Luzingu ya Dibuta mpi Banduku
Bantu mingi ke monaka nde yo kele mpasi na kuzinga mbote ti bantu ya dibuta mpi ti banduku. Beto tadila minsiku ya nkaka ya Biblia yina lenda sadisa nge na kuyidika mutindu nge ke zingaka ti bantu.
KUVANDA VE BWIMI
MUNSIKU YA BIBLIA: “Beno sosa kaka ve mambote na beno mosi, kansi mpi mambote ya bantu ya nkaka.”—Bafilipi 2:4.
MAMBU YINA YO KE TENDULA: Beto ta zinga mbote ti bantu ya nkaka kana beto ke tula dikebi na mambu ya beto lenda sadila bo kansi ve na yina bo lenda sadila beto. Kana nge kele bwimi, yo lenda sala nde nge zinga ve mbote ti bantu. Mu mbandu, nkwelani ya bwimi lenda konda kwikama na nkwelani na yandi mpi kusala bizumba. Diaka, ata muntu mosi ve ke zolaka kuta kinduku ti muntu yina ke tubilaka ntangu yonso bima na yandi to mambu ya yandi me zaba. Mukanda mosi (The Road to Character) ke tuba nde: “Bantu yina ke zolaka kaka mambote na bo mosi mpi ke yindulaka ve bantu ya nkaka ke kutanaka ti bampasi mingi.”
MAMBU YA NGE LENDA SALA:
-
Sadisa bantu ya nkaka. Banduku ya mbote ke tudilanaka ntima mpi ke sadisanaka ntangu yonso. Bantu ya nkaka ya mayele ke monisaka nde bantu yina ke sadisaka bantu ya nkaka ke kudiyangisaka ve mingi na mabanza mpi bantu ke tadilaka bo na mutindu ya mbote.
-
Wila bantu ya nkaka mawa. Kuwila muntu mawa ke tendula kuditula na kisika ya muntu yina kele na mpasi. Kana nge ke wila bantu mawa, nge ta tuba ve mambu ya ke monisa nde nge ke finga to ke seka bo, disongidila, kutubila bantu mambu ya ke pesa bo mpasi kansi na nsaka.
Kana nge ke wila bantu mawa, nge ta vandaka ve makambu ngolo. Yo yina, kuwila bantu mawa ta sadisa nge na kuvanda ve ti bangindu ya mbi sambu na bantu ya nkaka mpi na kuta kinduku ti bantu ya bisika to ya mpusu ya nkaka.
-
Lutisa ntangu ti bantu ya nkaka. Kana nge ke lutisa ntangu mingi ti bantu ya nkaka, nge ta zaba bo mbote. Kana nge ke zola kuzwa nduku ya mbote, nge fwete solulaka ti yandi mambu yina yandi ke zolaka mpi yina ke vandaka mfunu sambu na yandi. Yo yina, widikilaka bantu na dikebi. Tulaka dikebi na mambu yina banduku na nge ke zolaka. Bansosa me katuka kumonisa nde: “Masolo ya mbote lenda pesa kibeni bantu kiese.”
PONA MBOTE BANDUKU NA NGE
MUNSIKU YA BIBLIA: “Banduku ya mbi ke bebisaka bikalulu ya mbote.”—1 Bakorinto 15:33.
MAMBU YINA YO KE TENDULA: Bantu yina nge ke lutisaka ntangu ti bo lenda pusa nge na kusala mambu ya mbote to ya mbi. Bantu yina ke longukaka bikalulu ya bantu ke tubaka nde banduku ya muntu kele ti bo lenda vanda ti bupusi ya ngolo na luzingu na yandi. Mu mbandu, kana banduku na nge ke nwaka makaya to me fwaka makwela, nge lenda kuma kusala bonso bo.
MAMBU YA NGE LENDA SALA: Ta kinduku ti bantu yina ke monisaka bikalulu yina nge ke zolaka mpi mambu yina nge ke zolaka. Mu mbandu, ta kinduku ti bantu ya mayele, ya luzitu, ya ke kabaka mpi ya ke yambaka bantu.
MINSIKU YA NKAKA YA BIBLIA
Tala bavideo ya ke tubilaka masolo yina kele na Biblia mpi ya bo me basisaka sambu na kusadisa bankwelani, batoko mpi baleke na kutomisa luzingu na bo ya dibuta
KUTUBA VE MAMBU YINA LENDA PESA BANTU YA NKAKA MPASI.
“Kutuba kukonda kuyindula kele bonso kulwadisa muntu na mbele ya bitumba.”—BINGANA 12:18.
KABAKA.
“Muntu yina ke kabaka ta toma.”—BINGANA 11:25.
SADILA BANTU YA NKAKA MAMBU MUTINDU NGE KE ZOLA NDE BO SADILA NGE.
“Mambu yonso yina beno ke zola nde bantu kusadila beno, beno mpi beno fwete sadila bo yo.”—MATAYO 7:12.
