Na kilumbu ya 4 Oktobri, 2014, bawi kiteso ya 19 000 vukanaka sambu na lukutakanu ya 130 ya konso mvula ya Watch Tower Bible and Tract Society of Pennsylvania. Manaka vandaka kukatuka na Nzo ya Balukutakanu ya Nene ya Bambangi ya Yehowa na Mbanza Jersey, na New Jersey, na États-Unis, mpi bantu mingi vandaka kulanda yo na video na bisika mingi ya nkaka.

Mpangi Mark Sanderson ya Nto-Kimvuka ya Bambangi ya Yehowa, vandaka ntwadisi ya lukutakanu yina. Na bangogo na yandi ya luyantiku, Mpangi Sanderson monisaka nde lukutakanu ya mvula yai kele mfunu mingi, sambu beto kele aniversere ya 100 banda Nzambi me tulaka Kimfumu ya Mesia.

Mpangi Sanderson tubilaka mambu tatu ya nene yina Kimfumu me sala na bamvula 100 na yo ya ntete:

• Kisalu ya kulonga nsangu ya mbote na ntoto ya mvimba. Ti lusakumunu ya Yehowa, bantu na yandi me panzaka nsangu ya mbote ya Kimfumu kukonda kulemba. Na 1914, beto vandaka bansamuni fioti kibeni kansi na mvula ya kisalu 2014, beto kumaka bansamuni kuluta bamilio nana. Beto ta landa kulonga nsangu ya mbote na kikesa tii kuna Yehowa ta tuba nde imene.

• Kutanina bantu ya Kimfumu na kimvuka. Bamfumu ya mabundu mpi ya politiki me nwanisaka beto ngolo, bo me mekaka nkutu kufwa Bambangi yonso ya Yehowa. Kansi, Yehowa me taninaka bantu yina ke sambilaka yandi na kimvuka. Beto me nungaka mambu mingi na tribinale, tanga mpi na Tribinale ya Nene ya États-Unis mpi na Tribinale ya Ke Nwaninaka Banswa ya Bantu na Eropa; mambu yai ke ndimisa beto nde Yehowa ke landa kukeba beto tii bubu yai.

• Kuvukisa bantu ya mitindu yonso. Kimfumu ya Nzambi me vukisaka bantu ya me katukaka na bisika yonso, na bansi yonso, mpi na bandinga yonso; yo me sadisaka bo na kununga bampasi mingi mpi na kusala kimvuka ya bantu yina ke sambilaka Nzambi na bumosi. Mpangi Sanderson tubaka nde: “Diambu yai kele kimangu yina Yehowa Nzambi mpamba lenda sala.” Yandi tubaka diaka nde, bawi yonso vandaka na kiese mingi sambu bo vandaka na lukutakanu yina ya mfunu mingi.

Bavideo Kuma Nduku ya Yehowa.

Bavideo yai ya bo me salaka sambu na bana mpi ya beto ke landaka banda bamvula kuluta zole, vandaka disolo ya zole na manaka ya lukutakanu yina. Ntete, Mpangi Sanderson songaka video yina bana ya nsi-ntoto ya mvimba vandaka kutuba. Bawi sepelaka na mambu ya masonga yina bana yina tubaka mpi na ntonda yina bo monisaka sambu na mambu yina bo longukaka na bavideo yina.

Na nima bo songaka video mosi. Ntu-diambu na yo kele “Yehowa Ta Sadisa Nge na Kuvanda Kikesa.” Yo kele video ya minuta 12 mpi yo ke tubila disolo ya mwana-nkento ya Izraele yina tubaka na kikesa yonso mambu ya Yehowa na nkento ya Namani. (2 Bantotila 5:1-14) Bo tulaka video yina na jw.org na Kintete, Oktobri 6, 2014, mpi yo kele na bandinga kuluta 20.

JW Language.

Mpangi Sanderson tubaka nde kisadilu mosi ya mpa me basika. Beto lenda sadila yo na batelefone, na batablette, na baordinatere mpi na ba-apareyi ya nkaka, sambu na kusadisa Bambangi ya Yehowa yina ke zola kulonguka ndinga ya nkaka na kusala mingi kisalu kusamuna. Kisadilu yina kele ti bangogo mpi bansa kuluta 4000 na bandinga 18. Bo ke baka bangidika sambu na kuyika bangogo ti bansa ya nkaka, bangogo ya kukotila na masolo na kisalu ya bilanga, mpi mambu ya nkaka.

JW Broadcasting.

Bawi sepelaka na kuzaba nde Bambangi ya Yehowa me basisa TV ya mpa na Internet. Bo yantikaka kusonga yo na Kingelesi sambu na kutala mutindu yo ta salaka. Yo ta salaka katuka na babiro na beto ya nene na Brooklyn, New York na États-Unis. TV yai ta songaka bavideo na beto, miziki na beto, mpi badrame na beto ya lutangu ya Biblia. Diaka, mpangi mosi ya Nto-kimvuka to nsadisi ya komite mosi ya Nto-Kimvuka muntu ta twadisaka manaka konso ngonda.

