• Muntu yina Nzambi Ponaka. “Mono mosi me tula ntotila na mono . . . Mono ta pesa nge makanda bonso dikabu mpi nsuka ya ntoto sambu yo vanda ya nge.”—Nkunga 2:6, 8.

• Muntu Yina Bakaka kimvwama ya Ntotila Davidi. “Bo me butila beto mwana, bo me pesa beto mwana mosi ya bakala . . . Luyalu na yandi ta yalumuka mpi ta vanda na ngemba kukonda nsuka, na zulu ya kiti ya kimfumu ya Davidi mpi na zulu ya kimfumu na yandi sambu na kutula yo ngolo.”—Yezaya 9:6, 7.

• Muntu Yina Butukaka na Betelemi. “O Betelemi . . . , Muntu yina ta vanda mfumu na Izraele sambu na mono ta basika na nge . . . Bunene na yandi ta kuma tii na nsuka ya ntoto.”—Mika 5:2, 4.

• Muntu Yina Bantu Mengaka mpi Monisaka Mpasi. “Bo vwezaka yandi, mpi beto bakaka yandi bonso muntu ya mpamba. . . . Bo tobulaka yandi sambu na mbi na beto; bo monisaka yandi mpasi sambu na bifu na beto.”—Yezaya 53:3, 5.

• Muntu Yina Telamaka na Bafwa mpi Yina Bo Pesaka Nkembo. “Nge ta bika mono ve na Maziamu. Nge ta bika ve nde muntu na nge ya kwikama kumona dibulu. . . . Kiese kele kimakulu na diboko na nge ya kitata.”—Nkunga 16:10, 11.

Na disolo ya luzingu ya bantu, muntu mosi mpamba me lungisaka mambu yonso sambu na kuvanda Mfumu ya mbote; muntu yango kele Yezu Kristu. Ya kieleka, wanzio tubilaka Maria mama ya Yezu nde: “Nzambi ta pesa yandi kiti ya kimfumu ya tata na yandi Davidi, . . . mpi Kimfumu na yandi ta vanda ve ti nsuka.”—Luka 1:31-33.

Yezu kumaka ve mfumu ntangu yandi vandaka na ntoto. Kansi, sambu yandi kele Ntotila ya Kimfumu ya Nzambi, yandi ta yala bantu katuka na zulu. Inki ke monisa nde Yezu ta vanda Mfumu ya mbote? Beto tadila mambu yina Yezu salaka ntangu yandi vandaka na ntoto.

•   Yezu vandaka kutudila bantu dikebi. Yezu sadisaka babakala, bankento, baleke mpi bambuta kukonda kutala bisika yina bo katukaka mpi kana bo vandaka bamvwama to bansukami. (Matayo 9:36; Marko 10:16) Ntangu muntu yina vandaka ti maladi ya lepre tubilaka yandi nde: “Kana nge me zola, nge lenda kumisa mono bunkete,” Yezu wilaka yandi mawa mpi belulaka yandi.—Marko 1:40-42.

• Yezu longaka beto mutindu beto lenda sepedisa Nzambi. Yandi tubaka nde: “Beno lenda sala ve bonso bampika sambu na Nzambi mpi sambu na Kimvwama.” Yandi tubaka mpi nde beto fwete sadila bantu ya nkaka mambu mutindu beto ke zola nde bo sadila beto, bo ke bingaka munsiku yango nde Munsiku ya Wolo. Diaka, yandi monisaka nde Nzambi ke tulaka dikebi kaka ve na mambu yina beto ke salaka kansi mpi na mutindu na beto ya kuyindula mpi mutindu beto ke kudiwaka. Yo yina, sambu na kusepedisa Nzambi, beto fwete yala mabanza na beto. (Matayo 5:28; 6:24; 7:12) Yezu monisaka nde sambu beto vanda kibeni na kiese, beto fwete longuka mpi kusala mambu yina Nzambi ke zolaka.—Luka 11:28.

• Yezu Longaka Mutindu ya Kuzola Bantu ya Nkaka. Mambu yina Yezu vandaka kutuba mpi kusala vandaka kusimba ntima ya bantu yina vandaka kuwidikila yandi. Biblia ke tuba nde: “Bantu yitukaka mingi na mutindu na yandi ya kulonga, sambu yandi vandaka kulonga bo bonso muntu yina kele ti kiyeka.” (Matayo 7:28, 29) Yandi songaka bo nde: ‘Beno zola bambeni na beno.’ Yandi sambaka mpi sambu na bantu ya nkaka yina vandaka na kisina ya lufwa na yandi. Yandi tubaka nde: “Tata, lolula bo, sambu bo ke zaba ve mambu yina bo ke sala.”—Matayo 5:44; Luka 23:34.

Yezu me fwana kibeni na kuvanda Mfumu ya ntoto ya mvimba, yandi ke sadisaka bantu mpi yandi kele ntima ya mbote. Kansi nki ntangu yandi ta yantika kuyala?