Bo Monaka Zola na Dibundu
MPANGI Yomara mpi bampangi na yandi zole ya babakala Marcelo ti Hiver ke zingaka na bwala mosi ya fioti na Guatemala. Yomara yantikaka kulonguka Biblia ti Bambangi ya Yehowa mpi na nima, bampangi na yandi kumaka mpi kulonguka. Kansi yo vandaka mpasi sambu na bo. Bo yonso tatu vandaka kumona ve mpi bo vandaka kutanga ve bisono ya bifwa-meso. Yo yina, mpangi yina vandaka kulonguka ti bo Biblia vandaka kutanga baparagrafe mpi baverse ya dilongi yina bo vandaka kulonguka.
Yo vandaka mpi mpasi sambu bo kwenda na balukutakanu bo mosi. Nzo ya Kimfumu vandaka kiteso ya minuta 40 ti kisika yina bo vandaka kuzinga. Yo yina, bampangi ya dibundu vandaka kuyilama sambu na kunata bo na balukutakanu. Ntangu bo yantikaka kusala masolo na lukutakanu ya kati-kati ya mposo, bampangi vandaka kusadisa bo na kukanga na ntu mambu yina bo ta tuba.
Na mai 2019, bo yantikaka kusala balukutakanu ya dibundu na bwala na bo. Na nima, mpangi mosi ti nkento na yandi yina vandaka bapasudi-nzila ya ntangu yonso, kwendaka na bwala na bo. Ata bampangi yina zabaka ve kutanga mpi kusonika bisono ya bifwa-meso, bo kuditudilaka lukanu ya kulonga yo na bampangi yina tatu. Bo kwendaka na biblioteke mosi sambu na kulonguka mutindu ya kusonika mpi kutanga bisono ya bifwa meso. Diaka, bo vandaka mpi kulonguka mutindu ya kulonga yo bantu ya nkaka.
Marcelo ke pesa mvutu na lukutakanu ya dibundu na bo
Na nima ya bangonda fioti, bo sadisaka bampangi yai tatu ya bifwa-meso na kutanga mbote-mbote mpi na kuyela na kimpeve. a Bubu yai, Yomara, Marcelo mpi Hiver kele bapasudi-nzila ya ntangu yonso. Marcelo kele nsadi ya kisalu. Konso mposo, bo ke kudipesaka mingi na kusala mambu ya kimpeve. Bikesa yina bo ke monisaka na kisalu ya Yehowa ke pusaka bantu ya nkaka na kusala mutindu mosi.
Bampangi yai tatu ke monisa ntonda mutindu dibundu ke sadisaka bo na zola yonso. Mpangi Yomara ke tuba nde: “Na mbala ya ntete ya beto kutanaka ti Bambangi ya Yehowa, bo monisilaka beto zola yina Bakristu ya kieleka fwete monisa.” Marcelo ke yika nde: “Beto ke vandaka ti banduku ya mbote na dibundu na beto mpi beto ke zaba nde beto kele ti dibuta ya nene na ntoto ya mvimba yina ke zingaka na zola mpi na bumosi.” Mpangi Yomara ti bampangi na yandi ya babakala ke vingila kumona ntangu yina Yehowa ta kumisa ntoto paladisu.—Nk. 37:10, 11; Yez. 35:5.
a Kamukanda Longuka na Kutanga Bisono ya Bifwa-Meso ke sadisaka kifwa-meso to muntu yina ke monaka ve mbote na kulonguka mutindu ya kutanga mpi ya kusonika bisono ya bifwa-meso.
Nge Lenda Sepela Mpi Ti
MUTINDU BO KE SADILAKA MAKABU NA NGE
Bambuma ya Fioti-Fioti Ke Soba Luzingu ya Bantu
Beto ke basisaka mikanda na bisono ya bifwa-meso mpi beto ke longaka bantu mutindu ya kutanga bisono ya bifwa-meso.