Mpangi Sanderson songaka bitini ya ntete ya manaka yina. Mpangi Stephen Lett ya Nto-Kimvuka muntu twadisaka disolo yina. Yo songaka kisalu yina bo salaka sambu na kuyidika TV yina ya mpa. Televizio yina yantikaka kusonga manaka na Oktobri 6, 2014, mpi nge lenda tala yo kana nge kota na tv.pr418.com.

“Kimfumu Me Sala Dezia Bamvula 100.”

Mpangi Samuel Herd ya Nto-Kimvuka tubilaka video yina vandaka kutendula mutindu Kimfumu ya Nzambi me sadisaka beto malembe-malembe na kuyela mpi na kusala mbote kisalu na beto ya kulonga. Yo songaka mambu ya ntama, bansonga ya ke vutukila mambu yina salamaka, mpi ba eksperiansi ya Bambangi ya Yehowa ya ntama. Video yina tubilaka mutindu bo salaka mpi songaka “Foto Drame ya Lugangu” na bisika mingi; mutindu bo vandaka kusadila fono, bakarte ya kuta kimbangi, kutambula sambu na kuta kimbangi, mpi kaminio ya vandaka kubasisa ndinga; mpi banzo-nkanda ya kulonga beto mutindu ya kusala kisalu ya kusamuna.

Inki mambote beto ke baka ntangu beto ke yindula mambu yina Kimfumu me salaka na bamvula 100 na yo ya ntete? Kusala mutindu yina ke sala nde Kimfumu kuvanda kima ya kieleka sambu na beto mpi yo ke sala nde beto vingila ti mpusa ya ngolo mambu yina yo ta sala na bilumbu ke kwisa.

Bankunga Sambu na Lusambu.

Mpangi David Splane ya Nto-Kimvuka pesaka bawi yonso kiese ntangu yandi tubaka nde bo me baka bangidika sambu na kutomisa mukanda na beto ya bankunga, Beto Yimbila Yehowa. Mpusu na yo ta vanda kiteso mosi ti mpusu ya Mbalula ya Nsi-Ntoto ya Mpa mpi bakwe na yo ta vanda ya arza. Kusadila bima yai ya ntalu ke monisa nde miziki kele mfunu mingi na lusambu na beto.

Mpangi Splane tubaka diaka nde bo ta yika bankunga ya mpa na mukanda ya bankunga. Kansi beto ta vingila ve tii kuna bo ta niema mukanda ya mpa ya bankunga sambu beto yantika kuyimba bankunga yina ya mpa. Bo ta basisaka yo na jw.org kana bo me manisa yo.

Na lukutakanu yina, bo yimbaka bankunga tatu na kati ya bankunga yina ya mpa; bampangi ya dibuta ya Betele salaka ba repetisio na mposo yina, mpi bo yimbaka yo na lukutakanu yai. Mpangi Splane twadisaka korale sambu na kuyimba nkunga ya kele ti ntu-diambu “Kimfumu Ke Yala—Bika nde Yo Kwisa!” Bo salaka nkunga yina ntete-ntete sambu Kimfumu vandaka me lungisa bamvula 100 banda yo butukaka. Ntangu korale manisaka kuyimba, bawi yonso yimbaka ti bo. Na nima, korale yimbaka nkunga ya nkaka ya mpa ti bawi. Ntu-diambu ya nkunga yina kele “Pesa Beto Kikesa.”

Interview.

Na video mosi yina bo kotisaka bandinga na ntwala, Mpangi Gerrit Lösch ya Nto-Kimvuka yulaka bangiufula na bampangi sambanu yina me sala bamvula mingi na Betele. Bo tubilaka bansoba mingi yina bo me monaka na luzingu na bo; bansoba yina ke monisa nde bantu ya Nzambi ke kwenda na ntwala. Mpangi Lösch tubaka nde Biblia tubaka nde bansoba zolaka kusalama na mutindu ya kuyidika mambu, mpi yandi siamisaka bawi yonso na kulanda kukwenda na ntwala ti dibundu ya Yehowa.—Yezaya 60:17.

“Bizuzi mpi Bantendula na Yo.”

Mpangi Splane muntu salaka disolo yai; disolo na yandi tendulaka sambu na nki na bamvula yai, mikanda na beto ke tubila ve mingi bizuzi mpi ntendula na yo mutindu yo vandaka kusala ntete.

