NTAMA mingi ve, muntu mosi salaka bansosa na batoko kuluta 800 ya mabundu mingi sambu na kuzaba kana Yezu ke pesaka mvutu na bisambu. Batoko 60 na kati ya nkama ndimaka to sonikaka nde Yezu ke pesaka mvutu na bisambu. Kansi toko mosi fwanzaka zina ya Yezu mpi sonikaka “Nzambi.”

Nge ke yindula nki? Keti beto fwete samba Yezu to Nzambi? * Sambu na kubaka mvutu, bika beto tadila ntete mutindu Yezu longaka balongoki na yandi na kusamba.

Yezu longaka beto mpi monisaka muntu ya beto fwete samba.

MALONGI NA YANDI: Ntangu longoki mosi songaka Yezu nde: “Mfumu, longa beto mutindu ya kusamba,” Yezu tubaka nde: “Konso ntangu ya beno ke samba, beno tuba nde: ‘Tata.’” (Luka 11:1, 2) Diaka, na Disolo ya Yezu na Zulu ya Ngumba, yandi siamisaka bawi na yandi na kusamba. Yandi tubaka nde: “Samba Tata na nge.” Yezu songaka bo nde: “Tata na beno ke zabaka mambu yina beno kele na yo mfunu na ntwala nkutu nde beno lomba yandi yo.” (Matayo 6:6, 8) Na mpimpa na yandi ya nsuka na ntoto, Yezu songaka balongoki na yandi nde: “Kana beno lomba kima mosi na Tata, yandi ta pesa beno yo na zina na mono.” (Yoane 16:23) Yo ke pwelele nde Yezu longaka beto na kusamba Yehowa Nzambi, Tata na yandi mpi Tata na beto.—Yoane 20:17.

MBANDU NA YANDI: Yezu vandaka kusamba na kuwakana ti mambu yina yandi longaka bantu ya nkaka. Yandi sambaka nde: “Tata, Mfumu ya zulu ti ya ntoto, mono ke kumisa nge na ntwala ya bantu.” (Luka 10:21) Kilumbu ya nkaka, “Yezu tombulaka meso na yandi na zulu mpi tubaka nde: ‘Tata, mono ke tonda nge na mutindu nge me wila mono.’” (Yoane 11:41) Mpi ntangu yandi vandaka pene-pene na kufwa, Yezu sambaka nde: “Tata, mono ke pesa mpeve na mono na maboko na nge.” (Luka 23:46) Yezu pesaka mbandu ya mbote yina bantu yonso fwete landa na mutindu yandi vandaka kusamba Tata na yandi ya zulu, “Mfumu ya zulu ti ya ntoto.” (Matayo 11:25; 26:41, 42; 1 Yoane 2:6) Keti balongoki ya Yezu ya mvu-nkama ya ntete sadilaka bantuma yai?

Bamposo fioti na nima ntangu Yezu tombukaka na zulu, bambeni yantikaka kuniokula balongoki na yandi. (Bisalu 4:18) Bo sambaka sambu na kulomba lusadisu, kansi bo sambaka nani? Biblia ke tuba nde: “Na bumosi kibeni bo tombulaka bandinga na bo na Nzambi,” mpi sambaka sambu yandi sadisa bo “na nzila ya zina ya nsadi na [yandi] ya santu Yezu.” (Bisalu 4:24, 30) Yo ke pwelele nde balongoki landaka lutwadisu yina Yezu pesaka bo sambu na kisambu. Bo vandaka kusamba Nzambi, kansi Yezu ve.

Bamvula mingi na nima, ntumwa Polo monisaka mutindu yandi ti banduku na yandi vandaka kusamba. Ntangu Polo sonikilaka bampangi na yandi Bakristu, yandi tubaka nde: “Beto ke pesaka matondo ntangu yonso na Nzambi Tata ya Mfumu na beto Yezu Kristu ntangu beto ke sambaka sambu na beno.” (Bakolosai 1:3) Polo sonikilaka mpi bampangi na yandi Bakristu na ‘kupesa ntangu yonso matondo na Nzambi mpi Tata na beto sambu na mambu yonso, na zina ya Mfumu na beto Yezu Kristu.’ (Baefezo 5:20) Bangogo yai ke monisa nde Polo siamisaka bantu ya nkaka na kusamba “Nzambi mpi Tata na [yandi] sambu na  mambu yonso” mpi na zina ya Yezu.—Bakolosai 3:17.

Bonso Bakristu ya mvu-nkama ya ntete, beto lenda monisa zola sambu na Yezu ntangu beto ke landa bandongisila na yandi ya me tala kisambu. (Yoane 14:15) Kana beto samba Tata na beto ya zulu mpamba, bangogo ya Nkunga 116:1, 2 ta sadisa beto na kutudila Yehowa ntima mpi beto ta tuba bonso Davidi nde: “Mono ke zolaka Mfumu Nzambi sambu yandi ke wilaka mono . . . Yandi ke ndimaka konso ntangu kana mono binga yandi.” *