu;+Inki mutindu muntu lenda bakisa nzila na yandi mosi?*
25 Yo kele mutambu sambu na muntu kana yandi tuba nswalu-nswalu na ndinga ya ngolo nde, “Santu!”+
Ebuna kaka na nima yandi yindula mambu yina yandi silaka.+
26 Ntotila ya mayele ke katulaka bantu ya mbi,+Mpi yandi ke lutisaka dikulu ya kima ya bo ke katudilaka bampusu na bambuma na zulu na bo.+
27 Mpema ya muntu kele mwinda ya Yehowa,Yo ke sosa-sosaka kibeni na kati na yandi.
28 Zola ya kwikama mpi kwikama ke kebaka ntotila;+Yandi ke taninaka kiti na yandi ya kimfumu na nsadisa ya zola ya kwikama.+
29 Nkembo ya baleke kele ngolo na bo,+Mpi lukumu ya minunu kele nsuki na bo ya mpembe.+
30 Matutu ti bamputa ke katulaka* mambu ya mbi,+Mpi bafimbu ke kumisaka muntu bunkete na kati kibeni.
Banoti na nsi ya lutiti
^ To “mwana-ntambu yina kele ti mika mingi na nkingu.”
^ To mbala ya nkaka, “Bo ta sosa na nsungi ya kukatula bima na bilanga kansi bo ta mona kima ve.”
^ To “Mabanza.” Na kisina, “Ndongisila.”
^ Na kisina, “bana na yandi ya babakala.”
^ To “Matadi zole ya kutesila ya kuswaswana mpi bima zole ya kutesila ya kuswaswana.”
^ To “mwana-bakala.”
^ Tala Bantendula ya Bangogo.
^ To “bandongisila.”
^ To “ta kuma ngolo.”
^ To “ti muntu yina ke pukumunaka na bikobo na yandi.”
^ To “Bima zole ya kutesila ya kuswaswana.”
^ To “nzila ya kukwenda?”
^ To “ke yobisaka.”