Na ntama, beto vandaka kutuba nde babakala mingi mpi bankento mingi ya kwikama yina Biblia ke tubilaka vandaka kumonisa bimvuka ya Bakristu ya kwikama ya ntangu na beto. Mutindu mosi, beto vandaka kuyindula nde masolo ya nkaka ya Biblia vandaka kutubila na ntwala mambu ya ke tadila bansadi ya Nzambi ya bilumbu na beto. Ya kieleka, kulonguka mutindu bo me fwanisa mambu mutindu yai lenda vanda kitoko mingi. Ebuna, sambu na nki mikanda na beto ya bilumbu yai ke tubilaka diaka ve mingi bizusi mpi bantendula na yo?

Masonuku ke monisa nde bantu ya nkaka mpi mambu ya nkaka kele kifwani ya muntu to ya kima mosi ya nene. Kisika yina Biblia ke monisa pwelele kuwakana na kati ya kizuzi mpi ntendula na yo, beto ke ndimaka yo na kiese yonso. Mpangi Splane tubaka nde: “Kansi kisika yina Biblia ke tuba kima ve, beto fwete tuba mpi kima ve.” Beto fwete lutisa ve ndilu ntangu beto ke tadila disolo mosi buna. Diaka, kana beto lutisa ntangu mingi na kusosa kizuzi, ntendula na yo mpi mutindu yo ta lungana, beto lenda bakisa ve malongi ya mfunu yina masolo ya Biblia lenda longa beto yonso—yo vanda beto kele ti kivuvu ya kukwenda na zulu to ya kuzinga awa na ntoto.—Baroma 15:4. *

“Keti Nge Ta ‘Landa na Kukengila’?”

Diskure yai, yina Mpangi Lett salaka, sobaka mutindu beto ke bakisaka kingana ya Yezu ya bamwense kumi. (Matayo 25:1-13) Bubu yai beto ke bakisa kingana yina mutindu yai: Bakala yina ke kwela kele Yezu, mpi bamwense kele balongoki ya Yezu yina bo me tulaka mafuta. (Luka 5:34, 35; 2 Bakorinto 11:2) Kingana yina ke tadila bilumbu ya nsuka, mpi yo ta kuma ngolo na mpasi ya nene. Ntangu Yezu vandaka kutubila bamwense tanu ya bazoba, yandi vandaka kutuba ve nde balongoki na yandi mingi ya bo me tulaka mafuta ta konda kwikama mpi yo ta lomba nde balongoki ya nkaka kuyinga bo. Kansi, yandi vandaka kupesa lukebisu mosi ya ngolo. Mutindu bamwense tanu vandaka mayele mpi tanu vandaka bazoba, konso longoki ya bo me tulaka mafuta kele ti dibaku ya kupona kana yandi ta kudibongisa mpi ta kangula meso to kana yandi ta konda kwikama.

Na kuwakana ti munsiku ya ke tadila kulutisa ve ndilu ntangu beto ke tadila disolo mosi, yo ta vanda ve mbote kana beto ke tadila kingana yai sambu na kusosa kuzaba kana konso diambu ke wakana ti nki. Kansi, yo ta vanda mbote nde beto sosa kuzaba malongi ya mfunu yina beto ke baka na kingana yina. Yo vanda beto kele na kati ya bantu ya bo me tulaka mafuta to na kati ya “mameme ya nkaka,” beto yonso kele ti mukumba ya kubika nde nsemo na beto kusema ngolo mpi ya ‘kulanda kukengila.’ (Yoane 10:16; Marko 13:37; Matayo 5:16) Muntu mosi ve lenda vanda kwikama na kisika na beto. Konso muntu “fwete sola luzingu” mpi kubikala meso ya kukangula na kimpeve mpi kusamuna ti kikesa.—Kulonga 30:19.

“Kingana ya Batalanta.”

Mpangi Anthony Morris ya Nto-Kimvuka muntu salaka disolo yai. Yandi sadisaka bawi na kubakisa ntendula ya mpa ya kingana ya batalanta. (Matayo 25:14-30) Ntangu yai beto ke bakisa nde na kingana yai mfumu (Yezu) ta futa bampika (balongoki na yandi ya kwikama yina bo me tulaka mafuta yina kele na ntoto) na bilumbu ke kwisa ntangu yandi ta kwisa mpi ta futumuna bo sambu bo baka luzingu na zulu. Ntangu yandi tubilaka mambu yina ta kumina “mpika ya mbi mpi ya molo,” Yezu vandaka kutuba ve nde balongoki na yandi mingi yina bo me tulaka mafuta ta konda kwikama. Kansi, yandi vandaka kukebisa balongoki ya bo me tulaka mafuta nde bo fwete landa kusala ngolo mpi kubuya bikalulu mpi mambu yina mpika ya mbi salaka.

