Irma ta mora na Alimanha i el ten kuazi 90 anu. Dipôs ki el kai dôs bês i el faze alguns operason, el ka sta konsigi prega más di kaza en kaza sima el ta fazeba antis. Gósi, Irma ta skrebe kartas pa se família i pa kes algen ki el konxe pa pâpia ku es sobri se fé. Kes algen ki ta resebe se kartas di nkorajamentu i kes karta di konsolu óras ki es perde algen, ta fika txeu kontenti i txeu bês es ta txoma-l pa pergunta-l ki ténpu ki el ta manda otu karta. Tanbê el ta resebe txeu karta di algen ta agradese-l i ta pidi-l pa el manda más karta. Irma fla: “Tudu kel-li ta pô-m ta xinti txeu filís i ta djuda-m kontinua ta prega.”

 Irma tanbê ta manda karta pa txeu algen di idadi ki ta mora na kes kaza ki ta kuidadu di algen grandi. El fla: “Un sinhora ki dja sta grandi, tilifona-m i el fla-m ma kel karta ki N manda-l dipôs ki se maridu móre, konsola-l txeu. El ta guarda kel karta na se Bíblia i txeu bês el ta lé-l di noti. Un otu mudjer, ki se maridu móre ka dura li, fla ma nha karta djuda-l más di ki diskursu di padri. El tinha txeu perguntas pa faze-m i el pergunta-m si el podia vizita-m.”

 Kantu un algen ki Irma konxe, ki é ka Tistimunha di Jeová, muda pa un lugar más lonji, el pidi pa Irma fika ta manda-l karta. Irma fla: “Kel sinhora guarda tudu kes karta. Dipôs ki el móre, se fidju-fémia txoma-m. El fla-m ma el lé tudu kes karta ki N manda se mai i el pidi-m pa N fika ta manda-l kartas sobri Bíblia tanbê.”

 Irma gosta txeu di da tistimunhu através di kartas. El fla: “N ta inplora Jeová pa el kontinua ta da-m forsa pa N sirbi-l. Nbóra N ka sta konsigi prega di kaza en kaza más, N ta faze kel ki N ta pode.”