Odval ke zingaka na Mongolie. Yandi me zaba ve mbote-mbote bamvula na yandi, kansi yandi ke mona bonso nde yandi butukaka na 1921. Ntangu yandi vandaka mwana, yandi vandaka kukeba bitwisi ya bibuti na yandi. Yandi salaka kaka mvula mosi na nzo-nkanda. Yandi me zaba ve kutanga. Kansi ntama mingi ve, kamukanda mosi ya kele ti bafoto mingi sadisaka yandi na kuzaba Nzambi mpi na kulonguka nde luzingu mosi ya mbote ke vingila bantu yina ke widikilaka Nzambi. Mambu yai ya yandi zabaka simbaka kibeni ntima na yandi.

Bambangi ya Yehowa basisaka kamukanda yango na 2011. Yo kele tumikanda zole. Yonso zole kele ti bafoto ya kitoko. Mosi kele ti bisono mingi kuluta ya nkaka.

Kamukanda yina kele ti bisono mingi, zina na yo Widikila Nzambi mpi Zinga Mvula na Mvula. Ntama mingi ve, yo ta basika na bandinga 583. Kamukanda yina ya nkaka, zina na yo Widikila Nzambi. Yo ta basika na bandinga 483. Na Oktobri 2013, ntangu bo balulaka mukanda yina Nations Unies me basisaka yina ke tubilaka banswa ya bantu na ntoto ya mvimba (Déclaration universelle des droits de l’homme), bantalu ya bandinga yina bo basisaka tumikanda yina zole lutaka ntalu ya bandinga yina bo balulaka mukanda yai ya banswa ya bantu, bo balulaka yo na bandinga 413. Diaka, bo niemaka tumikanda yina zole kiteso ya bamilio 80.

Na Brésil, nkento mosi ya mbuta ndimaka kamukanda Widikila Nzambi na kiese yonso mpi tubaka nde: “Yo kele mbote na kuzaba nde kele ti bantu yina ke kudibanza-banzaka sambu na bantu yina kele bonso mono. Mono ke bakaka ve mikanda na beno sambu mono me zaba ve kutanga. Kansi kamukanda yai, mono me ndima kubaka yo.”

Brigitte ke zingaka na France. Yandi me zaba ve kutanga. Yandi tubaka nde: “Konso kilumbu, mono ke talaka bafoto ya kamukanda yai.”

Mbangi mosi ya Yehowa na Afrique du Sud sonikaka nde: “Mono me monaka ve kamukanda ya me luta kamukanda yai sambu na kulonga bashinwa kieleka ya kele na Biblia. Mono me solulaka dezia ti bantu ya mitindu yonso—bantu ya me salaka iniversite, bantu ya mayele mingi mpi bantu yina ke zabaka ve kutanga mbote. Kamukanda Widikila Nzambi mpi Zinga Mvula na Mvula ke sadisaka mono na kulonga malongi ya luyantiku ya Biblia kukonda kusukinina. Na nima ya minuta 30, mono ke yantikaka kulonguka ti bantu.”

Na Allemagne, Bambangi ya Yehowa zole ke longukaka Biblia ti bakala mosi mpi nkento na yandi. Bankwelani yai kele mayele mingi. Kansi, Bakala yitukaka mingi ntangu yandi monaka kamukanda yai mpi yandi tubaka nde: “Sambu na nki beno pesaka mono ve kamukanda yai na ntwala? Yo ke sadisa mono na kubakisa kukonda mpasi malongi ya Biblia mpi mambu ya me salamaka yina Biblia ke tubilaka.”

Na Australie, nkento mosi ya kele kifwa-makutu tubaka nde: “Mono me zingaka bamvula mingi na couvent ti bamasere. Mono vandaka kibeni pene-pene ya bantwadisi ya dibundu. Kansi ata ntwadisi mosi ve me longaka mono kana Kimfumu ya Nzambi kele nki. Bafoto ya kele na kamukanda yai me sadisaka mono na kubakisa kibeni ntendula ya Matayo 6:10.”

Biro ya Bambangi ya Yehowa na Canada sonikaka nde: “Ntangu bantu mingi na Sierra Leone monaka kamukanda Widikila Nzambi na ndinga ya Krio, bo tubaka nde Bambangi ya Yehowa ke sala kibeni bikesa sambu na kulonga nsangu yina kele na Biblia. Bantu ya nkaka tubaka nde, ‘Beno ke kudibanzaka sambu na bantu, kansi bantu ya nkaka ke salaka yo ve.’”