Inki malongi ya mfunu beto lenda baka na kingana yai? Mfumu yina kingana yai ke tubila pesaka bampika na yandi kima mosi ya mfunu. Mutindu mosi, Yezu me pesaka balongoki na yandi kima yina yandi ke monaka mfunu—kisalu ya kulonga nsangu ya mbote mpi ya kukumisa bantu balongoki. Yandi ke zola nde beto sala kisalu ya kulonga na kikesa yonso, na kutadila luzingu na beto. Mpangi Morris sikisaka bawi sambu bo ke kudipesaka na kikesa yonso na bisalu ya Kimfumu.

“Nani Ta Nwanisa Bantu ya Nzambi Ntama Mingi Ve?”

Yina ntu-diambu ya kitoko ya diskure ya nsuka yina Mpangi Geoffrey Jackson ya Nto-Kimvuka salaka. Mpangi Jackson tubilaka mutindu Gogi ya Magogi ta nwanisa bantu ya Nzambi na bilumbu ke kwisa.—Ezekiele 38:14-23.

Na ntama, beto vandaka kubakisa nde Gogi kele zina ya nkaka ya Satana Diabulu na nima ya ntangu yina bo kulaka yandi na zulu. Kansi, Mpangi Jackson yindulaka na bangiufula mingi ya mfunu yina ntendula yai ke basisa. Mu mbandu, Yehowa tubaka na ntwala nde ntangu bo ta bedisa Gogi, Yehowa ta pesa Gogi “na bandeke ya mitindu yonso ya ke diaka misuni mpi na bambisi ya mfinda” bonso madia na bo. (Ezekiele 39:4) Yehowa tubaka mpi nde bo ta pesa “Gogi ti bimvuka na yandi yonso ya nene ya bantu” maziamu na ntoto. (Ezekiele 39:11) Kansi, inki mutindu mambu yina yonso lenda kumina kigangwa ya kimpeve? Bo ta losa Satana na dibulu ya nda, yandi ta sala bamvula 1000, bo ta dia yandi ve, bo ta yoka yandi mpi ve. (Kusonga 20:1, 2) Diaka, na nsuka ya bamvula 1000, bo ta basisa Satana na dibulu ya nda mpi “yandi ta basika sambu na kukusa makanda yina kele na bandambu iya ya ntoto, Gogi ti Magogi.” (Kusonga 20:7, 8) Yo kele pwelele nde, Satana lenda kusa ve Gogi kana yandi mosi kele Gogi.

Mpangi Jackson tendulaka nde Gogi ya Magogi yina mbikudulu ya Ezekiele ke tubila fwete monisa ve Satana kansi kimvuka ya makanda yina ta balukila bantu ya Nzambi na bilumbu ke kwisa. Yo ke monana nde, bitumba ya Gogi kele kiteso mosi ti bitumba ya “ntotila ya nordi” mpi bitumba ya “bantotila ya ntoto.”—Daniele 11:40, 44, 45; Kusonga 17:12-14; 19:19.

“Ntotila ya nordi” ke monisa nani? Beto fwete vingila zaba na kuzaba. Ata yandi ta vanda nani, sambu mutindu na beto ya kubakisa mambu yai ya ke kwisa ke landa kutoma awa ya yo ke finama, yo ke kumisa kibeni lukwikilu na beto ngolo. Beto ke wa ve boma ya bitumba yina bo ta nwanisa bantu ya Nzambi, sambu beto me zaba nde ntangu Gogi ta nwanisa beto, bo ta bedisa yandi mpi bo ta fwa yandi kimakulu—kansi bantu ya Nzambi ta bikala kimakulu. *

Bangogo ya nsuka.

Mpangi Sanderson tubaka nde ntangu yai bo me basisa Mbalula ya Nsi-Ntoto ya Mpa yina nge lenda tula na poshi. Diaka, bo ke na kuyidika Biblia ya kuwidikila, yina ta vanda ti bandinga ya bantu mingi yina ke tanga mambu yina konso muntu ya kele na Biblia ke tuba. Bo ta tulaka mambu yai ya kuwidikila malembe-malembe na jw.org; mpi bo ta yantika na mukanda ya Matayo.

Mpangi Sanderson tubaka nde mukapu ya mvu 2015 kele Nkunga 106:1: “Beno pesa Yehowa matondo, sambu yandi kele mbote.” Yandi siamisaka bantu yonso na kusosa bikuma ya kupesa Yehowa matondo konso kilumbu.

Nkunga ya nsuka vandaka nkunga ya tatu na kati ya bankunga na beto ya mpa; ntu-diambu na yo kele “Zina na Nge Kele Yehowa.” Bampangi yonso nsambwadi ya Nto-Kimvuka vukanaka ti korale na estrade mpi bantu yonso vandaka kuyimba nkunga yai ya mpa ya kitoko—yai mutindu ya mbote kibeni ya kumanisa lukutakanu yai ya mfunu!