Konso mvula, bantu mingi ke salaka viziti na banzo ya betele ya États-Unis mpi ya babiro ya nene ya Bambangi ya Yehowa na Mbanza New York. Bo ke bingaka banzo yina Betele; zina ya Kiebreo yina ke tendula “Nzo ya Nzambi.” Bantu yina ke salaka viziti ke katukaka na bisika ya pene-pene mpi ya ntama sambu na kutala mutindu bo ke sala mikanda, kuzaba mutindu bo ke twadisaka kisalu na beto, mpi kutala banduku na bo yina ke salaka kuna. Ntama ve muntu mosi ya salaka viziti vandaka ti lukanu ya ngolo ya kwisa kutala betele.

Marcellus kele Mbangi ya Yehowa, mpi yandi zingaka na Anchorage, na Alaska, na États-Unis. Yandi ke tubaka na mpasi banda yandi me kumaka kubela maladi ya ntu mwa bamvula me luta. * Yandi ke vandaka na kiti ya bikata mpi bantu ke sadisaka yandi na bisalu na yandi ya konso kilumbu. Ata luzingu na yandi kele mpasi mutindu yai, yandi vandaka ti nzala ya ngolo ya kwenda kutala Betele. Ntama mingi ve, ndosi na yandi lunganaka.

Corey, nduku yina sadisaka Marcellus na kwenda kutala Betele ke tuba nde: “Yandi vandaka kudindamana. Yandi vandaka kubinga mu mbala na mbala sambu na kuyula kana beto ta kwenda nki kilumbu. Sambu Marellus ke tubaka mbala mingi kaka kaka ‘Ee’ mpi ‘Ve,’ yo vandaka kulomba nde mu yula bangiufula mingi kana yandi me binga.” Bo vandaka kusolula mutindu yai:

“Nge ke zola mu kwisa?”

“Ve.”

“Nge ke zola mu binga munganga?”

“Ve.”

“Nge me binga sambu na kwenda kutala Betele?”

“Ee.”

“Na nima, yo vandaka kulomba nde mu tendudila yandi nki me bikala na kusala na ntwala ya kukwenda kuna. Mu vandaka na kiese mingi ya kumona nde mutindu yandi lungisaka lukanu na yandi.”

Marcellus nungaka mambu mingi ya mpasi sambu yandi kwenda kutala Betele. Sambu kele ve ti mbongo mingi, yandi bumbaka mbongo bamvula zole sambu na kusala nzietelo ya bakilometre 5 400 katuka na bwala na bo tii na New York. Sambu na kimbefo na yandi, yo lombaka nde yandi zwa muntu ya mbote yina ta sala nzietelo ti yandi. Nsuka-Nsuka, yo lombaka nde munganga na yandi kupesa yandi nswa ya kusala nzietelo; munganga pesaka yandi nswa yina mwa bilumbu fioti na ntwala ya dati na yandi ya nzietelo.

Ntangu Marcellus kumaka na New York, bo sadisaka yandi viziti ya babiro ya Betele na Brooklyn, na Patterson, mpi na Wallkill. Yandi monaka bamasini ya nene ke basisa mikanda mpi Babiblia mpi yandi zabaka mutindu bo ke twadisaka kisalu na beto. Yandi monaka mpi bisika yina bo ke songisaka bima; ntu-diambu na yo vandaka “Biblia mpi Zina ya Nzambi” mpi “Bantu Yina Ke Nataka Zina ya Yehowa.” Ntangu yandi vandaka kusala viziti, yandi zwaka banduku mingi ya mpa. Yo vandaka kibeni nzietelo yina yandi ta vilaka ve!

Bantu mingi ke tubaka nde bo ke kukaka ve kutendula kana bo yula bo na kuta viziti yina bo salaka na Betele. Kansi ntangu bo yulaka Marcellus kana yo vandaka kibeni mfunu nde yandi sala nzietelo yina, yandi tubaka kaka mutindu yandi ke tubaka nde: “Ee. Ee. Ee!”

Kukwenda kutala Betele lenda pesa nge ti dibuta na nge kikesa, kaka mutindu yo pesaka Marcellus kikesa. Bantu lenda kwenda kutala babiro na beto yina kele na nsi-ntoto ya mvimba. Keti nge lenda kwisa kutala beto?